Nahabar Si Yesus Timooromei ¹ Tu nendo kataro duminggu tiin, si Maria Magdalena mako witu kubur ni Yesus tu momoondope karengan, nendo niitu rimbune, wo sia lumoho mbatu nyai penet kubur nyainong kaesong, witu kubur tiin. ² Wo sia lumenteng mange sumero si Simon Petrus wo se murit walina se kaupus ni Yesus, wo lumila wia nisea, "Niindo neamong si Empung witu kubur niitu, wo ndaaimong kailekan nai sawisa winehan nea nisia." ³ O sea mange, Petrus wo se murit walina mako witu kubur niitu. ⁴ Seandua se lumenteng mawali-wali, taan se murid walina, serepet lumenteng makar nisea se rior nyai kaayo witu kuburan tiin. ⁵ Sia tumembo wo lumoho mako witu gorem, kalohoan nea mako roko lenen nyai saput si Yesus nyai kaweta witu, taan nisia si raai minuntep tunggorem. ⁶ Kaayomei si Simon Petrus, wo sia kumiitako nisia, muntep witu kuburan wo lumoho rokok lenen sasaput nyai kaweta witu. ⁷ Wo roko nyai saput nggio ni Yesus ndaai nyai kaweta o roko sasaput tiin, taan ginulungou witu tampa walina. ⁸ Wo si murid walina tiin, si rior nyai kaayo witu kuburan, kahai siminuntep. Sia lumoho sandiri makar nisia mapercaya. ⁹ Ka, ndaaipe minamuali nyaai, sea se raaipe pangartian nea buk suci, ka si Yesus si timoorei sumaup witu patean. Yesus Mapaloho Nawak Tu Si Maria Magdalena ¹⁰ Niitumong, se rua murit tiin mareng witu mbale. ¹¹ Taan si Maria, si timoorete witu luar kuburan tiin, si mahame. Si mahame epe wo sia tumembo mako witu gorem kubur tiin, ¹² wo kolohoanamako se rua malaikat pinakean puti, rimuhumun witu tampa winetaan mayat ni Yesus nyai tekel katare. Si esa rimuhumun witu winetaan rookos, wo si esa rimuhumun witu winetaan nae. ¹³ Se rua malaikat tiin, moi witu si Maria, "Ei wewene, kaakou mahame?" Maria mingkotako tu se malaikat tiin, "Nisea se minindomong mayat ni Empungeku, wo ndaaimong kailekangku sawisa winetaan nea nisia." ¹⁴ Kalilila te mako ni Maria niitu, wo sia mutarei nawak lohonamako tumuri si Yesus timoor witu, taan ndaai kailekana sa sia tiin si Yesus. ¹⁵ Yesus moi wia nisia, "Wewene, kaakou mahame, sei si peneronu? Ka kailekana sia si mayahaga wona taman tiin, Maria lumila wia nisia, "Tuan, sa si Tuan mineramako nisia, lilaamei wia nyaku sawisa nieraan niu nisia, nyaku kumaindomei nisia." ¹⁶ Yesus lumila wia nisia, "Maria." Wo Maria lumenge mako wo lumila tu nisia minake bahasa Ibrani, "Rabuni" nartina "Guru." ¹⁷ Wo Yesus lumila wia nisia, "Tia" nikou matitimboi nyaku, ka nyaku ku raaipe minange na si Bapa. Taan nikou mangemong na patuari-patuariku wo lilamako tu nisea, "Nyaku ku mange na si Bapa-Eku wo Bapa-emu, witu si Empung-Eku wo Empung-emu. ¹⁸ Maria Magdalena mehete minange, mange lumila se murid-murid, "Nyaku, ku limohomong si Empung," wo si Yesus sandiri si limilaamei nyaai, wia nisia. ¹⁹ Kambengimong, nendo katare duminggu tiin, wo pepenet-pepenet paharuran ne murid-murid kinusiane, ka nisea se mainde setou-tou Yahudi, wo si Yesus mai, tumoor tu nuner nea, wo lumila, "Damai wo sejahtera wia nikau!" ²⁰ Kalililaate niitu, Yesus mapaturu lawasena wo pootena wia nisea. Wo se murid-ena se mapaa-paar karengan, limoho si Empung. ²¹ Wo Yesus lumila kahai wia nisea, "Damai sejahtera wia nikau. Tanu si Bapa si Rimehomei nyaku, taintukan kahai tarekan nyaku rumeho nikau." ²² Wo kalililaate niitu, Yesus sumengo mako nisea wo lumila, "Terimanene Roh Kuduh!" ²³ Sa nikau mampungako ndosa, ni esa tou, niitukan ndosana nampungan. Sa wewehan si tou, ndosana ndaai ampungan niu, ndosa ni tou tiin ndaai kaampungan. ²⁴ Tomas tiin si esa tu se maplo rua murid si pailaan Didimus, si raai witu ka kai ni Yesus. ²⁵ Wo se murid-murid walina mako lumila tu nisia, "Nikai limohomong si Empung." Taan si Tomas lumila wia nisea, "Saaku limohomong sandiri bekasena mpaku tu lawas-ena wo ku muntepako tutunduuku witu bekas paku tiin, wo muntepako lawaseku tunggorem poot-ena, nyaku ku raaipe mapercaya." ²⁶ Ka uwalu ngaendo mangemai, se murid-murid ena merur kahai tum bale tiin, wo si Tomas, si mawali-wali nisea maane pepenet-pepenet kinusiane. Taan kasengeemei si Yesus timoorou witu nuner nea wo lumila, "Damai sejahtera wia nikau!" ²⁷ Wo sia lumila tu si Tomas, "Wehemei tutundu'umu wiay, wo lohonu lawas-eku, wo wo wehemei lawasemu wiay, wo untepako witu pooteku, tia kou raai mapercaya, taan tare kou mercaya." ²⁸ Tomas mingkot si Yesus, "En Empungku wo kou Empungeku" ²⁹ Yesus lumila wia nisia, "Sapa kou tarekan mapercayamong ka kou limohomong nyaku? Kamangenei wia nisea se raai limoho, taan se mapercaya. ³⁰ Lakere karengan makaerangen walina siniwo ni Yesus tu sinaru ne murid-murid ena, ndaaimong nyai patik wia nyaai. ³¹ Taan pakasaan nyaai, nyainong patik rior nikau mapercaya ka si Yesus ow tiin si Kristus oki ni Empung, rior witu kapercayaaniu tiin, nikau makaindo katotouan tunggorem ngaran-Ena.