Yesus Mapaturu Nawak Witu Se Pitu Murid-Ena ¹ Tumondong niitu Yesus mapaturu nawak-Ena kahai witu se murid-murid ena witu tawi lour liberias. Nisia mapaturu nawak-ena tanu nyaai ² Si Simon Petrus wo si Tomas patowaan Didimus, Natanael tu kana Galilea, oki-oki ni Zebedeus wo se rua murid walina se minerur. ³ Simon Petrus lumila wia nisea, "Nyaku kumaako masesero sera" Wo sea lumila wia nisia, "Nikai, kai paar mako mawali nikou. Wo sea makowaya sumeret londei, taan mbengi tiin se raai minakaindo sapa-sapa. ⁴ Ndaaimong ure maowatou, Yesus tumoor tu liilik lour, taan ndaai kailekan ne murid-ena sa sia Yesus ⁵ Sia lumilaame wia nisea, "Oki-oki sapa kau wewehan sera?" Mingkotei sea, "Ndaai wana" ⁶ Sia lumilaame wia nisea, "Lahawame lolombo niu witu leleos londei wo kau makaindo." Wo sea lumawahame lolombo nea, taan nisea se raaimong ka kehorei lolombo nea, witu londei, ka minawutamong se sera witu lolombo. ⁷ Niitumong se murid se kaupus karengan ni Yesus lumila tu si Petrus, "Nisia si Empung!" Kalilingate ni Petrus, nisia si Empung, o sia lumambung ka si mineta lambung sa mapaayang sia rumenteke witu lour. ⁸ Se murid walina se minai kaampit londei, wo kumehor lolombo minawuta sera ka nisea se raai roou o ng katanaan, woote rua ngaatus hasta. ⁹ Kaayo mako sea witu susuaan, sea lumoho, mbara mbaha, wewehan sera witu natasena kaampit roti. ¹⁰ Yesus lumila, "Alinei se sera werupe tinimboyan niumei maan pirate." ¹¹ Simon Petrus sumeretako tu londei, sia kumehorei lolombok minawuta sera lolombo na ndaai minakese. ¹² Wo Yesus lumila wia nisea, "Mai wo kumanong." Ndaai wana si esa murid-ena moi wia nisia, "Sei kou?" Ka kailekan nea sia tiin si Empung. ¹³ Yesus mai wo mindomei roti tiin, wehenamako witu nisea. Taintukan kahai siniwona o se sera tiin. ¹⁴ Nyaai katelu na Yesus mapaloho nawak-ena witu se murid-murid ena katotoornamei witu nantara ne tou minate. ¹⁵ Maka kan nako sea, si Yesus lumila si Simon Petrus, "Simon, oki ni Yohanes, sapa nikou maupus nyaku lumembe mako pakasaan yaai? Petrus mingkot, "Nulit Empung, kailekanu ka nyaku maupus nikou." Wo Yesus lumila wia nisia, "Gembalanako se domba-dombaku!" ¹⁶ Yesus kahai lumila ka rua namong wia nisia, "Simon, oki ni Yohanes, sapa nikou maupus nyaku?" Petrus mingkot, "Nulit Empung, kailekan nu ka nyaku maupus nikou." Yesus lumila wia nisia, "Gembala nako se domba-dombaku!" ¹⁷ Yesus lumila wia nisia katelunamong, "Simon, oki ni Yohanes, sapa nikou maupus nyaku?" Nate ni Petrus, si masusamong, ka si Yesus makatelumong moi wia nisia, "Sapa kou maupus nyaku?" Wo si Petrus lumila wia nisia, "Empung, nikou makailek pakasaan kailekan nu ka nyaku maupus nikou!" Yesus lumila wia nisia, "Gembala nako se domba-dombaku!" ¹⁸ Nyaku maila ulit karengan wia nikou, nikou taretumou pe nikou sandiri minaakes penar-emu, wo makelang wisate paaremu. ¹⁹ Yesus maila nyaai ka si matuturu mako kaampit patean kumura wo si Petrus makaasar si Empung. Wo makalila mako niitu sia lumila tu si Petrus, "Kumiitei Nyaku". ²⁰ Petrus lumenge wo lumohome si murid si kaupus karengan ni Yesus, Makiitei nisea, nisia si murid rimuhumun, tawi karengan ombeewer ni Yesus, witu parjamuan mbengi wo moi, Empung sei sia si tou si mahianat nikou tiin? ²¹ Kalolohona nisia, Petrus moi si Yesus, "Empung, kumura sia?" ²² Yesus mingkot, "Saaku paar nisia menou-noute, makar nyaku mai sumaup, sapa nurusan nu? Nikou, mai kumiit nyaku!" ²³ Wo pakasaan paila ni Yesus tiin, kinalingaan tu nantara ne patuari-patuari tiin, ka si murid tiin si raai mate, padahal si Yesus si raai maila ka nisia si raai mate, taan si limila, "Saaku paar nisia si matou-toute makar nyaku mai sumaup, sapa nurusan nu?" ²⁴ Siamong si murid si simaksi pakasaan nyaai, wo si minatikou pakasaan nyaai, wo kailekanta ka kasaksiana tiin nulit. ²⁵ Lakere karengan kahai siniwo ni Yesus, wo saitu patikako pataesaan, papendamengku pakasaan kaoatan yaai ndaai kaawesan papumpunan pakasaan buk pinatikan tiin.