¹ Wo si Pilatus makomei si Yesus wo mehemako prentah, wantian si Yesus. ² Se prajurit sumiwo mako makota niindo neamei witu saang tutuekan tu pake neamako witu rookos ni Yesus, sia lambungan nea mako juba abu-abu, wia nisia. ³ Sea tumawimei nisia wo lumila "Sighi, ei Raja tou Yahudi!" Wo sea sumepe gio-Na. ⁴ Pilatus mondolei kahai lumila wia nisea: "Lohone, nyaku ku malimei si Yesus wia nikau, rior kailekan niu, nyaku ku raai limoho kasumelokan sapa-sapa wia nisia." ⁵ Wo Yesus mondolei si pinakeanea makota tutuekan wo lambung juba abu-abu, Pilatus lumila wia nisea, "Lohonei sia!" ⁶ Kalolohome ne imam-imam kapala wo se perwira, sea rumekeime, "Salipen sia, salipen sia!" Taan si Pilatus lumila wia nisea "Alinong sia, wo ako salipen sandiri, ka nyaku ku raai minakaindo kasumelokan sapa-sapa wia nisia." ⁷ Setou-tou Yahudi mingkot tu si Pilatus, "Nikai, kai wewehan nukum wo makiit nukum tiin, sia si kapaar nai mate, ka nisia si maila nawak-Ena oki ni Empung." ⁸ Kalilingate niitu si Pilatus si maindeemong, ⁹ wo sia muntep sumaup tu pangadilan tiin, wo moi tu si Yesus, "Wisa ko mai?" Taan si Yesus tia mingkot. ¹⁰ Pilatus lumila wia nisia: "Nikou, kou tia lumila o nyaku? Sapa raai kailekan nu, ka nyaku, ku wewehan kuasa mabebebas nikou, wo wewehan kuasa masasaup nikou?" ¹¹ Yesus mingkot: "Nikou kou raai wana si kuasa sapa-sapa wia nawak-Eku kacuali kuasa tiin nyaai wehemei wia nikou, tu natas. Niitumong setou seminalimei nyaku wia nikou kasa sela dosa nea." ¹² Kalilingate niitu, Pilatus maulit mabebebas si Yesus, taan setou-tou Yahudi rumekei mei, "Sa sia bebasenu si tou yaai, nikou, kou raai kaampit ni kaisar sei si tou maanggap nawakena raja, nisia si masaru si kaisar." ¹³ Kalilinga niitu si Pilatus, mali mei si Yesus tu luar, wo rumuhumun witu ruruhumunan pangadilan tu tampa makangaran Litostrotos, bahasana Ibrani pailaan gabata. ¹⁴ Nendo niitu mauntep Paskah, woo witu jam kaenem. Pilatus lumila witu setou-tou Yahudi, "Yaaimong si Raja niu!" ¹⁵ Wo sea rumekeimei, "Rooumako sia, Rooumako sia, Salipen sia!" Pilatus lumila wia nisea, "Torokan nyaku sumalip si Raja niu?" Se imam-imam kapala mingkot, "Nikai kai raai wana si raja lumaengako si Kaisar!" ¹⁶ Kamurian, si Pilatus sumerakanako si Yesus wia nisea ako salipen. ¹⁷ Mondolei si Yesus kaampit minuleng salip-Ena sandiri mako witu tampa ngaran "Tampa Tarauka", pailaan ne Ibrani "Golgota". ¹⁸ Witu niitu sia salipen mawali-wali se rua tou walina, sinalip si esa witu leleos, si esa witu kawihi, Yesus si witu nuner nea. ¹⁹ Pilatus kahai si minatikako nesa tu wehe nea mako witu natas kayu salip tanu nyaai, "Yesus Tou Nasaret Raja Tou Yahudi". ²⁰ Laker setou Yahudi timembomako nyai patik tiin, ka tampa sinalipan si Yesus tiin witu ntawi kota, wo nyai patik tiin minake bahasa Ibrani, Latin, wo Yunani. ²¹ Wo se imam-imam kapala wo setou Yahudi lumila tu si Pilatus, "Tia pa patik, Raja Tou Yahudi, taan nyaai patikako, tou yaai maila nyakumong si Raja tou Yahudi." ²² Wingkoten ni Pilatus, "Sapamong nyai ku patik, niitu nyai patik!" ²³ Se prajurit, kasasalip nea mako si Yesus, sea mindomei lambungena tu pawetengen nea mako epat, se tina-esaan se prajurit tiin taintukan kahai juba na, juba tiin rendai te, ndaai wana si wiwilitan. ²⁴ Wo se prajurit tiin lumila nisea wo nisea, "Tiamong niitu parere seen maimong tu undin tamong sei si makaindo niitu." Nyai mamuali rior malekep nyai patik tum buk suci: "Nisea se memete-meteng lambungeku, tu nantara nea wo witu jubaku undin nea." Taintumong se prajurit tiin sumiwo nyaai. ²⁵ Wo niitu, si mama ni Yesus, patuarina wewene, Maria kaawu ni Klopas, wo si Maria Magdalena, timoor tun tawi salip-Ena. ²⁶ Kalolohote ni Yesus tu si mamana wo se murid se kaupus ena timoor witu wo sia lumila tu si mamana, "Wewene, lohonei, yaai oki imu" ²⁷ Wo, Yesus lumila witu si muritena se kaupus-Ena tiin: "Si yaai mong si mama niu, tumuur niitu se murid tiin tumerima si mama ni Yesus mena tum bale na. ²⁸ Tumondong niitu, Yesus si makailek ka pakasaan minamualimong, malelekep buk suci, o sia lumila, "Nyaku mareo!" ²⁹ Witu niitu wewehan kure minawura nanggor esem. Niitumong nisea masekako teteger wo tu tawi nea mako witu suma ni Yesus. ³⁰ Pea nan na mako nanggor esem tiin, wo Yesus lumila: "Lekepou, wo sia tumuutukako rookosena wo sumerakane nawak-Ena. ³¹ Ka nendo niitu nendo persiapan, wo rior se minate tiin se raai mena witu kayu salip tu endo Sabat, ka Sabat tiin niitu nendo sela, setou-tou Yahudi kumiwehe tu si Pilatus, nae-nae ne tou sinalip tiin repuun, wo se minate tiin tumpamei witu kayu salip. ³² Wo sea mai se prajurit, mai rumepu nae ne minate katare, wo se minate walina, sinalip mawali-wali si Yesus. ³³ Taan, kaayo mako sea tu si Yesus wo lumoho mako sia si minatemong sea raai rimepu nae-na. ³⁴ Taan si mataasaane witu se prajurit tiin, tu muekako tumbakena witu tian ni Yesus, wo tu kumeresotei ndaha. ³⁵ Setou mineren siniwo tiin, seamong se minehe kasaksian, tiin wo kasaksian nea nulit wo kailekana sia si maila nulit, rior nikau mapercaya. ³⁶ Ka pakasaan nyaai, minamuali rior lekepou nyai patik witu buk suci, "Ndaai wana si esa witu nduhina rinepu nea." ³⁷ Wo kahai, witu wewetengan walina buk suci limila, "Nisea se lumoho nisia, si rinundek nea." ³⁸ Tumondongako niitu, Yusuf witu Arimatea, sia si murit ni Yesus, sia mai masinde-sindek ka si mainde setou-tou Yahudi, kumiwehe tu si Pilatus satoro sia mindomei wo mali si mayat Yesus, wo kiniitan ni Pilatus. Wo si Yusuf tu Arimatea tiin mindomei wo mali si Yesus minatemong. ³⁹ Nicodemus, si riorako minahilekan si Yesus tumbengi si minai mahali-ali lana mur wo gaharu sinembor, kawuterana woo lima ngapulu kilo. ⁴⁰ Wo indoneamei si mayat Yesus, sia saputen nea o roko linen, kaampit winehan nea wewehe kumiit kana ramen pakuburen ne tou Yahudi. ⁴¹ Witu ntawi sinalipan si Yesus, wehan taman wo witu goremena wewehan kiniaran kubur weru, ndaai pe pinumpunan tou minate witu. ⁴² Ka nendo niitu, nendo pasiapan wia setou Yahudi, wo tampa pakuburan ndaai roow, wo sea meta mako mayat ni Yesus witu niitu.