¹ Kalililaate ni Yesus nyaai waya, wo sia mange kaampit semurid-ena witu sangaweka salu kidron, witu wewehan taman, wo Yesus muntep tunggoremena kaampit semurid-ena. ² Yudas, si mataasaane tu tu semurid-ena si lime wo si Yesus kahai si makailek taman tiin ka si Yesus o se murid-murid ena makalaker mako witu. ³ Yudas makaindo temei sia pasukan wo sehamba-hamba witu seimam-imam kapala kaampit se tou Farisi, se minai witu taman tiin mahali-ali lantera, nobor kaampit lulutam. ⁴ Yesus si makai lekou pakasaan yaai, wo mamuali wia nisia, sia mako tumoor witu rior, moi wia nisea, "Sei si peneron niu?" ⁵ Wingkoten neamei: "Yesus tou Nasaret." Yesus lumila wia nisea: "Nyakumong ku Yesus." Wo kahai witu si Yudas si limewo nisia, timoor mawali-wali nisea. ⁶ Kalililaate ni Yesus: "Nyakumong ku Yesus," setou-tou tiin nyai kaundur wo sea kanawu witu ntana. ⁷ Wo Yesus moi kahai wia nisea: "Sei si peneron niu?" Wingkoten neamei: "Yesus tu Nasaret." ⁸ Mingkot si Yesus: "Nyaikumong lilaame wia nikau, nyakumong si Yesus. Ka nikau maser nyaku waya mome semurid-murid ena yaai mareng. ⁹ Nyaai minamuali rior kasampet sapa nyai lila ni Yesus: "Witu pakasaan nyai niu wehemei wia nyaku, ku raai kalilingan maan esa." ¹⁰ Simon Petrus si mahali-ali sambel, wuuwutenamei sambel tiin wo itu parasname witu si pelayan ni Imam Sela, tu maketor luntungena leleos ni pelayan tiin, ngaran ni pelayan tiin malkhus. ¹¹ Wo Yesus lumila tu si Petrus: "Untepako sambel-Emu tiin witu sarongena gelas nyai wehemei ni Bapa wia nyaku, ndaai reen niitu noonotengku?" ¹² Wo se prajurit-prajurit Romawi kaampit se perwira nea, wo se pelayan tou Yahudi tumimboi si Yesus o sia waakesen nea. ¹³ Wo katare si Yesus niali nea witu si Hanas, si manohang ni Kayafas nisia si Imam Sela tiin taon niitu. ¹⁴ Wo si Kayafasou tiin si minehemako tuturu witu setou-tou Yahudi ka kaaraan karengan sa si esa tou mate ka magenang se rakyat. ¹⁵ Taan si Simon Petrus wo si esa murid-ena walina, kumiit si Yesus. Si murid-ena walina tiin si raai kenalen ne Imam Sela, wo sia muntep mawali-wali si Yesus, makar witu raraaran istana ni Imam Sela. ¹⁶ Taan si Petrus timoorete witu luar tawi pepenet. Wo si murid walina tiin, kumenal si Imam Sela, muta rei sumaup sia mako witu luar, mahilekan sia wo sumirita osi wewene mayahaga pepenet, wo malimei si Petrus muntep. ¹⁷ Wo si wewene mayahaga pepenet tiin moi tu si Petrus: "Ndaai reen nikou kahai kou murid ni tou tiin?" Mingkot si Petrus: "Ndaai!" ¹⁸ Ka si si wo nea waha, se pelayan wo se perwira mako tumoor witu, ka mbengi niitu nemel karengan, wo sea meniri-nirita. Petrus kahai mawali-wali witu o nisea timoor wo masirita. ¹⁹ Wo si Imam Sela tiin moi wia si Yesus, sakumura semurid-murid ena wo kumura najaran na. ²⁰ Yesus mingkot nisia: "Nyaku ku lumilaame wia kaoatan. Nyaku ku mahajar witu sinagoge-sinagoge wo mbale ni Empung, penampaan ne tou Yahudi maharur. Nyaku ku raai maila masinde-sindek. ²¹ Kaa kou mawoi wia nyaku? woi nong witu nisea se liminga sa sapa pailaaku wia nisea, kailekanea sapa paila aku." ²² Kalililaate ni Yesus taintu, si esa tou majaga timoor witu sumepe giona wo lumila: "Taintu pahangean nu, mawingkot si Imam Sela?" ²³ Yesus mingkot nisia: "Sa wewehan pailaaku simelok, turuumei kasumelokangku; taan saitu pailaaku nulit, kaa kou sumepe nyaku?" ²⁴ Wo si Hanas malime si Yesus taan si winaakes witu si Imam Sela Kayafas. ²⁵ Niitu si Simon Petrus si timoore witu. Wo sea moi wia nisia: "Ndaai reen, nikou kahai kou esa murid ni tou tiin?" Petrus simangkal-ete wo mingkotako: "Ndaai." ²⁶ Si esa pelayan ni Imam Sela, si patuari ni tou kine torana lunteng, lumila: "Ndaai reen nyaku limoho nikou mawali-wali nisia witu taman tiin?" v 27 Makasape kahai si Petrus mingkotako: Ndaai, kasenyeemei kumukukei si kooko. ²⁸ Tumondong niitu sea mali kahai si Yesus witu tampa ni Kayafas mako witu pangadilan, niitu momoondope karengan, wo nisea sandiri se raai minuntep witu gorem pangadilan tiin, rior nisea raai manajis, wo sea toro kuman paskah. ²⁹ Wo mondolei si Pilatus mako mahilekan, o nisea wo sia moi: "Sapa patudu niu wia si tou yaai?" ³⁰ Sea mingkotei wo lumila wia nisia: "Sa si tou yaai si raai tou lewo, sia si raai niali nai mei wia nikou." ³¹ Pilatus lumila wia nisea: "Alinei sia wo hakimen kiit nukum niu." Setou-tou Yahudi mingkot: "Niitu kai raai makiit nukum sa kai mehe nukuman mate wia sitou." ³² Nyaai minamuali, ka malelekep nyai lila ni Yesus si timuru patean tanu sapa sa sia mate. ³³ Wo sia si Pilatus muntep sumaup tung gorem pangadilan wo tumowaamei si Yesus, wo moi wia nisia: "Sapa kou Raja ne tou Yahudi?" ³⁴ Yesus mingkot: "Sapa pawoyen nu tiin minondolei witu nawakemu sandiri kaapa wewehanong tou lumila wia nikou, sa kumura nyaku?" ³⁵ Pilatus lumila: "Sapa nyaku tou Yahudi? Bangsa wo se imam-imam kapala mu sandiri se simerakan nikou wia nyaku. Sapa siniwo mu?" ³⁶ Yesus lumila: "Karajaangku ndaai wia kaoatan yaai. Saitu karajaangku wia kaoatan yaai, se memaayang wia nyaku se sumaru, rior nyaku raai seraka nea witu setou-tou Yahudi. Taan karajaangku ndaai wia kaoatan yaai." ³⁷ Pilatus lumila: "Wo nikou, kou raja?" Yesus mingkot: "Nikou kou maila ka nyaku, ku raja. Niitumong nyaku ku nyai tou mei, wo niitumong nyaku mai wia kaoatan yaai, ku masaksi me kumura kaulitan. Sei te si tou si minai witu kaulitan, nisia si luminga paila aku. ³⁸ Pilatus lumila wia nisia: "Sapa reen kaulitan tiin?" Wo makalila mako niitu, Pilatus mondolei mako mahilekan o setou-tou Yahudi, wo lumila wia nisea: "Nyaku ku raai minakaindo kasumelokan sapa-sapa wia nisia. ³⁹ Taan nikau, kau wewehan kanaramen sa nyaku ku mebasako sitou patahangen tu nari paskah. Niitumong sapa, sapa kau paar, ku mebasako si Raja Tou Yahudi tiin?" ⁴⁰ Sea mingkotei marekei: "Tia pabebebasen sitou yaai, si Barabas sou!" Barabas tiin sitou marampok.