¹ Niitumong pengila-ngila ni Yesus, wo sia sumarume langit wo lumila, "Bapa, ndona biamong, mulia nomei si oki'mu rior si oki'mu kahai toro mamulia nikou. ² Masuat tanu nikou minehemong wia nisia kuasa tu pakasa setou, rior witu pakasaan nyai nu wehe wia nisia, Sia toro mehe katotouan ndaai si raakaran. ³ Nyaaimong katotouan ndaai si kaakaran tiin, niitu ka nisea kumenal nikou esa te Empung si ulit, wo kumenal si Kristus Yesus si nyai nu renomei. ⁴ Nyaku, ku minuliamong nikou wia kaoatan wo limekepako paayangen nyai nu wehemei wia nyaku paayangen. ⁵ Wo tarekan, ya Bapa, mulianomei nyaku mawali-wali nikou, kaampit pengasa-ngasaran wia nyaku kaampit nikou, ndaai pe wia kaoatan. ⁶ Nyaku ku nyimatamong ngaran-emu witu setou-tou nyai nu wehemei wia nyaku, wia kaoatan yaai sea yaai se taintumu. Wo nyainumong wehemei nisea wia nyaku, wo sea kahai se kimiitou firman-Emu. ⁷ Tarekan, kailekaneamong ka pakasaan nyai nu wehemei, wana nikou o mai. ⁸ Ka nyaku, ku minehemong wia nisea firman nyai nu wehemei wia nyaku, wo tinerima neamong kaampit makailek karengan, ka nyaku wana nikou wo mai, wo nisea maeman karengan wia nikou si rimehomei nyaku. ⁹ Nyaku, ku masombayang nisea, Nyaku ku raai masombayang kaoatan taan wiate nisea se nyai nu wehemei wia nyaku, ka nisea se taintu mu. ¹⁰ Pakasaan wia nyaku niitu taintumu, wo pakasaan taintumu, taintukukan kahai wo nyaku ku paasa-asaren wia nyaai waya. ¹¹ Nyaku ku raaimong wia kaoatan, taan nisea se wiape kaoatan yaai, wo nyaku mai wia nikou, Bapa kou Kudus, yahaganei sea witu gorem ngaran-Emu, ngaran nyai nu wehemei wia nyaku, makar nisea mamuali esa tanu nikita. ¹² Kaurean nyaku mawali-wali nisea, ku yimahagamong nisea witu gorem ngaran-Emu nyai nu mong wehemei wia nyaku. Nyaku yimahagamong nisea wo ndaai wana si esa wia nisea nyai kaliong tampasako si oki kapatean rior buk suci lekepen. ¹³ Taan tarekan, nyaku mai wia nikou wo pakasaan nyaai lila kume wia kaoatan yaai rior nisea makaindo kapaaranku ma wuta witu gorem nate nea. ¹⁴ Nyaku ku minehemong firman-Emu wia nisea, wo kaoatan maseso nisea ka nisea se raai wia kaoatan yaai o mai, tanu nyaku ku raai wia kaoatan o mai. ¹⁵ Nyaku ku raai makiwehe nikou, makaindo nisea wia kaoatan yaai, taan kelu-kelungan temei sea wia si lewo. ¹⁶ Nisea se raai wia kaoatan wo mai, tanu nyaku, ku raai wia kaoatan wo mai. ¹⁷ Suci nako sea witu kaulitan firman-Emu niitumong kaulitan. ¹⁸ Tanu nikou rumeho momei nyaku mai wia kaoatan, taintukan kahai nyaku rumeho nisea mako witu gorem kaoatan. ¹⁹ Ka nisea, wo nyaku sumuci nawak-Eku, rior kahai nisea sesucin tu gorem kaulitan. ²⁰ Nyaku ku raaite masombayang nisea, taan kahai witu setou-tou semaeman wia nyaku witu pahabar nea. ²¹ Rior nisea waya mamuali esa, masuat tanu nikou, ya Bapa, witu gorem-Eku wo nyaku kuwitu gorem-Emu rior nisea kahai mamuali esa wia gorem-eta makar kaoatan maeman ka nikou te si rimehomei nyaku. ²² Pangasa-ngasaran nyai nu wehemei wia nyaku, nyai ku mong wehe nisea rior sea mamuali esa, tanu nikou wo nyaku minamuali esa. ²³ Nyaku ku witu gorem nea, wo nikou kouwiagorem-Eku, rior nisea mamuali esa karengan, wo mako taintu, kaoatan mako makailek ka nikoute si rimehomei nyaku, wo nikau maupus nisea tanu nikou maupus nyaku. ²⁴ Ya Bapa, kapaareku nisea, senyai nu wehemei wia nyaku, sea kahai mawali-wali nyaku wisa te nakoangku, makar nisea toro lumoho kamuliaan-Emu, nyai nu wehemei wia nyaku, ka nikou maupus nyaku, tumuur ndaaipe wia kaoatan. ²⁵ Oh Bapa kou rendai, maan kaoatan raai kumenal nikou, taan nyaku ku kumenal nikou, wo sea se makailek ka nikou si rimehomei nyaku. ²⁶ Nyaku ku lumila mome ngaran-Emu wia nisea, wo pemehe-mehe nea maila niitu, rior kaleosan kaampit niitu nikou maupus nyaku, mbitute gorem nea, wo nyaku ku witu gorem nea."