¹ Mangemai nendo nari penta kosta, nisea waya semawali - wali witu tampa esa. ² Kasenge emei lingane na langit, lengku tanu reges repet, wo lengku tiin minuta witu pakasaan bale witu rinuhu munan nea. ³ Wo lohon nea lila - lila tanu layasena mbaha limendong witu tumai tumeka tu rookos nea esa wo siesa. ⁴ Wo sea waya winuta roh kudus, wo sea tumuur maila minalae laengan bahasa tanu nyai wehe ni roh kudus wia nisea lumila. ⁵ Witu niitu wewehan se tou - tou yahudi se mahana tu yerusalem, se tou - tou leus wia pakasaan bangsa omai wia mbawa langit. ⁶ Wo kalingaanako lengku tiin, se kasaan ne tou caker tiin semehete minai mawali - wali se minalikoko ka se tou semalinga nisea, se mailaamong bahasa nea sandiri. ⁷ Nisea se maerang, wo lumila"ndaai reen nisea waya se mailatiin, se tou tou galilea. ⁸ Wo kumurape nikita yaai malinga nisea, se maila mapake bahasa tampa kina tou anta?. ⁹ Se tou - tou partia dan media wo elam, wo se tou mesopotamia, yudea, wo kapadokia, pontus wo asia. ¹⁰ Frigia, wo pamfilia, wo wanua - wanua libia tawi kirene, wo setou - tou witu roma omai, leus se tou - tou yahudi kaapa proselit. ¹¹ Tou - tou kreta wo arab, ta malinga nisea se maila bahasa ta kumuru pasiowan sela ni empung. ¹² Wo nisea waya maerang wo lokoko, wo sea maila esa wo siesa:"sapa pangatian nyaai waya?. ¹³ Taan se tou walina makeeke wo maila "nisea setinelewo nanggorem".

Petrus Lumila Witu Laker Tou

¹⁴ Sia tu moorei si petrus kaampit se maploesa rasul, mangkatei suarana wo lumila wia nisea"ei kau tou - tou yahudi, wi nikau mahana tu yerusalem, maanong tu kailekan niu, wo gena - genangen pailaaku. ¹⁵ Ka se tou - tou yaai se raai tewelen, tanu pailaniu, aka nendo yaai waya mote jam katelu. ¹⁶ Taan nyaaimong nyai lilamei limalan witu si nabi yoel. ¹⁷ Wo witu nendo wia muri, mamuali, si empung mafirman:nyaku, ku rumaan base roh - ku tu natas pakasan setou, wo si oki imu tuama, oki - okiimu wewene se ma nubuat wo se oki niu tare tumou se lumoho, pahalo mei, wo se tu'a - tu'a wia nantara niu, se makaindo nipi penipi - nipin. ¹⁸ Maan witu se hamba - hambaku tuama wo se hamba - hambaku wewene witu nendo - nendo niitu, ku tumuasei roh - eku wo nisea se manubuat. ¹⁹ Wo nyaku ku mapaloho mujisat - mujisat, wana langit, naatas, wo tanda maka erangen wia kaoatan, witu mbawa, ndaha, mbaha, wo rimbun nahawun. ²⁰ Si endo si siwon rimbun, si serap mamuali raha, rumiorei nendo niempung sela wo mulia mai. ²¹ Wo mai mamuali, sei te si tou si tumowa ngaran ni empung, sia si kalempot. ²² Ei kau tou israel, langane paila yaai, Yesus si tou nasaret, si tou nyai turu wia nantara niu, ni empung kaampit tanda maka erangen, mujisat - mujisat, wo tanda - tanda, nyai nong lohomei ni empung tunantara niu witu nisia, tanu mong kinailekan niu mong sandiri. ²³ Yesus yaai si nyai serakan kumiit rencana nyai nong tantumei, pangatahuan ni empung riorako, wunuun niu kaampit sumalip nisia witu lawas ne tou durhaka. ²⁴ Taan si empung si timoorei nisia wo meta nisia, witu kasusaan patean, ka ndaai mungkin wia nisia si kuasan patean. ²⁵ Ka si daud si limilaamong, kumura si Yesus:nyaku limoho si empung siwitute rioreku, ka nisia siwitu leleoseku makar nyaku kuraan kahoge. ²⁶ Niitung, nateku mapela - pela, wo lilaaku, mapaa - paar, wo nawak - eku mena witu pengharapan ²⁷ Ka nikou raai tumelaau si mukur - eku witu gorem tampa ne tou minate kaapa maya mako nawak ni tou kudus - emu lumoho patean. ²⁸ Nikou limilaamong wia nyaku lalan penou - nouan, nikou sumiwo nyaku, wuta ong kapaaran kaampit gio mu. ²⁹ Patuari - patuari, nyaku toro maila wia nikau kaampit kayakinan ka sibapa tu'a rioreta daud, sia si minatemong wo kinuburou, wo kuburena wiape mawalio nikita makar tarekan. ³⁰ Niitumong, ka nisia, si tou nabi wo makailek ka si empung si kimawarou kaampit sumpah wia nisia, rumu humun si esa witu setaranak - ena tu natas tahta na. ³¹ Niitumong si daud si limohomong nyaai katare, sia sumirita kumura si Yesus tu moorei sumaup, ka: nisia si raai telamu witu tampa ne tou minate, wo nawakena ndaai maapu. ³² Yesus ou tiin si nyai toorei ni empung wo nikai waya mineren waya witu pakasaan mina muali yaai. ³³ Niitumong, kararakekena o lawas leleos ni empung wo tumerima nyai kawar ni bapa kumuru si roh kudus tiin, nisia si minalusomei niitu, wo tanumong linoho niu kaapa lininga niu ³⁴ Ka si daud raai simeret na surga, taan nisia sandiri si limila:si empung lumila witu se tuaneku, rumu humun witu sangaweka leleoseku. ³⁵ Makar nyaku sumiwo se kasaru - kasaru mu mamuali leleekang nae mu. ³⁶ Niitu mong, maanong pakasaan mbale israel makai lek karengan ka si empung si si miwomong nisia empung wo Kristus, siamong si Yesus si nalip niu. ³⁷ Kalilinga neate nyaai, ri mundek nate nea, wo sea lumila witu si petrus wo se rasul walina:patuari - patuari, sapa mong toro siwon nai?. ³⁸ Wo petrus lumila wia nisea:matubatou, wo ako lendem nawak niu sandiri, witu ngaran ni Kristus Yesus, mamuali ampungan witun dosa - dosa niu, wo kau, kautumerima, karunia roh kudus. ³⁹ Ka nyai kawar niitu wehe nikau, wo se oki niu, wo witu se tou se roou pe kalakeran ni empung eta tumoaamei. ⁴⁰ Wo kaampit nyai lilalina, petrus sumaksi, kaampit - kaulitan wo lumila wia nisea:lempotako nawak niu, wim se tou reko tiin. ⁴¹ Setou se timerima nyai lila ni petrus, se nyai lendem wo nendo niitu sekiawesan tou woo telu ngariwu, kalakerana.

Paesaan ne tou - tou mapercaya

⁴² Nisea semaulit karengan witu pangajaran rasul - rasul wo tunggorem pinaesaan, witu gorem memete - mete roti wo witu gorem sombayang. ⁴³ Wo kaindean mako mai witu natas ne tou, wo laker makaerangen wo tanda - tanda mamuali, siwon ne rasul - rasul. ⁴⁴ Pakasan se mapercaya se merur mawali - wali, wo makaindo pakasaan mawali - wali. ⁴⁵ Wo sea mako mangker pakasan taintu nea, wo itu pemete - metengen nea witu setou, kiit kapaaran nea sandiri - sandiri. ⁴⁶ Susur nendo, kaampit se minaesaanong nate, sea merur mawali - wali witu wale ni empung wo memete - mete roti witu bale esa mako witu bale malina, nisea se tumerima ka ka - nen nea kaampit ma paa - paar wo nate leos. ⁴⁷ Kaampit nisea meloo - loor si empung, wo sea mamuali kapaar karengan ne laker tou, wo susur nendo si empung mawasei kalakeran netou, sea mong setou nyai lempotei.