Pasal 15

Pinahilekkan Witu Yerusalem 1 Niituu sepira tou se timumpamei tu yudea, mai majar se patuari - patuari esa iman, "sa kau raai sunaten, kiit kanaramen nyai wehe ni musa nikau, kau raai ka lempot. 2 Wo mamuali mako kasumelokan wo maindoan ndaai te oki, tu nantara si Paulus, Barnabas o se tou - tou tiin, sea mutusako kasi Paulus osi Barnabas kaampit sepira tou walina wia nisea, se pakiwehen mako tu Yerusalem mako mahilekan o se rasul wo sepenatua, nyai kawaakes witu pinaselokan yaai. 3 Wo sea antaren tu lalan, ne tou - tou jamaat, tu pakelangan nea, sea lumawetako fenisia o samaria kaampit masirita mako kaulitan kumura partobatan ne bangsa - bangsa waling, wo nyaai minamuali kapaaran karengan wia nisea patuari esa iman. 4 Kaayo mako sea tu Yerusalem, sea sungkulenei ne jamaat - jamaat, serasul - rasul wo se penatua - penatua, wo sirita neamako pakasaan siniwomomei ni empung wia nisea. 5 Taan se wou pira tou sewia golongan farisi, se mapercayamong tumoorei kaampit lumila : paindon karengan, masusunat nisea, wo merenta nisea kiiten nulit likum ni musa. 6 Se rasul wo se penatua minerur mawali - wali simirita pengindo - ngindoan tiin. 7 Maapa mako mengindo - ngindo labot tiin, watume, petrus tumoorei lumila wia nisea patuari - patuari, kailekan niu ka witu noras rior, si empung si simiwomong sisiran, wia nantara niu ka kaampit lumalan wia suma - ku, se bangsa - bangsa walina se luminga nahabar ninjil wo mamuali percaya. 8 Wo, empung makailek nate netou, simaksi mong wia nisea, kaampit minehemei roh kudus wia nisea, tanu siniwo namong wia nikita. 9 Wo sia si raai menisir wia nantara nikita wo nisea, witu sia mineresipe nate nea kaampit iman. 10 Niitumong kaakau paar mawawaawa si empung kaampit meta mako kawuteran tiin witu lehe nemurid - murid, leos be tu'a - tu'ata rior kaapa nikita sandiri, ta raai kaako mawuwuleng niitu? 11 Taan, nikita mapercaya, ka kita nyai kalempot witu anugerah empung Yesus tanuakan kahai ni sea. 12 Wo pakasaan se minerur tiin nyai kapenes wo sea malinga si barnabes o si paulus, se materang pakasa tanda wo mukjisat, siniwomei ni empung lumalan wia nisae witu nantara bangsa - bangsa walina. 13 Maapa mako sea masirita, Yakobus mingkotei, "patuari waya lingane aku" 14 Simon si timerangou kumura si empung, timuureemei katare - tare siminehemong ate witu se bangsa - bangsa walina, ka maindo witu nantara sebangsa tiin, mawuali umat witu ngaran - ena. 15 Penggila - ngila ne nabi - nabi semapaar nyaai, tanu nyai patik : 16 Tumondongako nyaai, nyaku ku marengei, wo sumiwo sumaup kemah Daud nyainong karombe, nyaku ku mangun sumaup minatelaan witu, mo nyaku tumuuntul sumaup niitu. 17 Rior se tou nyai katelaan toro sumero si empung, wo paasaan se bangsa walina si tinowa witu gorem ngaraneku, si simiwo nyaai waya, firman empung si simiwo pakasaan nyaai. 18 Kinailekanong timuureemei witu katare - tare karengan. 19 Niitumong, nyaku lumilaame sakita raatoro madepeendis se tou - tou bangsa walina se minarengomei witu si empung. 20 Taan nikita paindon karengan matikako witu nisea rior nisea rumooumako nawak nea witu ki nasemboranong berhala - berhala, wo witu dosa dosa makaawuan, kaampit sapate niitu kinerekan wo wia daha. 21 Ka timuuremei rior, si musa si wewehan witu nesa - nesa kota, se tou - tou mahabar nisia, ka patoniei witu sinagoge - sinagoge witu nari - nari sabat.

Surat Witu Setou Percaya Seraai Yahudi
22 Wo palolohon geleos ne rasul - rasul o se penatua wo pakasaan jamaat, sumisir tou - tou witu nantara nea si reho mako witu Antiokhia, mawali si paulus osi barnabas, sea rumeho si yudas si patowaan barsabas, kaampiten ni silas se manali - ali sepatuari - patuari esa iman, 23 Wo sea matikako witu surat kaampit lawas nea ta naai : "wia se rasul - rasul wo penatua - penatua, patuari -patuari esa iman, wehe nikau waya patuari raai yahudi tu Antiokhia wo siria, kiliku, noormat! 24 Ka kai limingamong ka sepira tou wia nantara nai, wo witu nisea nikau raai minerentamako, ri maungo nikau kaampit paila nea, minohoge mukuremu. 25 Nyaai palolohan geleos wia nikai, wo kai minahandianong, masisisir tou - tou wo rumeho nisea mai wia nikau, mawali - wali patuarinai si kaupus nai, barnabas o si paulus, 26 Si minehemong penou - nouanea wia nikau ka ngaran ni empung eta. Kristus Yesus. 27 Niitumong, kai rumeho si Yudas wo si silas, rior nisea te semange lumila pakasaan masuat wiate suma nea. 28 Ka, geleos karengan wia si roh kudus, wo wia nikai maweweta kawuteran wia natasemu, ndaai kasa wuter witu pa perlun yaai. 29 Ka nikau rumoou momei nawak niu witu sapa nyainong sembah witu si berhala wo witu ndaha, wo sa sapate niitu si pinate kinerekan, wo witu ndosa - dosa maka kaawuan. sakau jumaga nawak niu sandiri wia paila yaai, nikau masiwo geleos "makar mahilekan". 30 Matalikurako sea, o sea tumumpa witu Antiokhia, wo kaerurakosea sijamaat sea sumerakanako surat tiin. 31 Ka totondei nea mako surat tiin, sea semapaa - paar karengan kaseaniiborei niitu. 32 Yudas o si silas, nisea tiin se nabi, kumetewo mente se patuari - patuari esa iman wo laker nyai lila. 33 Wo nisea se minena witu wo pira ngaendo, se tua - tua percaya tiin metamako nisea mareng kaampai damai witu se tou - tou rimehomei nisea. 34 Taan geleos wia si silas menaape wanape. 35 Taan si paulus wo si barnabas minena witu Antiokhia, si manajar wo mahabar firman ni empung mawali - wale se laker tou.
Paulus Wo Si Barnabas Minatelauan
36 Kumelangako pira ngaendo, Paulus lumila witu si barnabas : "maimong ta mareng wo ta mako lumoho se patuarita esa iman witu kota, tampata minahabar firman ni empung, mako maloloho kumura sea tarekan. 37 Barnabas kahai paar maali si yohanes patowaan markus. 38 Taan, paulus ma genang ka ndaai geleos si tou, timelaumong nisea witu pamfilia, wo raai minange mawali - wali witu paayangen tiin. 39 Wo mawuali mengindo - ngindoan tarem makar sea matelaauan esa wo si esa Barnabas minali si markus, sumengkot mako witu siprus. 40 Taan si paulus simisir ako si silas wo mange, wo sea serahkan ne patuari - patuari esa iman witu gorem Anugerah ni empung. 41 Wo sia lumawetako siria wo kilikia kaampit makete se jamaat - jamaat.