¹ Wakazwa kokulya akuza kudolopo lyakumizhaabo, alimwi bashiciya bakwe bakamucilila. ² Nsabata niyakashika, wakaisha musinagogo. Mbantu baanji bakamuteelela alimwi bakadabbwa. Bakaamba, "Nkuli kwakazhijana injisho inzhi?'' ''Maano zhi aaya ngaakapewa?'' ''Malele zhi aaya ngacitaa amanza aakwe?'' ³ '' Sa uyu tashi mubezhi, mwaana maliya alimwi munyina Jakobo a Josesi alimwi Juda a Simoni? Sa bacizhi bakwe tabako apa?'' Bakanyemezhewa a Jesu ⁴ Ono Jesu wakababila,'' Mushishimi taaku utacite bulemu, cita kuchisi cakumizhabo alimwi akubamukowa akubang'anda yaakwe.'' ⁵ Kaatacikozhi kucita ncito inene, cita boo kutandabika lyaanza abantu bashoto balwazhi akubaponya. ⁶ Wakakankamanizhiwa kutashoma kwaambo. Aano wakaya mumizhi kuya buisha. ⁷ Aano wakaita bali ikumi ababili akutalika kubatuma bobile-bobile, alimwi wakabapa ng'unzu kumyuya itasalali, ⁸ akubalailila kwaba batabwezhi cili coonse mulweendo lwaambo. Ncita boo nkoli-kakutaku cikwa, kakutaku coola, alimwi kakutaku amaali mukomwe nzhabo- ⁹ pele bo kusama nkwabilo, alimwi kakutaku kusama zhibaki zhobilo. ¹⁰ Wakaaba kulimbabo,''kufwubwa mwanjila mung'anda, mukale kushikila mwaakuzwa. ¹¹ Kufwubwa dolopo litashi mutabule nakuba kutamunyufwa, ono mwazwa kubusena ukoo, mukunkumune lusuko kumyeendo zhanu buli buboni kuli baabo.'' ¹² Bakaya bukabauka kwaaba bantu baaleke bubyabi bubato kucita. ¹³ Bakatanda madaimona manji, bakananika bantu baanji baciswa amafwuta akubaponya. ¹⁴ Mwami Heloda wakatelela, lizhina lya Jesu lwakaba ampuwo. Bamwi bakalinga kwaaba,'' Johani mubabatizhi wabushiwa kuzwa kubafwu, ncecinco ici ng'unzu zyamalele zhito kubeleka muli nguwe.'' ¹⁵ Bamwi bakaba,'' Ngu Elija.'' Nakuba bamwi bakaba,'' mushishimi, buuli bashishimi bakalekale.'' ¹⁶ Pesi ono Heloda nakatelela wakaaba,'' Johani, ngunda kakosola mutwi, wabushigwa.'' ¹⁷ Nkaambo Heloda wakatuma kwaaba Johani anjatwe, angwe abikwe mutolongo akaambo ka Helodiasi [ Mwanakazhi wakalinga wa Philipo], Nkaambo wakalinga kumutwele. ¹⁸ Nkaambo Johani wakaabila Heloda,'' Tauli mulawo kwaba ati ubweze mwanakazhi wamunyoko.'' ¹⁹ Pesi Helodiasi wakamukalalila akuyanda kumunjaya, pesi takacikozha, ²⁰ nkaambo Heloda wakali kumutija Johani; wakalinga kuzhi kwaabo ati muntu ululeme alimwi usalala, alimwi wakamubaba kabontu. kumutelela bo cakamukalalisha maningi, kakuli wakalinga kumutelela cakukondwa. ²¹ Cakashika ciindi cakusekelela kuzuba bwakuzhalwa bwa Heloda alimwi wakapanga ipobwe lyaba lunene-nene alimwi abashilutwe babashikalumaba, abasololi baku Galili. ²² Mwanakazhi mushoto mwana wa Helodiasi wakajila alimwi akubazhanina, wakakondelezha Heloda abatabwe. Mwami wakaaba kumwanakazhi,'' Nkoodoba kufwubwa cunyanda alimwi ndacipa kuli nduwe.'' ²³ Wakalubila akwaaba,'' kufwubwa cuuka dooba, ndakupa, kushikila akati kabwami bwaangu.'' ²⁴ Waakaya akubashimina banyina,'' saamulombe nzhi?'' Wakaamba,'' muntwi wa Johani mubabatizhi.'' ²⁵ Wakanjoka cakufwabana kumwami, akumulomba, waaba,'' ndayanda kwaaba mupe, awa peeka, muntwi wa Johani mubabatizhi abale yakubeza.'' ²⁶ Nokuba boobo wakashupikana mwami, takacikozha kukaka kulomba kwaakwe nkaambo kakushomezha kwakacita alimwi akaambo kabatabe. ²⁷ Mwami wakatuma shikalumaba kuzwa kubakwabilizhi bakwe akumulailila kwaamba amuletele muntwi wa Johani. Mukwabilizhi wakaya kutolongo akumukosola muntwi. ²⁸ Wakaleta muntwi abale akumupa mwanakazhi, mwanakazhi wakapa banyina. ²⁹ Aano bashiciya bakwe nibakatelela, bakanza akuubweza mubili akuubika mucuumbwe. ³⁰ Batumwa bakanjoka kuli Jesu akumwabila zhoonse zhibakacita akwiisha. ³¹ Wakabaabila,'' kamuzwa muze munjile mumatongo akupumuna ciindi cishoto.'' Nkaambo baanji balikujila akuzwa, alimwi kabatacite aciindi cakulya. ³² Aano bakaya abwaato kumatongo beene. ³³ Pesi bakababona kabazwa alimwi baanji bakabazhiba, alimwi bakabalikila atomwi amyeendo kuzwa mumadolopo, aano bakashika balo kabatana akuhika. ³⁴ Nibakashika kweeleela mulonga, wakabona buunga inene amana wakabafwila nkubu nkaambo bakalinga buuli belele zhitacite mwembezhi. Ono wakatalika kubaisha zhitu zhinji. ³⁵ Ciindi nicaama bashikwiya baakwe bakaza akwaamba,'' ubu busena bwamatongo aciindi camana. ³⁶ Atubatume kwaaba baaye muminzhi iili pafwafwi bakaule zhakulya zhaabo.'' ³⁷ Pesi wakavwila akwaaba kulibabo,''amubape zhaakulya.'' Bakaaba kulinguwe,'' saa inga twaaya kuula zhikwa zhishika kumyanda yobile ya Dinali akubaapa balye?'' ³⁸ wakaaba kuli baabo,''zhikwa zhongaye zhimucite? kamuya mukabone.'' Nibakazhiba, bakaba,''zhikwa zhosanwe a nswi zhobilo.'' ³⁹ Wakalailila kwaaba bantu boonse bakale panshi muzhibela pabwizu bushukile. ⁴⁰ Bakakala muzhibela zha mwanda amakumi ali osanwe. ⁴¹ Wakabweza zhikwa zhosanwe answi zhobilo, akulanga kujulu wakacileleka akukomona zhikwa alimwi akuzhipa kubashiciya kwaaba bape bantu. Alimwi wakaadanya nswi pakati pabo boonse. ⁴² Bakalya boonse akukuta. ⁴³ Bakabweza zhikwa zhikomauninwe, kushikila mataanga ali ikumi awobilo akazula, alimwi azhibela zha nswi. ⁴⁴ Bakakuli zhyuulu zhosanwe zhyabalobwana bakalya zhikwa. ⁴⁵ Mukufwabana wakalenga bashiciya bakwe kujila mubwaato akuya ababo kulubazu lumwi, ku Betisaida, kakuli watuma buunga. ⁴⁶ Nibakaya, wakaaya kumulundu kupaila. ⁴⁷ Mashiku akaaza, alimwi bwaato bwakalinga pakati pa lweenge, walo wakalinga eenka panyika. ⁴⁸ Wakababona kabazundwa amayuwe, nkaambo muuwo wakabazunda. Kumacela wakanza, kaeenda palweenge, alimwi wakalinga kuyanda kubaindilila. ⁴⁹ Pesi nibakamubona kaeenda palweenge, bakayela ati abweni kali shikazwa, ⁵⁰ so nkaambo bakamubona akuyoowa. Mukufwabana wakabandika kuli mbabo akwaaba,'' amuyume! ndime! mutayoowi!'' ⁵¹ Wakanjila mubwaato ambabo, muwo wakacileka nkuunga. Bakakankamana. ⁵² Nkaambo tibakacikozha kuzhiba zhikwa cizhakali kwaaba. Pesi myoyo yabo yakayuma. ⁵³ Nibakalanduka, bakashika kucooko ca Genesalete akubushiya ⁵⁴ bwaato.Nibakazwa mubwaato, bantu bakamuzhiba peeka-peeka, ⁵⁵ akutalika kulukaakila mumasena oonse akutalika kuleta balwazhi apasa zhabo kufwubwa kubatelela kwabele. ⁵⁶ Kufwubwa anjila mumuzhi, mudolopo, nakuba mucishi, bakalinga kubika balwazhi mumishika. Bakalinga kukobelezha kwabati bajate kumoobe wacikobela cakwe, alimwi baanji bakamunjata bakalinga kuponezhewa