3

¹ Э, малпаськыны быгатӥсьтэм галатъёс! Малы тӥ шонерлыкез палдур( урдэс) кариськоды, кин тӥледды ведназ? Тӥ тодӥськоды вал ини, асьтэос адӟем кадь, кортӵогам Иисус Христосэз.

² Тани мае юаме потэ тӥлесьтыд: тӥ Духез басьтӥды законлэсь ужъёссэ быдэсъяса яке Инмарлы осконэз валэктэмен? .

³ Тӥ сокем шат малпаны быгатонтэмесь, духен кутскиды, нош мугорын быдэстӥды?

⁴ Шат тӥ юнме гинэ курадӟиды? Юнме гинэ медаз луы вал!

⁵ Законэз быдэстэмды понна яке Ӟеч Иворэз кылыса, Инмарлы оскемды бере, Со сётэ тӥледлы Духсэ но кужыменыз тырше тӥ пушкын?

⁶ Авраам Инмарлы оскиз но солы со лыдъяськиз шонерлыкен.

⁷ Озьыен тодэлэ, Инмарлы оскисьёс – Авраамлэн нылпиосыз луо.

⁸ Святой Писаниын, азьласянь тодыса гожтэмын, Инмар оскон пыр шонере потоз язычникъёсты, Авраамлы таӵе ивор верамын :"Тон пыр благословлятся карисько вань калыкъёс".

⁹ Озьыен, Инмарлы оскисьёс благословлятся карисько оскымон Авраамен.

¹⁰ Нош ваньмыз, кин оскиськыса улэ законлэн ужъёсыз вылэ, каргам улын уло, уго гожтэмын: "Котькудӥз адями каргамын, кин ялан ваньзэ уг быдэсъя, мар гожтэмын законлэн книгаяз".

¹¹ Нош законэз быдэсъяса нокин но оправдаться кариськыны Инмар азьын уз быгаты, валамон луэ, уго шонерлыко адями осконэн улоз.

¹² Нош закон осконъя ӧвӧл, кин быдэсъя сое, со соин ик улоз.

¹³ Христос мозмытӥз асьмеосты законлэн каргамысьтыз, асьмеос понна Ачиз каргам луиз, уго кызьы гожтэмын: «Каргамын котькудӥз, кин писпуын ошиське».

¹⁴ Христос дун тырыса басьтӥз асьмеосты Авраамлэн благословениез мед вӧлмоз шуыса Со пыртӥ язычникъёс вылэ но, асьмеослы, ӵектэм Духез, осконэн басьтон понна.

¹⁵ Вынъёс! Куке калыкъёслэн улоназы завещание, адямиен юнматэмын ке, нокин но сое уз вошты но номыр но отчы уз ватса.

¹⁶ Нош Авраамлы но солэн выжыезлы кыл сётэмын вал. Верамын ӧй вал «выжыосызлы», тросэзлы ӧвӧл, нош одӥгезлы «тынад выжыедлы», кудӥз Христос луэ.

¹⁷ Мон верасько со сярысь: ньыль сю куамын ар ортчем бере лыктэм закон, Инмарлэсь азьласянь Христос сярысь юнматэм заветсэ, Солэн сётэм кылыз медам быдэсмы шуыса, кулэтэм уг кары.

¹⁸ Нош наследство законъя ке, соку кыл сётэмъя ӧвӧл ини. Нош Инмар сётӥз сое Авраамлы кыл сётэмъя.

¹⁹ Малы бен соку кулэ закон? Со сётэмын берлогес калыкъёслэн сьӧлыкъёссы сэрен, Авраамлэн Выжыез лыктытчёзь, Кудӥз сярысь кыл сётэмын. Закон сётэмын вал ангелъёс пыртӥ посредниклэн киыныз.

²⁰ Нош посредник одӥг палаз гинэ уг луы, нош Инмар одӥг.

²¹ Мар бен соку, закон пумитъяське Инмарлэн кыл сётэмезлы? Озьы ӧвӧл! Сётэмын луысал ке закон, кудӥз улон сётыны быгатэ, соку зэм ик шонерлык луысал законлэсь.

²² Нош Писание вера ваньзы сьӧлыкесь, кыл сётэм кузьмамын мед луоз шуыса Инмарлы оскисьёслы Иисус Христослы оскон пыртӥ.

²³ Нош оскон вуытчёзь ми вал законлэн пытсэт улаз, со дырозь, ку усьтӥськыны кулэ оскон.

²⁴ Озьыен, асьмеос понна закон вал Христослэсь азьло - дышетӥсь, милемлы оправдаться кариськыны осконэн.

²⁵ Нош оскон вуэм бере ми дышетӥсь улын ӧвӧл ини,

²⁶ уго тӥ ваньды Инмарлэн нылпиосыз луиськоды Иисус Христослы осконъя.

²⁷ Тӥ ваньды, Христос пушкын крестится кариськемъёс, Христосэн дӥсяськиды.

²⁸ Ӧвӧл ни иудей но, еллин но, раб но, свободной но, пиосмурт но, кышномурт но, - уго тӥ ваньды одӥго Иисус Христос пушкын.

²⁹ Нош тӥ Христослэн бере, соку тӥ Авраамлэн выжыосыз но кыл сётэмъя наследникъёсыз луиськоды.