4

¹ Озьые, мон, Кузё-Инмар понна пытсэт улын, сюлворыса курисько тӥледды ярамон луэ ӧтем нимлы, кудаз тӥледды Инмар ӧтиз,

² зибыт но востэм, кема чиданэн но лякыт мылкыдын ог огдэс яратыса улэ,

³ тырше ог огеныды тупаса но одӥг духен герӟаськыса улыны.

⁴ Одӥг мугор но одӥг дух, кызьы тӥ но тӥляд нимдылы ӧтемын одӥг гинэ оскиськонлы,

⁵ одӥг Кузё-Инмар, одӥг оскон, одӥг крестится кариськон,

⁶ одӥг Инмар но ваньмызлы одӥг Атай, Кудӥз ваньмыз вылын но ваньмыз пыр, ваньмылэн асьмеослэн пушкамы.

⁷ Асьмеосмылы котькудмылы Христослэн кузьыменыз сётэмын благодать.

⁸ Соин ик верамын:" Ӝутскиз вылӥе но, пленэ кутӥз но кузьымъёс кузьмаз калыкъёслы".

⁹ Нош "ӝутскиз" шуэм мае возьматэ, сое ке уг, Со азьло но пе васькалляз музъемлэн пыдэсказ?

¹⁰ Улӥе васькыса, Со ик, тырмытыны ваньзэ, ӝутскиз вань инъёслэсь вылӥе,

¹¹ Но Со ик одӥгъёссэ апостолъёсын, мукетъёссэ пророкъёсын, Ӟеч Ивор ивортӥсьёсын, черклэн кивалтӥсьёсыныз но дышетӥсьёсыныз пуктӥз,

¹² чылкытатыны святойёсты тыршонлы, Христослэсь мугорзэ кылдытыны,

¹³ отчёзь: ваньмы одӥг осконэн луытчёзь но Инмарлэсь Пизэ тодытчёзь, асьмеос но Христослэн тырмыт аресозяз быдэ вуытчёзямы,

¹⁴ отӥяз но медам луэ шуыса пичинуныос кадесь, шонаськыса но солань талань ветлыса катькыӵе дышетонъё тӧлъёссылэсь, кудъёсыз пельто кескич но асьсэлы гинэ пайда поттӥсь но пӧялляськись адямиослэсь.

¹⁵ Нош зэмлыкез яратонэн ивортыса, котькудӥз мед будомы Со пушкы, Кудӥз луэ Йыр - Христос,

¹⁶ Кудӥзлэсь вань мугор юнматыса люкаське но герӟямын олокыӵе но герӟетъёсын, но мугорлэн котькыӵе люкетъёсыз быдэсъяло асьсэлэсь ужзэс, ачиз ас пушказ яратоназ будыса.

¹⁷ Соин ик мон верасько но Кузё - Инмар пушкын ивортӥсько, тӥ эн улэ озьы ик, кызьы ярантэм малпанъёсын уло мукетъёсыз калыкъёс,

¹⁸ визьзы пеймытомем дыръязы, тодынтэмзы сэрен но сюлэмъёссы лекомемен соос Инмарлэн улонэзлэсь палэнтэмын.

¹⁹ Соос котькыӵе возьдаськонэз шӧдӥсьтэм луыса, азон - калгон сьӧлыке сётӥсько но котькыӵе кырсь ужъёсты тырмостэмъяськыса лэсьто.

²⁰ Нош тӥ мукет сямен тодӥды Иисусэз,

²¹ уго тӥ Солэсь кылӥды но Со пышкын дышетскиды,- уго зэмлык Иисус пушкын,-

²² пӧяськон мылпотэмъёсын бырись вужмем вашкала адямидэс палэнэ куштыны,

²³ нош выльдӥськыны выль адямилэн духеныз

²⁴ но дӥсяськыны выль адямиен, кудӥз Инмар кадь лэсьтэмын шонерлыкен но святой зэмлыкен.

²⁵ Соин ик, шонертэмзэ палэнэ карыса, котькудды вералэ зэмлык асьтэлэн матысьтылы, уго тӥ ог огдылэн люкетъёсыз луиськоды.

²⁶ Вожпотыса сьӧлык эн лэсьтэ: шунды но медам пуксьы тӥляд вожпотонады,

²⁷ но дьяволлы инты эн сётэ.

²⁸ Кин азьло лушкаське вал, отӥяз озьы эн ни лэсьты, нош ужа, аслад киыныд ӟечсэ лэсьтыса, кулэяськисьёслы мар ке но люкыса сётыны быгаты.

²⁹ Тӥляд ымысьтыды нокыӵе но урод кыл медам поты, нош ӟечез гинэ, осконэз юнматонн понна, верам кылды мед сётоз шуыса кылзисьёслы благодать.

³⁰ Но эн ултӥялэ Инмарлэсь Святой Духсэ, Кудаз тӥ искупить карон нуналлы печатен пусъемын.

³¹ Котькыӵе керӟегъяськонъёс но вожпотонъёс, вожомонъёс но кесяськонъёс, урод кылъёсын вераськонъёс тӥ дорысь палэнтэмын мед луозы,

³² нош ог огдылы ӟечесь но жалясесь луэ, прощать каре ог огдэс, кызьы Инмар но Христос пушкын простить кариз тӥледды.