5

¹ Озьыен, Инмарлэсь адӟем карыса улэ, уго тӥ Солэн яратоно пиналъёсыз,

² но яратыса улэ, кызьы Христос асьмеды яратӥз но Ассэ кортӵоганы сётӥз ми понна но ческыт зыно, Инмарлы ярась жертва ваиз.

³ Нош азон - калгог но котькыӵе кырсь улон но тырмостэм потон тӥ пӧлын тодады но ваемын луыны кулэ ӧвӧл, кызьы святойёслы лэсьтыны уг тупа.

⁴ Озьы ик возьыттэм выронъёс, супыльтонъёс но урод серемкылъёс тӥледлы кулэ ӧвӧл, со интые благодарить каре.

⁵ Озьыен тодэ, нокыӵе но калгись яке кырсь ужъёс лэсьтӥсь, яке тырмостэм адямилы, кудӥз идолъёслы служить карись луэ, уз быгатэ Инмарлэн но Христослэн Царстваяз наследник луыны.

⁶ Нокин но медам пырты тӥледды пӧяськонэ тырттэм кылъёсын, уго со понна пумитъяськись пиналъёслы Инмарлэн вожпотонэз лыктэ.

⁷ Озьыен эн луэ соослы юлтошъёсын.

⁸ Куке-но тӥ но пеймыт вал, нош али - Кузё-Инмар пушкын югытъёс. Луэ югытлэн пиналъёсыз кадь,

⁹ уго Духлэн емышез луэ котькыӵе ӟечлыкын, шонерлыкын но зэмлыкын.

¹⁰ Эскере, мар Инмарлы ярано луэ,

¹¹ но эн пыриське пеймытлэн емыштэм ужъёсаз, нош ӟечгес луоз со ужъёсты шарае поттӥды ке,

¹² уго мае соос лушкем лэсьто, вераны но возьыт.

¹³ Нош ваньмыз шараемез югытлэсь адӟымон луэ, озьы ик ваньмыз, адӟымон луэмез, югыт луэ.

¹⁴ Соин ик верамын:"Султы изись, кулэмысь улӟы но, Христос тонэ югыттоз".

¹⁵ Озьыен, учкелэ, сак кариськыса улэ, малпаськыны быгатӥсьтэмъёс кадь эн, нош визьмоос кадь,

¹⁶ дунъяса дырдэс улэ, нуналъёс кескичесь уго.

¹⁷ Соин ик валасьтэмесь эн луэ, нош тодыны тырше, кыӵе Инмарлэн воляез.

¹⁸ Но вина эн юэ, кудӥзлэсь азон-калгон потэ, нош тырмелэ Духен,

¹⁹ ог огдэс буйгатэ псаломъёсын но гимнъёсын но духовной кырӟянъёсын. Кырӟалэ но данъялэ сюлэмъёсады Кузё-Инмарез,

²⁰ ваньмыз понна котьку тау карыса Инмарез но Атаез асьмелэн Иисус Христос Кузёмылэн нимыз понна,

²¹ ог огдылылэсь кылзӥськыны тырше Христослэсь кышкаса.

²² Кышноос, кылзӥське асьтэлэн картъёстылэсь, Кузё-Инмарлэсь кадь,

²³ уго карт кышноезлэн йырыз луэ, кызьы Христос - Черклэн йырыз, но Со ик - мугорлэн Утисез.

²⁴ Нош, кызьы Черк кылзӥськыны кулэ Христослэсь, озьы ик кышноос кылзӥське картъёстылэсь ваньмаз.

²⁵ Картъёс, яратэ асьтэлэсь кышноостэс, кызьы Христос но яратӥз Черкез но сётӥз Асьсэ со понна,

²⁶ сое освятить карон понна, чылкытатыса кыл пыр ву мунчёын,

²⁷ пуктыны сое Аслаз азяз дано Черкен, кудӥзлэн ӧвӧл пятноез яке изъянэз, яке марке сыӵе ик уродэз, нош со святой но дун мед луоз.

²⁸ Пиосмуртъёс кышнооссэс яратыны кулэ, асьсэлэсь мугорзэс кадь. Кышнозэ яратӥсь асьсэ но яратэ,

²⁹ уго ӧвӧл нокин но, кин адӟемпотостэм каре аслысьтыз мугорзэ, нош сюдэ но шунтэ сое озьы ик, кызьы Кузё-Инмар Аслысьтыз Черксэ,

³⁰ уго асьмеос Солэн Мугорызлэн люкетъёсыз, Солэн мугорызлэсь но Солэн лыосызлэсь.

³¹ Соин ик кельтоз адями аслысьтыз атайзэ но анайзэ но лякиськоз аслаз кышноез борды, но луозы кыкъёс одӥг мугорен.

³² Та быдӟым ватэм: мон верасько Христос но Черк сырысь.

³³ Котькудды тӥ пӧлысь яратэ кышнодэс, асьтэосты асьтэос кадь, нош кышномурт кышка картэдлэсь.