3

¹ Мон, Павел, Иисус Христос понна пытсэт улэ пытсамын, язычникъёс понна.

² Кызьы тӥ кылылӥды вал Инмарлэн благодатезлэн коркапуктонэз сярысь, кудӥз мыным сётэмын тӥ понна,

³ уго мыным откровение пыр тодмо луиз лушкемез (кудӥз сярысь мон азьло вакчияк гожтӥ вал),

⁴ тӥ тае лыдӟыса, валаны быгатоды, мынысьтым Христослэсь лушкемзэ тодонме,

⁵ кудӥз тодмо ӧй вал азьло улӥсьёслы, нош али усьтэмын Солэн святой апостолъёсызлы но пророкъёслы Святой Духен,

⁶ язычникъёс но мед луозы шуыса сонаследникъёсын, одӥг мугор кылдытыса, но мед пырозы Ӟеч Ивор пыртӥ Солэн кылсётэмаз.

⁷ Инмарлэн благодатезъя, кудзэ Со мыным Аслаз кужыменыз сётӥз, мон Ӟеч Иворез ивортӥсь луи.

⁸ Мыным святойёс пӧлысь тужгес но покчиезлы, сётэмын благодать - Ӟеч Ивор вераны валаны быгатонтэм Христослэн узырлыкез сярысь

⁹ но усьтыны ваньмызлы, коркапуктонлэсь лушкемзэ, дыръёслэн кутсконысеныз, ваньзэ Кылдытӥсь Иисус Христос Инмарлэн пушказ ватэмзэ,

¹⁰ Инмарлэн пӧртэм визьлыкез табере мед тодмо луоз шуыса Черк пыртӥ инмысь кивалтӥсьёслы но властьёслы,

¹¹ азьло малпаменыз, кудзэ Со быдэстӥз асьмелэн Иисус Христос Кузёмы пыртӥ,

¹² Кудӥныз ми кышкатэк но оскиськыса оскон пыртӥ быгатӥськом Инмар доры лыктыны.

¹³ Соиник курисько тӥледды нырдэс эн оше мынам тӥ понна куректэмелы, кудӥз луэ тӥляд данды.

¹⁴ Со понна пыдесъяськисько Иисус Христос Кузёмылэн Атаез азьын:

¹⁵ Кудӥзлэсь котькыӵе выжылы инмын но музъем вылын ним сётэмын,

¹⁶ мед сётоз тӥледлы Аслаз данэзлэн узырлыкеныз юнматыны Солэсь Духсэ тӥляд пушкады,

¹⁷ осконэн пырыны Христослы тӥляд сюлэмъёсады,

¹⁸ куке тӥ пушкы яратон выжы лэзёс но юнмалоз, мед быгатоды тодыны вань святойёсын ӵош Христослэн яратонэзлэсь пасьталазэ но кузьдалазэ, мурдалазэ но ӝуждалазэ,

¹⁹ но валаны, валаныбыгатонтэм Христослэсь яратонзэ, ми мед тырмомы шуыса Инмарлэн вань тырмытонэныз.

²⁰ Нош Кин асьмеос пушкын тырше Аслаз кужыменыз быгатэ лэсьтыны уката но троссгес солэсь, мае ми куриськомы но мар сярысь малпаськиськом,

²¹ Солы дан Иисус Христослэн Черказ ваньмаз выжыосы даурысь дауре. Аминь.