2

¹ Тӥ, йыр ужъёс но сьӧлык лэсьтэмды сэрен кулэмын вал,

² со урод ужъёсын кудъёсыз пӧлын тӥ азьло улӥды, та дуннелэн сямъёсыныз, князьлэн воляезъя, кудӥз кузёяське омырын, дух, кудӥз туннэ тырше кылзӥськисьтэмъёслэн пиосаз.

³ Соос пӧлын асьмеос азьло ваньмы улӥмы мугорлэн мылпотэмъёсыныз, тырмылӥмы сьӧлык лэсьтон мылпотэмъёсын но малпанъёсын но вордӥськеммыя вожпотонлэн пиналъёсыз вал, мукетъёсыз калыкъёс кадь ик.

⁴ Инмар, кудӥз узыр милостеныз, Аслаз быдӟым яратонэныз, кудӥныз асьмеды яратӥз,

⁵ но милемды, йыр уж лэсьтэммы понна кулэмъёсты, улӟытӥз Христосэн, - благодатен тӥ утемын, -

⁶ но улӟытӥз Соин, но пуктӥз инмын Иисус Христос пушкы,

⁷ Иисус Христослэн асьмелы ӟеченыз возьматыны вуоно дауръёсын Аслаз благодатезлэсь мертаны быгатонтэм узырлыксэ.

⁸ Оскон пыртӥ благодатен тӥ утемын, нош утиськон тӥлесьтыд ӧвӧл - со Инмарлэн кузьымез,

⁹ тыршемдылэсь но ӧвӧл, нокин но медам ушъяськы шуыса.

¹⁰ Ми солэн кылдытэмез, лэсьтэмын Иисус Христос пушкын ӟеч ужъёслы, кудъёссэ Инмар косӥз милемлы быдэстыны.

¹¹ Озьыен, тодады возе, тӥ язычникъёс вал, кудъёссэ необрезаннойёс шуылӥзы, нош асьсэосты соос мугорзэс обрезать каремъёсын лыдъяллязы, кудъёссэ киын лэсьтылӥзы,

¹² тӥ со дыре Христостэк вал, Израильын улӥсьёслэсь палдур, кыдёкын вал кыл сётэмлэн заветэзлэсь, осконлыктэк улӥсьёс но дуннеын Инмарез тодӥсьтэмъёс вал.

¹³ Нош али Иисус Христос пушкын тӥ, кудъёсыз кыдёкын вал Солэсь, нош Христослэн вирез пыртӥ матын луиды.

¹⁴ Со - асьмелэн тупаса улонмы. Со кыкысь одӥг лэсьтӥз но куашкатӥз преградаез, кудӥз стенаен сылэ вал,

¹⁵ быдтӥз тушмонъяськыса улонэз Аслаз мугорыныз, нош заповедьлэсь законзэ дышетонэн, кыкысь Ачиз Ас пушказ лэсьтыны одӥг выль адями, тупаса улон вайыса.

¹⁶ Но одӥг мугорын тупатыны кыкназэсты ик Инмарен кирос пыртӥз но быдтыны соослэсь тушмонъяськон улонзэс.

¹⁷ Лыктӥз тупаса улон благовествовать карыны тӥледлы, кыдёкысьёслы но матысьёслы но,

¹⁸ уго Со пыртӥ, таосыз но мукетъёсыз но быгато лыктыны Атай доры одӥг Духен.

¹⁹ Озьыен, тӥ муртъёс ӧвӧл ни, кытыське лыктэмъёс но ӧвӧл, святойёсын ӵош улӥсьёсыз но Инмарлэн луиськоды.

²⁰ Тӥ пуктэмын апостолъёслэн но пророкъёслэн инъет вылазы, Ачиз Иисус Христос валтӥсь изэн тӥледлы луэ,

²¹ та из вылын вань строение, радысь радэ пуктыса, Кузё - Инмар пушкын святой храм луыса будэ,

²² кудӥз вылын тӥ но Духен кылдӥськоды Инмарлэн улонни интыеныз.