Маркас 3 бөлг.
1
2
1. Иисус дәкн синагогд Бурхна Суббот өдрлә ирв. Тенд хагсу һарта күн бәәҗ.
2. Буурхна Суббот өдр Иисус тер күүг эдгәнү аль угай гиһәд, гетәд суусн улс синагогд бәәсмн.
3
4
3. Иисус хагсу һарта күүнд келв: «Бос! Нааран һар, тал дунд зогс.»
4. Синагогд суусн әмтнәс Иисус сурҗ: «Бурхна Суббот өдрлә сә кеҗ болхий эс гиҗ му кеҗ болхий?» Зуг тедн тагчг бәәҗ.
5
6
5. Иисус ууртаһар теднүр хәләһәд, теднә хату зүркнднь үзәд зовҗ. Иисус хагсу һарта күүнд келв: «Һаран суңһ.» Тернь һаран суңһхла, һарнь дарунь эдгҗ одв.
6. Фарисеймуд һарад, Иродын улсла яһҗ Иисусин әмнь таслхин тускар күүндцхәв.
7
8
7. Зуг Иисус эврәннь сурһульчнртаһан теңгс тал йовҗ одв.
8. Иисусин ардас Галилеяс, Иудеяс, Иерусалимас, Идумеяс, Иордана телтр көвәһәс болн Тир, Сидон хойрин өөр бәәсн һазрмудас олн әмтн йовсмн. Эдн Иисус урднь ю кесинь соңссмн бәәҗ, тегәд олн әмтн Терүнүр ирцхәҗ.
9
10
9. Теңгсин көвәһәр йир дала әмтн хурад, дарцад бәәҗ. Тегәд Иисус бийән дарулшго төләд, эврәннь сурһульчнрт оңһц Бийднь белдтхә гиҗ закв.
10. Иисус урднь дала улс эдгәсинь соңссн гемтә улс Иисуст һаран күргхәр дарцлдад бәәсмн.
11
12
11. Хар сәкүснд авлгдсн улс Иисусиг үзхләрн, өмннь унҗ киисәд хәәкрцхәҗ: «Та Бурхна Көвүнт!»
12. Болв Иисус тенд келҗ: «Намаг Бурхна Көвүн гиҗ бичә күнд келтн.»
13
14
15
16
13. Иисус уул деер һарад, Эврән Бийүрн дуудв. Тедн Терүнүр ирв.
14. Тедн дундас Иисус арвн хойр сурһульч шүүҗ авв. Эн арвн хойр сурһульчан хамдан бәәхин төлә, Байрта зәңг олн әмтнд келхн төлә,
15. хар сәкүсдиг көөх йос өгхин төлә Иисус шүүҗ авсмн.
16. Иисус шүүҗ авснь: «Симон, Пётр гиҗ нерәдсн,
17
18
19
17. Иаков болн Иоанн, Зеведеин көвүд, Иисус тедниг «Воанергес» гиҗ нерәдсмн, тернь «Оһтрһун көвүд» болҗана,
18. Андрей, Филипп, Варфоломей, Матфей, Фома, Алфеин көвүн Иаков, Фаддей, Симон Кананит,
19. болн Иуда Искариот, Иисусиг хортна һарт бәрүлҗ өгсн.
20
21
22
20. Эдн герт орхла, тенд дәкн дала әмтн цуглрсмн, тегәд Иисус болн Терүнә сурһульчнрнь хотан идҗ чадсмн уга.
21. Иисус толһадан гемтә болҗ гисн зәңг элгн-саднь соңсад, Терүг авхар ирцхәҗ.
22. Иерусалимас ирсн дегтр бичдг улс Иисусин тускар иигҗ келсмн: «Иисус хар сәкүснд эзлгдв, тегәд Тер эрлгин чидләр шулмсиг көөҗ һарһҗана.»
23
24
25
23. Иисус тедниг дуудад, цецн келврмүдәр сурһв: «Эрлг яһҗ эврә бийән көөхмб?
24. Кемр орн-нутг дотран дәәхлә тиим орн-нутг хольврх.
25. Кемр герт бәәсн улс нег-негнләһән өшә көөһәд, нег-негән даҗрад бәәхлә – тер гер әңгрәд тарҗ одх.
26
27
26. Кемр эрлг эврә бийләһән дәәлдҗ көөхлә, эрлг дотрасн әңгрх, энүнә йосн хольврад чилх.
27. Чидлтә күүнә герт орад, зөөрнь булаҗ авхин өмн, герин эзиг бәрҗ авад күчкәд, тегәд герт бәәсн зөөрнь булаҗ авх.
28
29
30
28. Үнәр таднд келҗәнәв: «Әмтнд ямаран чигн цуг килнцсинь, му келлһинь тәвгдх,
29. Зуг Әрүн Сәкүсиг му келсн күүнә килнц төрүц тәвгдшго. Тер күн лавта зарһд орх-цаҗла харһх килнцән мөңкинд эдлх.
30. Иисус хар сәкүснд эзлгдв гиҗ дегтр бичдг улс келсн учрар, Иисус энүнә тускар иигҗ келсмн.
31
32
31. Иисусин экнь болн ахнр-дүүнрнь ирҗ. Эдн һаза зогсад, Исусиг дуудтн гиҗ сурцхаҗ.
32. Тер цагт Иисусин өөр олн әмтн суусмн бәәҗ. Терүнд келҗ: «Тана эктн, ахнр-дүүнртн болн эгчнртн һаза бәәнә, Таниг дуудҗана.»
33
34
35
33. Иисус эднд иим хәрү өгв: «Кен Мини экм болн Мини ахнр-дүүнрм?»
34. Иисус өөрән суусн әмтнүр хәләһәд келв: «Эн Мини экм болн ахнр-дүүнрм.
35. Юңгад гихлә кен Мини Теңгрин эцкин таал күцәснь, тер Нанд ахнр-дүүнрм болн эгчм, болн экм.»