1 ຢ່າຕັດສິນ ແລະພວກເຈົ້າຈະບໍ່ຖືກຕັດສິນ. 2 ເພາະວ່າພວກເຈົ້າຕັດສິນຄົນອື່ນຢ່າງໃດ, ພວກເຈົ້າກໍຈະຖືກຕັດສິນຢ່າງນັ້ນ ແລະ ພວກເຈົ້າຈະຕວງໃຫ້ເຂົາດ້ວຍເຄື່ອງຜອງອັນໃດ, ພວກເຈົ້າກໍຈະຖືກຕວງດ້ວຍເຄື່ອງຜອງອັນນັ້ນ. 3 ເປັນຫຍັງເຈົ້າຈຶ່ງຫຼຽວເຫັນຂີ້ເຫຍື້ອທີ່ຢູ່ໃນຕາພີ່ນ້ອງຂອງເຈົ້າ ແຕ່ໄມ້ທັງທ່ອນທີ່ຢູ່ໃນຕາຂອງຕົນເອງເຈົ້າບໍ່ຮູ້ສຶກ? 4 ດ້ວຍເຫດໃດເຈົ້າຈຶ່ງເວົ້າກັບພີ່ນ້ອງຂອງເຈົ້າວ່າ ‘ໃຫ້ຂ້ອຍເຂ່ຍຂີ້ເຫຍື້ອອອກຈາກຕາຂອງເຈົ້າ’ ແຕ່ເບິ່ງແມ, ໄມ້ທັງທ່ອນມີຢູ່ໃນຕາຂອງເຈົ້າເອງ? 5 ຄົນຫນ້າຊື່ໃຈຄົດເອີຍ! ຈົ່ງເອົາໄມ້ທັງທ່ອນອອກຈາກຕາຂອງເຈົ້າກ່ອນ ແລ້ວເຈົ້າຈຶ່ງໄປຈະເຂ່ຍຂີ້ເຫຍື້ອອອກຈາກຕາຂອງພີ່ນ້ອງຂອງເຈົ້າໄດ້ຢ່າງຊັດເຈນ. 6 ຢ່າເອົາຂອງບໍຣິສຸດໃຫ້ແກ່ໝາ ແລະ ຢ່າໂຍນໄຂ່ມຸກຂອງເຈົ້າໃສ່ຕໍ່ໜ້າຝູງໝູ. ຢ້ານວ່າພວກມັນຈະຢຽບຢ່ຳຖິ້ມເສຍ ແລະຈະກັບຄືນມາຈີກເຈົ້າອອກເປັນຕ່ອນໆ. 7 ຈົ່ງຂໍແລ້ວເຈົ້າຈະໄດ້ຮັບ. ຈົ່ງສະແຫວງຫາແລ້ວເຈົ້າຈະໄດ້ພົບ. ຈົ່ງເຄາະແລ້ວຈະເປີດໃຫ້ແກ່ເຈົ້າ. 8 ເພາະທຸກຄົນທີ່ຂໍກໍໄດ້ຮັບ, ທຸກຄົນທີ່ສະແຫວງຫາກໍຈະພົບ ແລະທຸກຄົນທີ່ເຄາະກໍຈະເປີດໃຫ້. 9 ຫຼື ໃນພວກເຈົ້າມີຜູ້ໃດແດ່ ຖ້າລູກຂໍເຂົ້າຈີ່ກ້ອນໜຶ່ງຈະບໍ່ໄດ້ເອົາກ້ອນຫີນໃຫ້ຕີ້? 10 ຫລື ຖ້າລູກຂໍປາ, ຈະບໍ່ໄດ້ເອົາງູໃຫ້ຕີ້? 11 ເຫດສະນັ້ນ, ຖ້າພວກເຈົ້າຜູ້ເປັນຄົນຊົ່ວຍັງຮູ້ຈັກເອົາຂອງດີໃຫ້ແກ່ລູກຂອງຕົນ, ແລ້ວພຣະບິດາເຈົ້າຂອງທ່ານຜູ້ຢູ່ໃນສະຫວັນຈະໃຫ້ຂອງດີແກ່ຜູ້ທີ່ຂໍຈາກພຣະອົງຫຼາຍກວ່ານັ້ນອີກຈັກເທົ່າໃດ? 12 ເຫດສະນັ້ນ, ສິ່ງໃດກໍ່ຕາມທີ່ພວກເຈົ້າຢາກໃຫ້ຄົນເຮັດຕໍ່ພວກເຈົ້າ ພວກເຈົ້າຈົ່ງເຮັດຕໍ່ພວກເຂົາເໝືອນກັນ ເພາະນີ້ແມ່ນກົດບັນຍັດ ແລະ ຄຳສັ່ງສອນຂອງພວກຜູ້ທຳນວາຍ. 13 ຈົ່ງເຂົ້າໄປທາງປະຕູແຄບ, ເພາະວ່າປະຕູກວ້າງ ແລະ ທາງກວ້າງນັ້ນນຳໄປເຖິງຄວາມຈິບຫາຍ ແລະ ມີຫຼາຍຄົນເຂົ້າໄປຕາມທາງນັ້ນ. 14 ແຕ່ປະຕູທີ່ນຳໄປສູ່ຊີວິດກໍແຄບ ແລະ ທາງກໍຍາກ ແລະ ກໍມີໜ້ອຍຄົນທີ່ຈະພົບທາງນັ້ນ. 15 ຈົ່ງລະວັງພວກຜູ້ທຳນວາຍປອມ ທີ່ມາຫາພວກເຈົ້າໃນຄາບຂອງແກະ ແຕ່ທີ່ຈິງແລ້ວພາຍໃນພວກເຂົາເປັນໝາໄນທີ່ໂຫດຮ້າຍ. 16 ພວກເຈົ້າຈະຮູ້ຈັກພວກເຂົາໄດ້ດ້ວຍຜົນຂອງພວກເຂົາ ຜູ້ໃດເກັບໝາກອະງຸ່ນຈາກຟຸ່ມໜາມ ຫຼື ເກັບໝາກເດື່ອເທດຈາກຕົ້ນໜາມ? 17 ໃນທຳນອງດຽວກັນ, ໄມ້ດີທຸກຕົ້ນກໍເກີດຜົນດີ ແຕ່ຕົ້ນໄມ້ບໍ່ດີກໍເກີດຜົນບໍ່ດີ. 18 ຕົ້ນໄມ້ດີຈະເກີດຜົນບໍ່ດີບໍ່ໄດ້ ຫຼື ຕົ້ນໄມ້ບໍ່ດີຈະເກີດຜົນດີກໍບໍ່ໄດ້. 19 ຕົ້ນໄມ້ທຸກຕົ້ນທີ່ບໍ່ເກີດຜົນດີຕ້ອງຖືກປ້ຳຖິ້ມແລະ ໂຍນຖິ້ມໃສ່ໄຟເສຍ. 20 ເຫດສະນັ້ນ, ພວກເຈົ້າຈະຮູ້ຈັກພວກເຂົາໄດ້ດ້ວຍຜົນຂອງພວກເຂົາ. 21 ບໍ່ແມ່ນທຸກຄົນທີ່ເອີ້ນເຮົາວ່າ, ‘ອົງເຈົ້ານາຍ, ອົງເຈົ້ານາຍ’ ແລ້ວຈະເຂົ້າໃນອານາຈັກສະຫວັນ, ແຕ່ເຂົ້າໄດ້ພຽງແຕ່ຜູ້ທີ່ເຮັດຕາມນ້ຳພຣະໄທພຣະບິດາເຈົ້າຂອງເຮົາຜູ້ຢູ່ໃນສະຫວັນເທົ່ານັ້ນ. 22 ມີຫຼາຍຄົນຈະເວົ້າກັບເຮົາໃນວັນນັ້ນວ່າ ‘ອົງເຈົ້ານາຍ, ອົງເຈົ້ານາຍ, ພວກຂ້ານ້ອຍໄດ້ປະກາດພຣະທຳໃນພຣະນາມຂອງພຣະອົງ, ໄດ້ຂັບໄລ່ຜີອອກໃນພຣະນາມຂອງພຣະອົງ ແລະໄດ້ເຮັດການອັດສະຈັນຫຼາຍປະການໃນພຣະນາມຂອງພຣະອົງບໍ່ແມ່ນບໍ?’ 23 ແລ້ວເຮົາຈະໄດ້ປະກາດແກ່ພວກເຂົາຢ່າງເປີດເຜີຍວ່າ ‘ເຮົາບໍ່ຮູ້ຈັກພວກເຈົ້າຈັກເທື່ອ, ຈົ່ງໜີໄປຈາກເຮົາ, ເຈົ້າຜູ້ເຮັດການຊົ່ວຮ້າຍເອີຍ. 24 ເຫດສັນນັ້ນ, ທຸກຄົນທີ່ຟັງຖ້ອຍຂອງເຮົາ ແລະ ປະຕິບັດຕາມ ຄົນນັ້ນກໍເໝືອນຄົນສະຫລາດທີ່ກໍ່ສ້າງເຮືອນຂອງຕົນເທິງດານຫີນ. 25 ຝົນກໍຕົກ, ນ້ຳກໍນອງ ແລະ ລົມກໍພັດປະທະເຮືອນນັ້ນ ແຕ່ເຮືອນນັ້ນກໍບໍ່ພັງເພລົງ ເພາະຮາກຖານມັນຕັ້ງຢູ່ເທິງດານຫີນ. 26 ແຕ່ທຸກຄົນທີ່ໄດ້ຍິນຖ້ອຍຄຳຂອງເຮົາ ແລະ ບໍ່ປະຕິບັດຕາມ ກໍປຽບເໝືອນຄົນໂງ່ທີ່ກໍ່ສ້າງເຮືອນຂອງຕົນເທິງຫາດຊາຍ. 27 ຝົນກໍຕົກ, ນ້ຳກໍນອງ ແລະ ລົມກໍພັດປະທະເຮືອນນັ້ນ ແລະ ເຮືອນນັ້ນກໍເພພັງລົງ ແລະ ການເພພັງຂອງມັນກໍເປັນການໃຫຍ່ຫຼວງ.” 28 ຕໍ່ມາເມື່ອພຣະເຢຊູເຈົ້າກ່າວຖ້ອຍຄຳເຫຼົ່ານີ້ຈົບແລ້ວ ປະຊາຊົນທັງຫຼາຍກໍປະຫຼາດໃຈໃນການສັ່ງສອນຂອງພຣະອົງ, 29 ເພາະວ່າພຣະອົງສັ່ງສອນພວກເຂົາເໝືອນຜູ້ມີສິດອຳນາດ ແລະ ບໍ່ເໝືອນພວກທຳມະຈານຂອງພວກເຂົາ.