ບົດທີ 6
1
ຈົ່ງລະວັງໃຫ້ດີ ຢ່າເຮັດຄວາມດີຕໍ່ໜ້າຄົນອື່ນ ເພື່ອໃຫ້ພວກເຂົາເບິ່ງເຫັນ ຫລື ບໍ່ດັ່ງນັ້ນແລ້ວ ພວກເຈົ້າຈະບໍ່ໄດ້ຮັບບຳເໜັດຈາກພຣະບິດາເຈົ້າຂອງພວກເຈົ້າຜູ້ທີ່ຢູ່ໃນສະຫວັນ.
2
ເຫດສັນນັ້ນ ເມື່ອພວກເຈົ້າໃຫ້ທານ, ຢ່າເປົ່າແກໄປກ່ອນໜ້າພວກເຈົ້າ ເໝືອນດັ່ງຄົນໜ້າຊື່ໃຈເຮັດໃນທຳມະສາລາ ແລະ ຕາມຖະໜົນຫົນທາງ ເພື່ອຕົນເອງຈະໄດ້ຮັບການຍ້ອງຍໍຈາກຄົນອື່ນ. ເຮົາບອກພວກເຈົ້າຕາມຄວາມຈິງວ່າ, ພວກເຂົາໄດ້ຮັບບຳເໜັດຂອງຕົນຢ່າງຄົບຖວ້ນແລ້ວ.
3
ແຕ່ເມື່ອພວກເຈົ້າໃຫ້ທານ, ຢ່າໃຫ້ມືຊ້າຍຮູ້ສິ່ງທີ່ມືຂວາກຳລັງເຮັດ.
4
ເພື່ອວ່າການໃຫ້ທານຂອງພວກເຈົ້າຈະເປັນຄວາມລັບ. ແລ້ວພຣະບິດາເຈົ້າຂອງພວກເຈົ້າຜູ້ເບິ່ງເຫັນໃນທີ່ລັບລີ້ຈະໃຫ້ບຳເຫນັດແກ່ພວກເຈົ້າ.
5
ເມື່ອພວກເຈົ້າອະທິຖານ, ຢ່າເປັນເໝືອນຄົນໜ້າຊື່ໃຈຄົດ, ເພາະພວກເຂົາມັກຢືນອະທິຖານໃນທຳມະສາລາ ແລະ ຕາມແຈຖະໜົນຫົນທາງ ເພື່ອໃຫ້ຄົນເຫັນພວກເຂົາ. ເຮົາບອກພວກເຈົ້າຕາມຄວາມຈິງວ່າ ພວກເຂົາໄດ້ຮັບບຳເຫນັດຂອງຕົນແລ້ວ.
6
ແຕ່ພວກເຈົ້າ, ເມື່ອພວກເຈົ້າອະທິຖານ,ຈົ່ງເຂົ້າໄປໃນຫ້ອງຂອງພວກເຈົ້າ, ອັດປະຕູໄວ້ ແລະ ອະທິຖານພຣະບິດາຂອງພວກເຈົ້າ ຜູ້ຢູ່ໃນທີ່ລັບລີ້. ແລ້ວພຣະບິດາຂອງພວກເຈົ້າຜູ້ເບິ່ງເຫັນໃນທີ່ລັບລີ້ ຈະໃຫ້ບຳເໜັດແກ່ພວກເຈົ້າ.
7
ເມື່ອພວກເຈົ້າອະທິຖານ, ຢ່າເວົ້າຊ້ຳຄຳເກົ່າເໝືອນດັ່ງຄົນບໍ່ເຊື່ອພຣະເຈົ້າເຮັດ ເພາະພວກເຂົາຄິດວ່າ ຖ້າພວກເຂົາເວົ້າຊ້ຳຫຼາຍໆເທື່ອພະຈະໄດ້ຍິນ.
8
ດ້ວຍເຫດນີ້ ຢ່າເຮັດຄືພວກເຂົາ ເພາະວ່າສິ່ງໃດທີ່ພວກເຈົ້າຕ້ອງການ ພຣະບິດາຂອງພວກເຈົ້າກໍຮູ້ກ່ອນທີ່ພວກເຈົ້າຈະຂໍຈາກພຣະອົງ.
9
ສະນັ້ນ ຈົ່ງອະທິຖານຕາມຢ່າງນີ້ວ່າ, ‘ຂ້າແດ່ພຣະບິດາເຈົ້າຂອງພວກຂ້ານ້ອຍທັງຫລາຍ ຜູ້ຢູ່ໃນສະຫວັນ, ຂໍໃຫ້ພຣະນາມຂອງພຣະອົງເປັນທີ່ເຄົາຣົບບູຊາ.
10
ຂໍໃຫ້ອານາຈັກຂອງພຣະອົງມາຕັ້ງຢູ່. ຂໍໃຫ້ເປັນໄປຕາມຄວາມປະສົງຂອງພຣະອົງ ໃນສະຫວັນເປັນຢ່າງໃດ ກໍຂໍໃຫ້ເປັນໄປຢ່າງນັ້ນທີ່ແຜ່ນດິນໂລກ.
11
ຂໍໂຜດໃຫ້ອາຫານປະຈຳວັນໃຫ້ແກ່ພວກຂ້ານ້ອຍໃນວັນນີ້.
12
ຂໍໂຜດຍົກໂທດໃຫ້ພວກຂ້ານ້ອຍເໝືອນພວກຂ້ານ້ອຍຍົກໂທດ ໃຫ້ແກ່ຜູ້ທີ່ເຮັດຜິດຕໍ່ພວກຂ້ານ້ອຍນັ້ນ.
13
ຂໍຢ່າພາພວກຂ້ານ້ອຍເຂົ້າໄປໃນການທົດລອງ ແຕ່ຂໍໂຜດໃຫ້ພົ້ນຈາກມານຊົ່ວຮ້າຍ.'
14
ເພາະຖ້າພວກເຈົ້້າຍົກໂທດຄວາມຜິດຂອງເພື່ອນມະນຸດດ້ວຍກັນແລ້ວ ພຣະບິດເຈົ້າຂອງພວກເຈົ້າຜູ້ຢູ່ໃນສະຫວັນຈະຍົກໂທດຄວາມຜິດຂອງພວກເຈົ້າເໝືອນກັນ.
15
ແຕ່ຖ້າພວກເຈົ້າບໍ່ຍົກໂທດຄວາມຜິດຂອງເພື່ອນມະນຸດ ພຣະບິດາເຈົ້າຂອງພວກເຈົ້າກໍຈະບໍ່ໂຜດຍົກໂທດຄວາມຜິດຂອງພວກເຈົ້າເໝືອນກັນ.
16
ເມື່ອພວກເຈົ້້າຖືສິນອົດອາຫານ ຢ່າເຮັດໜ້າໂສກເສົ້າເໝືອນດັ່ງຄົນໜ້າຊື່ໃຈຄົດ, ດ້ວຍວ່າພວກເຂົາເຮັດໜ້າໂສກເສົ້າເພື່ອຈະໃຫ້ມະນຸດເຫັນວ່າພວກເຂົາຖືສິນອົດອາຫານ. ເຮົາບອກພວກເຈົ້າຕາມຄວາມຈິງວ່າ ພວກເຂົາໄດ້ຮັບບຳເຫນັດຂອງຕົນແລ້ວ.
17
ແຕ່ພວກເຈົ້າ, ເມື່ອພວກເຈົ້າຖືສິນອົດອາຫານ ຈົ່ງລ້າງໜ້າ ແລະ ເອົານ້ຳມັນທາຫົວ.
18
ເພື່ອບໍ່ໃຫ້ມະນຸດເຫັນວ່າທ່ານຖືສິນອົດອາຫານ ແຕ່ໃຫ້ປະກົດແກ່ພຣະບິດາເຈົ້າຂອງພວກເຈົ້າຜູ້ຢູ່ໃນທີ່ລັບລີ້ ແລະ ພຣະບິດາເຈົ້າຂອງພວກເຈົ້າຜູ້ເບິ່ງເຫັນໃນທີ່ລັບລີ້ ກໍຈະໂຜດໃຫ້ບຳເໜັດແກ່ພວກເຈົ້າ.
19
ຢ່າຮິບໂຮມຊັບສົມບັດໄວ້ສຳລັບຕົນໃນໂລກ, ຊຶ່ງເປັນບ່ອນມອດ ແລະ ຂີ້ຫມ້ຽງກັດກິນ, ແລະ ເປັນບ່ອນທີ່ໂຈນເຈາະເຂົ້າລັກເອົາໄດ້.
20
ແຕ່ຈົ່ງຮິບໂຮມຊັບສົມບັດສຳລັບຕົນໄວ້ໃນສະຫວັນ ບ່ອນມອດ ແລະ ຂີ້ຫມ້ຽງກັດກິນບໍ່ໄດ້ ແລະ ທັງໂຈນເຈາະ ແລະ ລັກເອົາບໍ່ໄດ້.
21
ເພາະວ່າຊັບສົມບັດຂອງທ່ານຢູ່ໃສ ໃຈຂອງທ່ານກໍຢູ່ທີ່ນັ້ນດ້ວຍ.
22
ດວງຕາເປັນໂຄມໄຟຂອງຮ່າງກາຍ ຖ້າຕາຂອງທ່ານປົກກະຕິດີ ຮ່າງກາຍທຸກສ່ວນກໍສະຫວ່າງດີ.
23
ແຕ່ຖ້າຕາຂອງທ່ານບໍ່ປົກກະຕິດີ ຮ່າງກາຍທຸກສ່ວນຂອງທ່ານກໍມືດໄປ. ເຫດສັນນັ້ນ, ຖ້າຄວາມສະຫວ່າງທີ່ຢູ່ໃນຕົວຂອງທ່ານມືດໄປ ຄວາມມືດນັ້ນຈະຫນາທຶບພຽງໃດ?
24
ບໍ່ມີຜູ້ໃດສາມາດເປັນຂ້າສອງເຈົ້າບ່າວສອງນາຍໄດ້ ເພາະຈະຊັງນາຍຜູ້ນີ້ ແລະ ໄປຮັກນາຍຜູ້ນັ້ນ ຫລື ຈະອຸທິດຕົນຮັບໃຊ້ນາຍຜູ້ນີ້ແລ້ວຫມິ່ນປະຫມາດຜູ້ນັ້ນ ທ່ານບໍ່ສາມາດຮັບໃຊ້ພຣະເຈົ້າ ແລະ ເງິນຄຳພ້ອມກັນໄດ້.
25
ດ້ວຍເຫດນັ້ນ ເຮົາຈິ່ງບອກພວກເຈົ້າທັງຫຼາຍວ່າ, ຢ່າກະວົນກະວາຍເຖິງຊີວິດຂອງຕົນວ່າ ຈະກິນຫຍັງ ຈະດື່ມຫຍັງ ຫລື ກະວົນກະວາຍເຖິງຮ່າງກາຍຂອງຕົນວ່າຈະນຸ່ງຫຍັງ. ເພາະຊີວິດກໍມີຄ່າຫຼາຍກວ່າອາຫານ ແລະ ຮ່າງກາຍກໍມີຄ່າຫຼາຍກວ່າເຄື່ອງນຸ່ງຫົ່ມບໍ່ແມ່ນບໍ?
26
ຈົ່ງເບິ່ງຝູງນົກຢູ່ເທິງອາກາດ. ພວກມັນບໍ່ໄດ້ຫວ່ານ, ບໍ່ໄດ້ກ່ຽວ ຫຼື ບໍ່ໄດ້ເກັບຮວບຮວມໃສ່ໄວ້ໃນເລົ້າ ແຕ່ພຣະບິດາເຈົ້າຂອງພວກເຈົ້າຜູ້ຢູ່ໃນສະຫວັນກໍຍັງລ້ຽງພວກມັນ. ພວກເຈົ້າປະເສີດຫຼາຍກວ່າຝູງນົກບໍ່ແມ່ນບໍ?
27
ແລ້ວມີຜູ້ໃດໃນພວກເຈົ້າທີ່ກະວົນກະວາຍແລ້ວສາມາດຕໍ່ຊີວິດຂອງຕົນໃຫ້ຍາວອອກໄປອີກຈັກສອກໜຶ່ງໄດ້?
28
ເປັນຫຍັງພວກເຈົ້າຈຶ່ງກະວົນກະວາຍເຖິງເຄື່ອງນຸ່ງຫົ່ມ? ຈົ່ງສັງເກດເບິ່ງດອກໄມ້ໃນທົ່ງວ່າພວກມັນເຕີບໃຫຍ່ຂຶ້ນຢ່າງໃດ ມັນບໍ່ໄດ້ເຮັດວຽກ ແລະ ມັນບໍ່ໄດ້ເຂັນຝ້າຍ.
29
ແຕ່ເຮົາບອກພວກເຈົ້າທັງຫລາຍວ່າ, ແມ່ນແຕ່ກະສັດໂຊໂລໂມນ ເມື່ອບໍຣິບູນດ້ວຍສະຫງ່າຣາສີຂອງເພິ່ນກໍຍັງບໍ່ງາມເໝືອນດອກໄມ້ເຫຼົ່ານີ້ດອກຫນຶ່ງ.
30
ຖ້າພຣະເຈົ້າຕົບແຕ່ງຫຍ້າທີ່ຢູ່ໃນທົ່ງ ຊຶ່ງເປັນຢູ່ມື້ນີ້ ແລະມື້ອື່ນຕ້ອງຖືກຖິ້ມໃສ່ເຕົາໄຟ, ພຣະອົງຈະບໍ່ຕົບແຕ່ງພວກເຈົ້າຫຼາຍກວ່ານັ້ນອີກບໍ, ໂອ ຜູ້ມີຄວາມເຊື່ອນ້ອຍເອີຍ?
31
ເຫດສັນນັ້ນ ຢ່າກະວົນກະວາຍ ແລະ ເວົ້າວ່າ ‘ພວກເຮົາຈະກິນຫຍັງ, ຈະດື່ມຫຍັງ ຫລື ຈະນຸ່ງຫົ່ມຫຍັງ?’
32
ເພາະຄົນຕ່າງຊາດສະແຫວງຫາສິ່ງເຫຼົ່ານີ້ ແລະ ພຣະບິດາເຈົ້າຂອງພວກເຈົ້າທັງຫລາຍຜູ້ທີ່ຢູ່ໃນສະຫວັນ ກໍຮູ້ແລ້ວວ່າພວກເຈົ້າຕ້ອງການສິ່ງເຫຼົ່ານີ້.
33
ແຕ່ກ່ອນອື່ນ, ຈົ່ງສະແຫວງຫາຣາຊະອານາຈັກຂອງພຣະເຈົ້າ ແລະ ຄວາມຊອບທຳຂອງພຣະອົງກ່ອນ. ແລ້ວພຣະອົງຈະເພີ່ມເຕີມສິ່ງເຫຼົ່ານີ້ໃຫ້ແກ່ພວກເຈົ້າ.
34
ເຫດສະນັ້ນ, ຢ່າກະວົນກະວາຍເຖິງມື້ອື່ນ, ເພາະວ່າມື້ອື່ນຍັງມີຄວາມກະວົນກະວາຍໃນຕົວມັນເອງ ຄວາມທຸກໃນວັນໃດກໍພໍແລ້ວໃນວັນນັ້ນ.