¹ ຫຼັງຈາກນັ້ນ ພຣະວິນຍານໄດ້ນຳພຣະເຢຊູເຈົ້າເຂົ້າໄປໃນຖິ່ນແຫ້ງແລ້ງກັນດານ ເພື່ອໃຫ້ມານຮ້າຍໄດ້ທົດລອງ. ² ເມື່ອພຣະອົງໄດ້ອົດອາຫານເປັນເວລາສີ່ສິບວັນ ແລະ ສີ່ສິບຄືນແລ້ວ, ພຣະອົງກໍຢາກອາຫານ. ³ ຜູ້ທົດລອງມາຫາພຣະອົງ ແລະ ກ່າວກັບພຣະອົງວ່າ, “ຖ້າທ່ານເປັນພຣະບຸດຂອງພຣະເຈົ້າ, ຈົ່ງສັ່ງກ້ອນຫີນເຫຼົ່ານີ້ໃຫ້ກາຍເປັນເຂົ້າຈີ່.” ⁴ ແຕ່ພຣະເຢຊູເຈົ້າໄດ້ຕອບວ່າ, “ມີຄຳຂຽນໄວ້ໃນພຣະຄຳພີວ່າ ‘ມະນຸດຈະບໍ່ລ້ຽງຊີວິດດ້ວຍອາຫານພຽງສິ່ງດຽວ, ແຕ່ລ້ຽງດ້ວຍທຸກຖ້ອຍຄຳທີ່ອອກມາຈາກປາກຂອງພຣະເຈົ້າ’.” ⁵ ແລ້ວມານຮ້າຍໄດ້ນຳພຣະເຢຊູເຈົ້າເຂົ້າໄປໃນນະຄອນສັກສິດ ແລະ ໃຫ້ພຣະອົງຢືນຢູ່ເທິງຈຸດສູງສຸດຂອງພຣະວິຫານ. ⁶ ແລະໄດ້ກ່າວກັບພຣະອົງວ່າ, “ຖ້າທ່ານເປັນພຣະບຸດຂອງພຣະເຈົ້າ, ຈົ່ງກະໂດດລົງມາ, ເພາະມີຄຳຂຽນໄວ້ໃນພຣະຄຳພີວ່າ, ‘ພຣະເຈົ້າຈະສັ່ງພວກເທວະດາເບິ່ງແຍງທ່ານ ແລະ ‘ພວກເຂົາຈະຮັບທ່ານໄວ້ດ້ວຍມືຂອງຕົນ, ເພື່ອຈະບໍ່ໃຫ້ຕີນຂອງທ່ານຕຳຫີນ’.” ⁷ “ພຣະເຢຊູເຈົ້າໄດ້ກ່າວກັບມານຮ້າຍວ່າ, ມີຄຳຂຽນໄວ້ໃນພຣະຄຳພີອີກວ່າ, ‘ຢ່າທົດລອງອົງພຣະຜູ້ເປັນເຈົ້າ ພຣະເຈົ້າຂອງເຈົ້າ’.” ⁸ ອີກເທື່ອໜຶ່ງ, ມານຮ້າຍໄດ້ພາພຣະອົງຂຶ້ນໄປເທິງພູທີ່ສູງຫຼາຍ ແລະໄດ້ສະແດງບັນດາອານາຈັກແຫ່ງໂລກນີ້ກັບຄວາມຍິ່ງໃຫຍ່ທັງໝົດໃຫ້ພຣະອົງເຫັນ. ⁹ ມານຮ້າຍໄດ້ກ່າວກັບພຣະອົງວ່າ, “ເຮົາຈະເອົາສິ່ງທັງໝົດເຫຼົ່ານີ້ໃຫ້ແກ່ທ່ານ ຖ້າທ່ານກົ້ມຂາບ ແລະ ນະມັດສະການເຮົາ.” ¹⁰ ຫຼັງຈາກນັ້ນ ພຣະເຢຊູເຈົ້າໄດ້ກ່າວກັບມັນວ່າ, “ຊາຕານເອີຍ! ຈົ່ງຫນີໄປ ເພາະມີຄຳຂຽນໄວ້ໃນພຣະຄຳພີວ່າ, ‘ຈົ່ງນະມັດສະການອົງເຈົ້ານາຍ ພຣະເຈົ້າຂອງເຈົ້າ ແລະ ຮັບໃຊ້ພຣະອົງພຽງແຕ່ຜູ້ດຽວ’.” ¹¹ ແລ້ວມານຮ້າຍຈຶ່ງໜີຈາກພຣະອົງໄປ ແລະ ເບິ່ງແມ, ມີພວກເທວະດາໄດ້ມາຮັບໃຊ້ພຣະອົງ. ¹² ບັດນີ້ ເມື່ອພຣະເຢຊູເຈົ້າໄດ້ຍິນວ່າໂຢຮັນຖືກຈັບໄວ້ແລ້ວ, ພຣະອົງກໍກັບໄປທີ່ແຂວງຄາລີເລ. ¹³ ພຣະອົງອອກຈາກເມືອງນາຊາເຣັດ ແລ້ວໄປອາໄສຢູ່ໃນເມືອງກາເປນາອູມ ຊຶ່ງຢູ່ແຄມທະເລສາບຄາລີເລໃນເຂດແດນເຊບູລູນ ແລະ ເນັບທາລີ. ¹⁴ ສິ່ງນີ້ໄດ້ເກີດຂຶ້ນ ເພື່ອໃຫ້ສຳເລັດຕາມທີ່ກ່າວໄວ້ໂດຍຜູ້ທຳນວາຍເອຊາຢາຄື:

¹⁷ ຕັ້ງແຕ່ເວລານັ້ນມາ ພຣະເຢຊູເຈົ້າກໍເລີ່ມຕົ້ນເທດສະໜາວ່າ, “ຈົ່ງຖິ້ມໃຈເກົ່າເອົາໃຈໃໝ່ ເພາະຣາຊອານາຈັກສະຫວັນມາໃກ້ແລ້ວ.” ¹⁸ ຂະນະທີ່ພຣະເຢຊູເຈົ້າກຳລັງຍ່າງໄປຕາມແຄມທະເລສາບຄາລີເລ, ພຣະອົງກໍເຫັນສອງອ້າຍນ້ອງ ຄືຊີໂມນທີ່ຊື່ວ່າເປໂຕ ແລະ ອັນເດອານ້ອງຊາຍຂອງເພິ່ນ, ພວກເພິ່ນກຳລັງຖິ້ມມອງລົງນ້ຳທະເລ ເພາະພວກເພິ່ນເປັນຄົນຫາປາ. ¹⁹ ພຣະເຢຊູເຈົ້າໄດ້ກ່າວກັບພວກເພິ່ນວ່າ, “ມາ, ຈົ່ງຕາມເຮົາມາ ແລະ ເຮົາຈະເຮັດໃຫ້ພວກເຈົ້າເປັນຜູ້ຫາຄົນ” ²⁰ ໃນທັນໃດນັ້ນ ພວກເພິ່ນກໍປະມອງ ແລະ ຕິດຕາມພຣະອົງໄປ. ²¹ ຂະນະທີ່ພຣະເຢຊູເຈົ້າກຳລັງໄປຈາກທີ່ນັ້ນ ພຣະອົງໄດ້ເຫັນສອງອ້າຍນ້ອງອີກສອງຄົນ ຄືຢາໂກໂບລູກຊາຍຂອງເຊເບດີ ແລະ ໂຢຮັນນ້ອງຊາຍຂອງເພິ່ນ. ພວກເພິ່ນກຳລັງແປງມອງກັບເຊເບດີພໍ່ຂອງພວກເພິ່ນຢູ່ໃນເຮືອ. ພຣະອົງໄດ້ເອີ້ນພວກເພິ່ນ, ²² ແລະ ໃນທັນໃດນັ້ນ ພວກເພິ່ນກໍປະເຮືອ ແລະ ພໍ່ຂອງພວກເພິ່ນ ແລ້ວໄດ້ຕິດຕາມພຣະອົງໄປ. ²³ ພຣະເຢຊູເຈົ້າໄດ້ເດີນທາງໄປທົ່ວແຂວງຄາລີເລ, ສັ່ງສອນໃນທຳມະສາລາຂອງພວກເຂົາ, ເທດສະໜາຂ່າວປະເສີດເລື່ອງຣາຊອານາຈັກສະຫວັນ ແລະ ຮັກສາຄົນທີ່ມີພະຍາດ ແລະ ເຈັບປ່ວຍທຸກຊະນິດໃຫ້ຫາຍດີໝົດ. ²⁴ ຂ່າວກ່ຽວກັບພຣະອົງກໍຊ່າລືໄປທົ່ວປະເທດຊີເຣຍ ແລະ ປະຊາຊົນໄດ້ນຳຄົນທີ່ທໍລະມານຈາກພະຍາດຕ່າງໆ ແລະ ຄົນທີ່ເຈັບປວດທໍລະມານ, ຄົນທີ່ຜີມານຮ້າຍເຂົ້າສິງ, ຄົນເປັນບ້າຫມູ ແລະ ຄົນເປັນເປັ້ຍມາຫາພຣະອົງ. ພຣະເຢຊູເຈົ້າໄດ້ຮັກສາພວກເຂົາໃຫ້ຫາຍດີ. ²⁵ ມີປະຊາຊົນເປັນຈຳນວນຫຼວງຫຼາຍມາຈາກແຂວງຄາລີເລ, ແຂວງເດກາໂປລີ, ນະຄອນເຢຣູຊາເລັມ ແລະ ຢູດາຍ ແລະ ຈາກອີກຟາກຂອງແມ່ນໍ້າຈໍແດນກໍໄດ້ຕິດຕາມພຣະອົງໄປ.