¹ Kia rahudi heka hãbu mahãdu wedu boho wadee raryberenyre: “Isaeli mahãdu heka hãbu bohomy, xiwena wahidỹỹdu mahãdumy, Levi mahãdumy òbitimy aõkõ roimyhỹrenyre, tii boho heka inysu wera ludu mahãdu ribile heka rexihitxinyõtyhy, isuriokoreny deàlànamy wesemy riwinyrenyre heka iwese kana mahãdu isu riokoreny deàlànamy riwinyrenyre, kia Heteu mahãdu isu riokoreny deàlànamy riwinyrenyre, kana mahãdu isu riokoreny deàlànamy riwinyrenyre, Bereseu mahãdu isu riokoreny deàlànamy riwinyrenyre, Sebuseu mahãdu isu riokoreny deàlànamy riwinyrenyre, Amõ mahãdu isu riokoreny deàlànamy riwinyrenyre, Ejitu mahãdu isu riokoreny deàlànamy riwinyrenyre, Amoheu mahãdu isu riokoreny deàlànamy riwinyrenyre ibutu kia bede mahãdu surioko deàlànamy riwinyrenyre ibinamy kia rare. ² Tii boho tule kia mahãdu hawyyreny-di raàdònyrenyre tule iriòrereny riwahinyrenyre kia mahãdu riòrereny-di raàdònykremy kia wese heka Isaeli mahãdu kia mahãdu wana riuriurinyrenyre. Hãbu wedu mahãdu tule iweselemy ibinamy riwinymyhỹre!” ³ Kia rybemy raholareu heka watyy reykare, warade resihere, waijòsiri tule resihere bede-ò ranyre heka bedewotyhymy dori. ⁴ Iu heka ibutu Isaeli Deuxu rybemy rityhytyhynyre mahãdu heka idi rirurawonyrenyre wawana rexibutunyrenyre Isaeli mahãdu òraruna òraruki heka wawana rabedewonyrenyre. Jiarỹ heka sõwemy bedewonyre, sõwemy wabedewo hyky hyky bederatxioronymy. ⁵ Idi bederatxiorou heka xiwena wahidỹỹu, jiarỹ lamymy rỹire, watyy iykamy roimyhỹre tatiwomy jiarỹ rare wadebò biu-ò reteòsinyre waDeuxu-ò, Wanynyrỹ-ò ⁶ idi reixitòenyre: “Waha Deuxu, jiarỹ sõwemy raixỹrumy rỹimyhỹre ako-ki sõwemy raixỹrumy rỹimyhỹre waòrarunareny òraruki, iny òrarunareny rasõwere iny tyrereny-ki roimyhỹre tai wiji waòrarunareny waDeuxureny ribi riwomyhỹre. ⁷ Iny labiereny bedeu ribile heka iny òrarunarenymy sõwe sõwemy rỹimyhỹre, waòrarunareny inytyrereny-ki roimyhỹre heka tai iny òrarunareny òraruki heka iny iòlòreny mahãdu, xiwena wahidỹỹdu mahãdu iòlò su iwitxira mahãdu redyrenyra dori, wetxumy riwadyrenyre, iny tii boho rirubunyrenyre, waõna õnareny ribòhònyrenyre, iòlò koki, bede iwitxira mahãdu koki heka wiji iny boho wadireny risinymyhỹre, umyreny ribuarenyre. ⁸ Wiji tahe Inynyrỹ Deuxu heka aruxetòena-di wadireny tate, tai wiji heka iny boho wetxu ribi rihenyre mahãdu heka inysureny-ò tedyta kaa Deuxu heto-ki iny boho roire heka tai wiji heka iny bededỹỹnanareny awimy tewinytemyhỹte wadeereny. ⁹ Wetxumy inyboho roire, taile tewariõhyyte Pesia iòlò mahãdu wadireny raruxetòenykremy tewinyte dori tai aheto Templo aritỹmyranykremy riwateònyrenyre, kia juhuu ribòhònyre heka ixyby Judásu-ki, Jerusalĕ-ki awilemy ixỹ mahãdu roire. ¹⁰ Tai dori wiji timybo araryberenykre kiamy inydeereny rotỹỹnyre heka arybemy reòbyõrenyre-ki. ¹¹ juhule heka arybedu mahãdu heka riwabedeerynanyrenyre. Tii boho raryberenyre heka kiasu iny boho idi rirònyrenykremy heka taile inyõ sỹdu mahãdu heka òrarudureny sõwemy roire, tii boho heka ixurenymy roiremyhỹ taòrarunareny-di su ribinabinanyrenyre dori. ¹² Arybedu mahãdu heka raryberenyre heka tiu wiwanareny raàdònyrenyõtyhy. Tulesỹ tii boho wana wimy ratximyhỹrenyõtyhy, ywinamy idireny ratximyhỹrenyõkemy, tai dori awimy rikibròrenykemy, awimy rikiroxirenykemy, tai dori wariokorereny-ò kaasu idi reuròrenykremy tuhyymy. ¹³ Kia ibinabinamy rewinyrenyre irahudi heka waòrarunareny òraruki heka, kai aõhõkỹdỹỹnanamy inydereny tesỹnyte, waòrarunareny òraruki heka tesỹnyte inytyrereny-ò ihỹre heka sõwe aõkõ inydereny aõhõkỹmy tesỹnyte, iny boho irulemy roimyhỹre dori. ¹⁴ Timybohe wiji ixyby arybemy aroholaõkremy, kaa ibina bina riwinymyhỹre mahãdu wiwanamy raàdònyrenykremy. Kiamy rikiwinyrenykeki heka aykaranamy ranihikỹkremy inydereny tai iny idi rahukemy tiu iny idi ratxiõtyhy, hena ihõõre. ¹⁵ Inynyrỹ Isaeli Deuxu, òbitityhy heka tate, ihỹre heka iny irumy ratximyhỹre wiji. Akokile rarybemyhỹre heka iny boho heka òrarudumy roimyhỹre wiji. Akoki heka iny boho idi ratxiõtyhy bohe rare.