¹ Dario iòlò heka Babilonia iòlò hetxina mahãdu tyyriti rijekemy riteònyre tai aõna õna wihỹkỹmy rirarenyre kia woki. ² Tii boho rijerenyreu heka Ekibatana hãwã-ki, Mediasu-ki itxi raharenyre tyyriti-ki Dario rybemy: ³ “Siro sohoji beòra-di iòlòmy rareu heka Jerusalĕ-ki Deuxu heto Templo tyyritimy riwinyre myy: “Jerusalĕ-ki Deuxu heto Templo riwinykremy taile xiwenamy riwahinyrenykremy, ixinamy kia heto denamy riakemy. Kia 27 urihixina-di biu-ò riwinykremy 27 urihixina-di iwebese bede-ò riwinykremy, ⁴ inataõ mana nihiỹ-di riòtenanykremy sohoji òwòru-di òtenamy rỹikremy. Iòlò nieru ribi idi riòwynykremy. ⁵ Deuxu heto Templo iaõna õnamy Nabukodonoso Templowo ribi diwyde heka Babiloni-ò ixyby heka riwyrenykremy Jerusalĕ Templo-ò; Deuxu hetowo-ki ridekremy.” ⁶ Kia rybe rahudi heka Dario iòlò riteònyre myy: “Wiji, Tatenai Eubaratésu bedebrò-kisỹdu mahãdu wedumy Setá-Bosenaí, ijõ hãbu wedu mahãdu wana kia ribi bohonybenyke, ⁷ Iaõmysỹdỹỹnareny binadỹỹõmyrenykre! Ixinamy kia Isaeli wedu mahãdu, hãbu wedu mahãdu wana Deuxu heto Templo taile juhuu wesemy roire riwinyrenykremy. ⁸ Tulesỹ warybemy aritidikre kai boho heka kia Isaeli mahãdu-ò biwinybenyke heka judeu mahãdu heka Deuxu heto Templo riwinymyhỹrenyre-ki heka Eubaratésu bedebrò-kisỹdu kia nierumy iaõmysỹdỹỹdu mahãdu-ò biwahinybenyke, kia iaõmysỹdỹỹnareny rexihuõkemy lau. ⁹ Aõmamy tamyreny rasiranyrenyre heka: bororeni riòremy, budoeni riòremy, budoeni hãbumy xiwenamy riwahinyrenykremy Deuxu biu wedu-ò, Jerusalĕ xiwena wahidỹỹdu reixitòenyrenykeki heka aõma jiyramy, tirikumy, vĩĩmy, adỹỹmy, òbitimy txuõ txuõlemy ibutumy biwahinybenykremy, ¹⁰ tai Deuxu biu wedu-ò xiwenawi riwahinyrenykremy tule iòlò idi beixitòenybenykremy, iòlò riòrereny idi beixitòenyrenykremy. ¹¹ Katahe ijõ kaa tyyriti-ki aritidikre moõ kaa tyyriti-ki ijõ rybemy ritidikeki, kaa rybemy rawitxiranykeki heka taheto iwitxi-di taumy-di riwekremy idi ritamadỹỹnykremy. Taheto tule idi reatykremy idi ribòhò bòhònykremy, ¹² Deuxu tani-di tai risỹnyre heka, iòlòõ mahãdu, iwitxira mahãduõ kaa tyyriti rawitxiranykeki ada Jerusalĕ Deuxu heto Templo rahukemy riwisỹnykeki, Jiarỹ Dario, katahe retidira. Iwesetyhyle heka riwinykremy, rarybere Jiarỹhe!” ¹³ Tai dori Dario iòlò tyyriti ritidire heka Tatenai Eubaratésu bedebrò-kisỹdu mahãdu wedumy Setá-Bosenaí, ijõ hãbu wedu mahãdu wana heka iòlò rybemy iwesele òbitityhy riwinyrenyre. ¹⁴ Kia rybe-di heka judeu mahãdu Jerusalĕ Deuxu heto Templo widỹỹmy idihyymy raõmysỹdỹỹmy roiremyhỹ. Ajeú Deuxu rybedumy, Sakariá Deuxu rybedumy, Ido riòre heka tii rare, Deuxu idireny rare irybreny òraruki heka idi rarurunymy roiremyhỹ idi raõmysỹdỹỹmyroirenyre. Tai dori Deuxu heto Templo widỹỹmy rexihurenyre Iwesele heka Isaeli Deuxu rarybere iwesemy, kia Pesia iòlòreny heka Siro tyyriti-di, Dario tyyriti-di, Ataxexé tyyriti-di tule. ¹⁵ Kia Ada ahãdumy inataõ txu-di heka Deuxu heto Templo widỹỹmy rexihurenyre heka Dario iòlò debò sohoji reurò beòrau. ¹⁶ Tai heka Isaeli mahãdu, xiwena wahidỹỹdu mahãdu, Levi mahãdu, wetxu ribi riuhenyre mahãdu mahãdu, Deuxu hetomy reysarenymy roimyhỹrenyre Deuxu-ò riwowydynyrenyre. ¹⁷ Iu heka Deuxu heto Templo-ki Deuxu-ò xiwenamy riwahinyrenyre bororeni hãbu 100my sõwemy, budoeni hãbu 200my sõwemy, budoeni riòremy 400my sõwemy, ijõ Isaeli mahãdu ibutumy iòrarunareny òraruki heka xiwenamy boji 12my sõwe riwahinyrenyre iwese Isaeli mahãdu ilabiereny 12my wesemy. ¹⁸ Idi heka xiwena wahidỹỹdu mahãdu Deuxu-ò iaõmysỹdỹỹnareny txuumy riywinyrenyre, Levi mahãdu tamahãdu tamahãdumy Deuxu-ò iaõmysỹdỹỹnareny txuumy riywinyrenyre, Jerusalĕ-ki, iwesele Moisesi heka Tyyriti-ki rityyritinymy roire iwesemy. ¹⁹ Idi heka sohoji ahãdu-di 14 txumy Paskoa Worana Bedehesimy riwinyrenyre. ²⁰ Xiwena wahidỹỹdu mahãdu heka Levi mahãdu heka ibutumy wiweselemy rexiywinyrenyre Deuxu-ò; ibutu wetxu ribi dirahude mahãdumy, xiwena wahidỹỹdu mahãdumy, iseriòrerenymy, tamyreny Paskoa budoeni riòremy heka rirubunyrenyre Deuxu-ò. ²¹ Kiawesemy heka isaeli mahãdu wetxu ribi dirahudenyde heka ijõ mahãdu iherenymy dirahude tule, su witxira mahãdu ribi rexiywinyrenyre rexiòbitinyrenyre heka Isaeli Deuxu-ò rexiòbitinyrenyre dori. ²² Paskoa worana bedehesi orotxu uriõmy rirasỹrenyre debò inatxi reurò txu-di, deysanamy narỹỹnamy roire, Deuxule riteysanyrenyre heka Asiria iòlò iwo-ki Deuxu rawitxiranyre kiamy isaeli Deuxu tamyreny riwinyre, iu tebòreny idi rarurudỹỹnyre Templo widỹỹmy tii boho idi raõmysỹdỹỹnyrenyreu.