¹ Kia bedeu heka Judá mahãdu-ò, Jerusalĕ mahãdu-ò, Ajeú Deuxu rybedumy, Sakariá Deuxu rybedumy, Ido riòre heka tii rare, tii boho raryberenyre Deuxu ribile heka raryberenyre heka Deuxunidilemy Isaeli Deuxu ityytybytyhy tii boho wana roire. ² Deuxu rybemy òraru-ki heka Sorobabeli, Sealatieli riòre, Jesua, Jeosadaké riòre wana Deuxu heto templo widỹỹmy riòrarunyrenyre heka Jerusalĕ-ki wahe. Ijõ Deuxu rybeduõ mahãdu tii boho wanamy roire tule wiòhedỹỹrenymy. ³ Tatenaí heka Eubaratésu bedebrò-kisỹdu mahãdu wedumy, Setá-Bosenaí, ijõ hãbu mahãdu wana Jerusalĕ-ò roirenyre idi tamyreny rỹỹraxirenyre: “Mobo arateònyrenyre kaa heto Templo widỹỹymy ritỹmyranyrenykremy, òtity tule ritỹmyranyrenykremy mobo arateònyrenyre” ⁴ Tii boho tule kia heto Templo aõmysỹdỹỹdu mahãdunirenymy ritỹỹraxinyrenyre. ⁵ Ihãre heka isaeli wedu mahãdureny Deuxu idireny retehemy roiremyhỹ, tai dori tetximy roikõmy roiremyhỹ hykyhyky iribi heka Dario iòlò-ò tyyriti riteònyrenyre-ò. ⁶ Kaa heka Tatenai Eubaratésu bedebrò-kisỹdu mahãdu wedumy, Setá-Bosenaí, ijõ hãbu wedu mahãdu wana tyyriti wesemy heka idi ròrytinyrenyre wesemy, kiamy Dario iòlò-ò riteònyrenyre: ⁷ “Dario iòlò-ò kaa tyyritimy rare, iòlò ywihyymy matxike. ⁸ Adeehe arabedeerynanykremy iny boho heka Deuxu Tyhyhykỹ heto templo widỹỹ ijobisimy roirenyre Judásu-ò. Kia templo heka mana-di wihikỹle heka riwinymyroiremyhỹ, iwitxiti tule dena-kile roire. Iaõmysỹdỹỹnareny heka ibyỹmy riwinymyroimyhỹrenyre awimy rỹireri dori. ⁹ Iwidỹỹdureny mahãdu-ò rỹỹraxirenyre heka: ‘Mobo arateònyrenyre kaa heto Templo widỹỹymy ritỹmyranyrenykremy, òtity tule ritỹmyranyrenykremy mobo arateònyrenyre” ¹⁰ Tule inirenymy retỹỹraxirenyre adee iòlò aratỹnynykremy mobo iwedurenymy roiremyhỹre. ¹¹ Kia wesemy diwarawyònydenyde myy: ‘Deuxu biu wedumy bede wedumy deòdumy iny boho roiremyhỹ, kaa heto Templo juhuu Isaeli iòlò wihikỹ riwinyre dori wiji heka retỹmyranyrenyre. ¹² Iny labiereny heka juhuuDeuxu riykaradỹỹnyrenyre dori, tai tii Babiloniasu iòlò Nabukodonoso-ò Isaeli mahãdu riwahinyre, tai heka Babiloniasu-ò ridyrenyre. ¹³ Ihãre heka Babiloniasu iòlò ijõ Siro, iòlòna sohoji beòrau heka, tyyriti riwinyre heka ixinamy Deuxu heto Templomy rikitỹmyranyrenykremy riteònyre. ¹⁴ Tiile Siro iòlò heka ibutu Nabukodonoso Deuxu heto Templo ribi aõna õna riwyre Babilonia surioko heto-ò risỹnyre heka kia womati tỹrỹrỹhỹkỹ, womati tỹrỹrỹhỹkỹ ura, ibutu aõna õna riwyre heka Dario iòlò ixybyle riwahinyre ibutumy Sebasá-ò tule tamy risỹnyre heka Judá wedumy ratxikremy. ¹⁵ Iòlò Sebasá-ò rarybere heka kia aõna õna ibutu Jerusalĕ-ò ritidikremy, Deuxu heto Templo ritỹmyranykremy iwese juhuu tai roire iwesemy. ¹⁶ Tai dori nade Sebasasi heka Deuxu heto Templo dena riwinyre heka Jerusalĕ-kile. Idihyy inyõ mahãdu idi raõmysỹdỹỹnymyroiremyhỹ, ihãre rexihuõhyyre dori’. ¹⁷ “Iòlò-ò arexitòenyrenyre heka tamy awire-ki heka Babilônia iòlò mahãdu tyyriti-ki ihetxina-ò rijerenykremy, itxi raharenykremy kia tyyriti Siro iòlò heka rityyritinyreu heka riteònyreu Deuxu heto Templo ritỹmyranyrenykremy, Jerusalĕ hãwã-ò. Idi heka iòlò inydeereny rarybekre kia rybemy inatyhy aõbo raremyhỹ”.