¹ Yaawä Saúl cönennacai Filisteo aje'cadööcomo jonno, edääje cönä'döa'to chäwwä: "David chuutaca na eduuwa jata'jemjönö aca Engadi ñña" quee cönä'döa'to. ² Yääje mma yaawä Saúl cönääma'täi aaduwaawä miide (3.000) tösootoi Israelita cönaadäicho David ujiiye, shootoi ujiiyeiñe mmaja, cabra'jödö de'cäi cöntänto. ³ Cönä'döicho oveja cudaada aca ewöta'como döiñanñe, ääma naca, yäätä mmaja cönä'ja'dea ya'tadö'jano täju o'cäi. Yaadö aca Saúl cönoomomöi iweecajä'e. Yää ya'tadö aca David cönä'ja'to tösootoi jadäiñe yaatajiimajä'a'como. ⁴ Ñanno dhanwacomo David sotoi edääje cönä'döa'to chäwwä: "Mädä cöneecammaacä Awaanadiiyö cöna'deuwa'dö äwwä edääje cönä'döa'dawä: 'öwö wu'a'de ätu'dedö adhenwawä, amäädä mödöiye yaawä ämjummadö woije, aaquene tödö'se manä' quee cönä'döa'dawä," quee cönä'döa'to chäwwä. Yaawä David cönammöi tacaade'da Saúl wadäädä cöntämä yaawä, yoomö e'jiyö cönaacätäi adäädö jemma. ⁵ Yää 'jeje David cone'da cönä'jaacä Saúl womö e'jiyö acäätä'jödö weijäcä töwwä. ⁶ Töwö cönä'döaacä tösootoi wäiñe: "Waanadiiyö ännöjo'da ne'ñojo mädä tödö'se waadö, yeedhajä onnontä'da weichö ca mädä, aaquene mädä wa'cä yeedhajä onnontä'da wanä" quee cönä'döaacä. ⁷ Mädääje David tösootoi wäiñe cöna'deuwöi Saúl aneema'da yeichöcoomo wetä, Saúl cönammöi chea yaawä, cöneja'cai täju o'cäiño töttädö wetä. ⁸ Mädä 'jeje David cönammöi chea cöneeja'cai täju o'cäiño, töwö cöna'dejai yaawä Saúl: "caajichaanai" quee cöna'dejai, Saúl cönä'jedennacai yaawä chäwwadäädä, David tu'dhe cönä'döi nono wadäädä, tönoiñe töneene töweichö cöneenejoi. ⁹ David cönä'döaacä Saúl wwä: "¿ane'cätoojo töneeta määnene inñammädä'como dhanwacomo a'deddu: 'Eneecä'ma, David ädhuujiya adhaiju'jätöödö wetä' que'como wä'dödö?. ¹⁰ Edä anooto awä adheenudu que meneeanä öwwä adheematoojo Waanadiiyö nutui, yenwawä mä'jaanä täju o'cäi cä'jaatodawä. Anejjacoomo sootoi edääje nä'döanto; "emaacääne" que, yaawäne' adheema'da weiya yaawä, edääje wä'döaanä: 'öwö mmaane ännö'da wa, yeedhajä emaajai'cha wa, Wanaadi ne'tädööje yeijäcä', quee wä'döaanä. ¹¹ Eneecä'ma jaaja'cä owoomö sedei'jödö acä'ajä yenwawä naadö, she'caasa'cä mma wacäätäi adheema'da weichö wetä, odhoowanääcä ne'ñojo adheema'se'da weichö, äjääcä cone'da'da wa, cone'da a'deuwö'da mmaja wa dea, amäädä mmaane yuujichä määnene ye'ma'se aweijäcä. ¹² Wanaadi mma dhowaanäcä na öwö weichö, amäädä aweichö mmaja, acaanadööje wäämatoojo jeiñenma, öwö mmaane mädääje chö'tajäätö'da wa adheematoojo jäcä. ¹³ Proverbio jäcä nä'döadöje yää Wanaadi a'deddu ecammannamo nimennä'jäcoomo: 'Ñanno conemjöncomo jonnoiñe conemjönö ne'a,' quee imennaajä naadö. Mädääje yeijäcäjeene öwö yamäädö que adhaiju'jaicha wa. ¹⁴ ¿Ane'cädööe Israelita cajiichanaichomo töweja'ca weneene?¿änääcö mujiiyanä?¡Sö'na wäämaajä ja!¡Shi'chaminñe! ¹⁵ Wanaadi ñe ñäädä waanontänä edhaajä töwö dhowanäcä na amäädä aweichö, öwö weichö mmaja, töwö nene'ma yeeda'cha dea ojonno aashicha öttätoojo. ¹⁶ Yääje mma yaawä David töwa'deuwödö cönä'cai Saúl wwä, Saúl cönä'döaacä: "¿mädä awa'deuwödö wetai amäädä önnedö David?" Saúl töcä'de cönaamoi yaawä. ¹⁷ Töwö cönä'döaacä David wwä: aashichaato amäädä öwö ye'jodheema äjääcä conemjönö önnö'jödö mencwanno'joi aashichaato mödöi jääcä conemjönö tödö'jödö weichaame äjääcä. ¹⁸ amäädä mmaane aashichaato mödöi jääcä edä anooto yeema'da meiya, Wanaadi wwä utu'jödö yeichaame yeematoojo äwwä. ¹⁹ Tutu'dedö edanta'jäcä dhanwa wwä, ¿aneema'da tönaadojo töweiye nai? Wanaadi mma adheejema'de edä anooto awä aashichaato yöödö'jödö weijäcä äwwä. ²⁰ Yoowanääcä na Israelita cajiichanaichomo je aweichö, aashicha me'se'taato'de chäänönge tödööcoto'de. ²¹ Wanaadi netaadöje ecammacä öwö wäjimmä'tädö aneematäiñe'da aweichojo, jaaja e'saca naatoodö ämjajo'daiñe eichä'de. ²² Mädääje David cönnöi Saúl necamma'jödö nönge, yää' jeje Saúl cöntämä tä'saca David mmaane cönäncui täju do'taca shootoi dhanwacomo mmaja, töwootone'täto'como aca.