¹ Yääje mma yaawä Naiot ñanno David cönäänejei Jonatan döiña cönä'döa'cä chäwwä: "¿Ane'cäämö conemjönö wödööne? ¿Ääshono conemjönö önnö'jödö jo'tädööje yeemase oomo nai? Quee cönä'döa'cä. ² Jonatan cöne'cujä'acä: "Äämada ma'de amäädä. Eneecä'ma, jaaja öwwä tacaade'da ane'cäcä ännö'da töwö weneene. ¿Mädääje ädhöödödö öwwä aneecammada eichö deade? yääje'da na'de." quee cönä'döa'cä Jonatan David wwä. ³ David jäduuje cönääcammacä yaawä, edääje töwä'döancädä: "Awaacöje weichö dhowaanäcä na töwö, töwö nichö'tajä'a: 'Jonatan owaanäcä'da edä neiñojo, cone'da mma ä'döjoono.' quee cönä'döa'cä. Äwwä ääcammada yeichame, yoowanääcä na eduuwa wäämatojo dö'tä weichö. Nudä Wanaadi weichöjoi, amäädä aweichö joi mmaja, mädääje wääcamma, quee töwä'döancädä." ⁴ Jonatan cönä'döa'cä: "Ämjunmadö woije wödööade, äjääcänchädä quee." ⁵ David cöne'cujä'acä: "Eneecä'ma jenamma naajunta nuunä eduuwato. Wääneneedöje'da wäwashinchädaawä cajiichana je'taca a'que wa'de öwö yaawä. Owoijatooje yääje yeijäcä chuu taca wootone'ta'de aaduwawäto anooto comomöödawä tödööene. ⁶ Oomo wwä adhecanmaja'jäcä, edääje caichä'de chäwwä: Öwwä töwö cöneecatäi a'dhe mma töjaatacäi töötätojo, weduuto waadäiñojo sacrificio tödöödö wetä, tameedä äjimmä yäätä Belen ña ye'juuma'jocomo weijäcä." ⁷ Chänönge mädääje na: Quee yä'döa'jäcä , "täncanoode'da eijaiwa yaawä" öwö adhaanonö. Yaawäne yäätöma'jäcä cowaanäcä na'de yaawä jääcä conemjönö tödö'se dea yeichö. ⁸ Wentumje cöneecä öwö adhanonö, Wanaadi netaadöjeene öwwä äwääcamma'tö'da. Dhada'quene conemjönö dha'me äwwä tö'ta'jäcä, eetä dea mma cämaacä; ¿Oomo wadäädä mma canaadäi che? que cönä'döa'cä David Jonatan wwä. ⁹ Jonatan cöne'cujä'acä: "¡Mädääje daane cöweichojo na. Äjääcä conemjönö tödö'se jaaja weichö eta'jäcä öwwä, ¿Äwwä aneecamma'da eijai tö´taanä? quee cönä'döa'cä Jonatan. ¹⁰ yaawä David cönä'döacä jonatan wwä: "¿tääde'cwade oomo adheccujä'a'jäcä, änääcä öwwä ecammajai ñai yaawä? quee. ¹¹ "Cömaatäiye woi acä cötäiye." A'nädäncädä iiña cönäämatäicho yaawä. ¹² Yääje mma yaawä Jonatan cönä'döa'cä David wwä: "Ya'de'ddu Israelita Wanaadiyööcomo Wanaadi neta'ñojo eduuwa. Jenamma jeiñe mma, aaduwaawäto anooto ai jeiñe mma , äjääcä jaaja wecamma'ja'de. Aashicha chäwwä ye'cujä'ajäcä, odhoowanäcä yeichö wetä ecammanei ädöiña wenno'ja'de yaawä. ¹³ Dha'da'quene coneeda ädhöödöse yeiyajäcä, Wanaadi amaamicha'ñojo'de. jaata wännöäwäänejedö wetä äwwä ecammanei anaanontädä weiyajäcä. Täncanoode'da sadänno täjai mma yaawä. Wanaadi adhedachojo'de, jaaja töneedaichä cönä'ja'dö je dea. ¹⁴ Nudä dea weiya'jäcä öwö, wentumje yeeneancädä Jehova woije aashicha cödööcä'de, äämäa'da weichö wetä. ¹⁵ Edä mmaja e'catä'se wa äwwä, jaaja atöödöcomo aashicha tödööcäto'de aweichödä je, Wanaadi woije tameedä ätu'detännamo äwwä chaanacajäcäiñe , äjimmä antawaiñe yeetoö ätäncwanno'jo'da nei'ñojo'de; quee cönä'döa'cä Jonatan David wwä. ¹⁶ Mädääje David wäjimmä'tädö jäcäiñe Jonatan cönääcammai, cönä'döa'cä: "Mädääje chäwwäiñe ñaa döa'jäcä, Wanaadi woije tutu'de'tännamo nichana'caiñato de; quee töwä'döa'ncädä." ¹⁷ Mädääje Jonatan aacädeeto David wääcanmadö cöne'catäi töwwö tujinne yeijäcä. Töwä'jummadö wa'cä dea töwö cunjummaacä David. ¹⁸ Yaawä Jonatan cönä'döa'cä chäwwä: ¹⁹ "Jenamma na'de eduuwato nuunä. A'que adheedätätaicho yaawä, taase'da adha'täi yeijäcä. Aaduwaawä anooto ai ädhä'täcä'de awa'de owootone'tä'jödö döiña dea, Ezel ñano täju dö'tä cöwoono'cä'de. ²⁰ Aaduwaawä shimaada wenno'ja'de yaawä ädö'tä yeejucadö wetä, töwäädö wäämu'cadö nönge mma. ²¹ Amu'neije dhanwa'cä wenno'ja'de yaawä shiimada eijä'ta; quee wä'döa'ncädä, eesedä'cä shimaada na; Äjääne eijä'ta,' Quee wä'döa'jäcä, täncanode'da döiña e'jaima yaawä, äjääcä conemjönö'je'da yeijäcä. Wanaadi nudä weichojoi yääje wääcamma. ²² Dha'da'quene dhanwacä wwä edääje wä'döa'jäcä: 'Ene'cäma, maadädä'cä jeene shiimaada na ojonno,' quee ca'jäcä, äänejecä'de yaawä, Wanaadi adhenno'jatö'da. ²³ Edä ca'deuwaadö jäcä, Wanaadi cädäi'chä'ñojo'de yeichöödä je." ²⁴ Yaawä David cönootone'täi woi awä. Yääje mma yaawä nuunä eduuwaato je yä'döa'jäcä, cajiichana cönaatajimai pan täcuudu wwetä. ²⁵ Töweichö nöngeeda cajiichana Saul shuucu cönä'ja'cä jääjudu dö'tä. Jonatan cönammöi yaawä Saul nnäcä Abner watajiimadö wetä. David a'täi mmane ta'se'da dea cönä'jacä. ²⁶ Saul ä'cwätääda cönä'jacä, edääje cöntö'tajä'acä: "Amoijato töwwä ajoojo'jeje." ²⁷ Yääjejato anooto awä , chomomöödawä dha'täi ta'se'da dea Saul cöneedantäi. Cönä'döa'cä tönnedö Jonatan wwä: "¿Ane'cämö ene'nei Isai nnedö ääwashinchä eejö'da nai eduuwa, coiñadä eejö'da mmaja?" ²⁸ Jonatan cöne'cujä'acä: "David öwwä cöneeca'acä Belen ña töötätojo. ²⁹ Edääje öwwä cönä'döa'cä: 'Jaatacäi jimmä sacrificio nödö'ato. Dui ya'deeja ne. Aashicha äwwä yeeneajäcä, dui'chomo eene öötä'toojo we'ca'a quee cönä'döa'cä.' Yääje yeijäcä cajiichana meesai ye'wä ääwashinchä eejö'da na." quee cönä'döa'cä Jonatan. ³⁰ Yää eta'jäcä Saul jooje cönä'tömai, cönä'döa'cä Jonatan wwä: "¡Amäädä, woodi conemjönö nnedö amäädä! ¿Yoowanä'cä'da ca äwwä nichö'tanä ajöichöje Isai nnedö jummadö äwwä, aanö töwonquenjönö jöichö je mmaja? ³¹ Nono de'wä nudä Isai nnedö weichö wadadäädä cajiichana je ä'döjaicha mma amäädä. öwwadädä eneejocä eduuwa, äämaiye, quee cönä'döa'cä Saul Jonatan wwä. ³² Jonatan cöne'cujä'acä tömö Saul cönä'döa'cä: "¿Ane'cäämö e'nei äämajai ñai töwö?¿Äashano yää conemjönö iiñö'jödö? quee cönä'döa'cä. ³³ Yaawä chäwwadädä Saul sucuuji cöneemai etuunui'chädö wetä. Mädääje Jonatan owaanäcä cönä'döi David emaa'se yeichö. ³⁴ Töwäätömadö je Jonatan cönammöi yaaawä. Anoiñadäädä ääwashinchä'da cöneiyacä yaawä, tömö wwä töjöichanö'jo jödö weijäcä. ³⁵ Yää jenamma naadöje tuncu'nä'tä'jödö awä David ejoodöe Jonatan cöntämä woi aca mude'cä'cä tanoonö aacä. ³⁶ Chäwwä cönä'döa'cä: "Shiimada enno'ja'jäcä öwwä, eicha'de yaawä." quee. Yeeca'tömöödawä Jonatan shiimaada cönennojai dhowaajo. ³⁷ Enno'ja'jödö döiña dhanwa'cä wöta'jäcä Jonatan cöncä'tömöi: "¿Maadädä' jeene'da ca nai?" quee. ³⁸ Atamjä'maacä, tamjäneene adheeca'töncä, edennajä'tö'dane; quee mmaja. Dhanoonö'cä shiimada cönaamucui yaawä tädhajä wwadäädä adäädöje mma. ³⁹ Enee'ju'tojo je yeichö dhowaanäcä' da mudeecä cönä'jacä. Jonatan mma dhowaanäcä David mmaja. ⁴⁰ Jonatan töwaichadö cönu'jätöi chäwwä yaawä, cönä'döa'cä: "Äjääne, jataaca adääjä'ta; quee." ⁴¹ Iicha'jäcä, David cönammöi Jonatan döiña töötädööje mma. Aaduwaawäde tä'mudhe cönä'döi chäwwadädä. Tönwanno je dea cönä'suumaicho yaawä, töwaamoancädäiñe , David mmane jooje'cä jeene cönaamoi. Jonatan cönä'döa'cä David wwä: "Eduuwa ne täncanoode'da äjääne Wanaadi eetöjoi cöwääcammatö'da, edääje cöwä'döa'cädä: 'Wanaadi cöjaadä neiñojo'de, catöödöcomo jadäiñe mmaja yeichöödä je; quee." ⁴² David cönammöi tö'tädööje mma, Jonatan mmane jataaca cöneennacai.