¹ SAMUEL cönädöacä Saul wwä: Wanadi yennojai cajichanaje adhetä Israel jatawäiñe. Yääje yeijäcä etacä Wanaadi wadeuwödö ääwä. ² Edäje nädöa cajichana wanaadi amode edhajotoncomo: yowanäcä wödöne eduwa iyä Amalec cönnöichö Israel yänätojocomo, jatadö emadö awä. Ejitoiñanno töwejödawäiñe. ³ Yääje yeijäcä Amalec atödö yänätocoto, tujunneda äwwä neñat. Tamedä töjacoto'de, ñanno dhanwacomo, wodinñamo mmaja, mudeshicha mmaja, shushu joconchacomo mmaja, jaca, oveja mmaja, camello, burro mmaja. ⁴ Yaawä Saul soto quinijummaicho cömmecutoicho Talaim jatawä: 200 mide dhanwacomo töwewä'nätamo yujuducomoque, Diez mil dhanwacomo judhanñancomo. ⁵ Yaawä Saul cönädöi Amalec jatawä. Yätä cönwomocöicho chutajato awä. ⁶ yäjemma yawä saul cönädöacä quenita wäiña: adhejaca'täcä änwanno, äjajoda meichäye ejitonñano israelita weja dawäiñe ashicha tödöjocomo weijäcä adhadachoncomo wäiñe quee cönädöacä Saul quenita wäiñe. ñanno quenita cänäsancwajoicho yaawä Amalec atödö antawäiñe. ⁷ Yääje mma yawä tönwanno cömjajoicho ñanno Amalec atödöcomo Havila ñano jäcä shii wejacatojo döse naadö. ⁸ Yaawä cajichanacomo Agag nudä cönajoicho tameedä shotoi sauda que töjajodöcomo'jo. ⁹ Yääje mma yawä conemjönö Agag nödöjödö cönencwanno'joicho Saul shotoi mmaja, chäcönöcomo oveja, jaca mmaja, ñanno täjuiyacomo, tamedä ashichacomo mmaja töjajoseda cönäjato. A'quedecomo mane, töwödöjöcacomo mmaja cömjajoicho. ¹⁰ Yää jemma yawä wanaadi aded'du cönätai Samuel wwä. Edäje cönätacä. ¹¹ Saul cajichanaje ne'tädö jäcä cone'dawa. Jadäda töwöna eduuwa, wanontädö ännödä mmaja; que. Samuel joje coneda cönäjacä yawä. Iyää coijaicho wadadädä odaje wädönäje cönäjacä. ¹² Yääje mma yawä Samuel cönäjäi jenadädä yawanadawä, Saul acä töwädantädö wetä. Edäje Samuel cönädöato yawä: Carmel jödö decäi Saul wädöa'jäcä, töötotojo cönnöi. Cönennacai yawä Gigal ña töötädöjemma; que cönätäcammai chäwwä. ¹³ Yääje mma yawä Samuel cönejä Saul döiña. Yawä Saul cönädöacä chäwwä wanadi ashicha ädhödöñojo. dhade'ddu chänönge wödöne: que cönädöacä. ¹⁴ Samuel cönädöacä: "¿Aqueneto mädä jaa'nawä oveja wetömödö nätadö, jaca wetömödö mmaja?" que cönädöacä. ¹⁵ Saul cöne'cujätöi: "Amalec atödö ecönöcomo jödö canno, soto nenejödöcomo. Ashichacomo mma soto cönnejoto, ñanno oveja, jaca mmaja, awanadiyö wonoje sacrificio tuemöje. Ijimmotoncomo mmane ña cömjajoicho tamedädä. ¹⁶ Yääje mma yawä Samuel cönädöacä Saul: "Coiñadä wanadi öwwä cönecammaichö wecammañojo quee." Ecammacä nequene que cönädöacä Saul. ¹⁷ Samuel cönädöacä: "¿dhonoiñe ätötaquennawä jönca, israel atödö cajichanaichomoje mädöne wanadi woije dea; ¹⁸ Yaawä wanaadi adhanontäne , edäje töwädöancädä : "Amalec atödö conemjöncomo töjatantäcä. Iwänätocoto acoichadöcomo wacä quee adhanontäne. ¹⁹ Anequenei wanadi aded'du woije ännödä meiyaquene? inshomadöcomo wadädä adhennacane. Wanaadi emjatawä conemjönö mödöne; quee cönädöacä Samuel Saul wwä. ²⁰ Yääje mma yawä Saul cönädöacä Samuel wwä. Chänönge dajane wödöne wanaadi wanontädö, dhaded'du woije, töjaene wöjaneto Amalec atödöcomo chajichanaichomo. Agag mma wenene sadä. ²¹ Sotone chäcönöcomo'jödö sadä Gilgal ña cönnejätöicho, ñanno oveja, jaca mmaja, ashichacomo dea mma awanadiyö wonoje sacrificio tödötome. que cönädöacä Saul. ²² Yaawä Samuel cöneccujätöi cönädöacä: ¿sacrificio tödödö jaca mmaca wanaadi tacwaiñe eijai ñai taded'du anetada aweiyajäcä?, Enecäma, sacrificio tödödö ejodhecä yanontädö tödödö töweiye nai. Ashichato utudu ejodhecä mmaja nadea dhaded'du eta'se weiñä. ²³ Wanaadi jäcä wäjädutänä cone'dana, jöwaije weiñä wacä. Chutajä wademecödö wacä nadea dhaded'du etaseda weiñä. Wanadi aded'du ijomadö weijäcä äwwä, amädä cajichanaje aweichö jonno wanaadi ojo'madea; que cönädöacä Samuel Saul wwä. ²⁴ Yaawä Saul cönädöacä Samuel wwä: "Chänönge yäje mädöa. Conemjönö wödöne wanaadi wanontädö ännöda weiyaquene, amädä awanontädö ännöda mmaja, soto wiñontäneto. Injummadöcomo woije wödöne yaawä. ²⁵ Yaacä adhennacacä, cajichana wanaadi wiyademecöiye conenadiyö mmaja encwannojäcäde. ²⁶ Yaawä Samuel cönädöacä Saul. Ajadä ennacada wade: Cajichana aded'du ijummajödö weijäcä, töwö wanaadi mmaja ojomadea amädä israel cajichanaichomo jeda aweichö wetä. ²⁷ Yaawä Samuel wämatädawä Saul yomö jääcä cönajäi, yomö töshiichane. ²⁸ Yaawä Samuel cönädöacä: Edä anoto awä cajichaana adhenwajinñai Israelita cajichaichomo'je aweichö jono töwö nuade aneja soto adhejodhato wwä jene. ²⁹ Ñäädä ashicha Israelita ecadöcomo tödönei töwäduneda na, chötajätödö äncamjiacada mmaja, Taded'du äncamjiyada töwö na, soto jönö'ne töwö yeiyajä, ³⁰ Yääje mma yaawä Saul cönädöacä: "conemjönö öwwä tödöjödö weichame, edä jatawoncomo inchoncomo nenedöcomoje ashicha cänejocä, Israelita nenedöcomoje mmaja. Jadä adhennacacä cajichana awanadiiyö miyademecöiye." ³¹ Yaawä Samuel cönennacai Saul ncäcä mädäje Saul cajichana cönwademecöi. ³² Yääje mma yaawä Samuel cönädöacä: "öwwadädä Agag enetäcä, ñädä Amalicita cajichanaichomo. Agag cönnejoto chäwwadädä cadena tömöjä'e, Töwö cönädöacä "wämatojoje eijaicho töwejadäena eduwa chötadö."que cönädöacä. ³³ Samuel cöneccujätöi: "Iyää awaichadö que joje wodinñamo ennecajöncomo nönge mödöneto, äwämadö tujunne'na ennecajönö nönge mmaja anö weichö wetä." Yääje mma yaawä Samuel Aga cönacäjätöi wanaadi nenedöje Gilgal ña. ³⁴ Yaawä Samuel cöntämä Romaña, Saul mane täsaca cöntämä Guibeanña töweichojoiña. ³⁵ Yotonno mma Samuel ñädä Saul aneneda cöneiyacä töwämadö anotoichädö jona tödöene, töwadeuwe mmane cönäjacä Saul jäcä. Yaawä töwö cajichana coneda cönäjacä Saul ewacajödö jäcä Israel cajichanaichomoje.