¹ Yääje mma cajichana wanadi cönädöacä Samuel wä: ¿Ächännawäcäjene saul junne awamodö mäcataiche israelita acajichanaichomoje ucajödö weichame öwwá? Ännödö yetaijö chucannäcä shiimiche äjäne yawä. belen ñña isai döiña. Inñacomo antawäiñe wedantäne cajichanaje töweiyemö. ² Yawä samuel cönädöacä: "¿Aquene innña wötädöde öwö? saul wä etajäcäna, töwö yemajaiña yawä." cajichana cönädöacä: "Jaca nedöcä ennuenö anadäcä, "yääje caichäde cajichana wwä ashichato uue wene quee." ³ Ashichato öwwä tödödawä isai adejacäde, Yawä wenejade äwwä tödöemö. Amädä meetade ñädä necammadö." ⁴ Cajichana necammadö woije samuel cönnöi yawä cöntämä wedeiña. Yawä ñanno inchoncomo iyä jatawoncomo tötätänöngancädäiñe tönwanno cöntonto adejadö wetä cönädöato: "¿Ashichatoje aweajäca määdä?" ⁵ Töwö cönädöacä ashichatoje wejä que; Cajichana wonoje ashichato tödödö wetä weejä. Adheconecatäcä ätäcä jadä. "Yäje mma yawä töwö cönsancwajoi isai inñacomo maja yawä cönadejaicho ashichato tödödö wetä." ⁶ Yawä ñanno cönejoto, töwö cöneneacä ELIAB. Yawä töwödeamma cönädöacä cajichana netädö mädä nöchöta. ⁷ Yawäne töwö cajichana cönädöacä samuel wwä. "Inñataje yeichömma manenemai, cawä yeichö mmaja, mädhäjönöne ñadä. Cajichana nenema soto nenemadö nöngeda; sotommane neneme inñataje yeichömma yawa ne töwö cajichana nenema chäwanö. ⁸ Yaawä isai cönadejai Abinadab, Samuel jetaca. Yaawä Samuel cönädöacä: "mädhä jönö mmaja ñädädea cajichana netädö. ⁹ Yääjeje mmaja isai cönnejoichea Sama. Yääwä samuel cönädöacä : "mädhä jönö mmaja ñädädea cajichana netädö." ¹⁰ Aacä amojato (7) tönnacomo isai cönnejoto Samuel wadäädä. Yaawä samuel cönädöacä Isai wwä: Cajichana netädöjeda canno naato." ¹¹ Yääje'mma yaawä Samuel cönädöacä Isai wwä: " tamedädäcomo'ca canno ännacomo?" Töwö cöneccujä'acä: "tooni mma aquena dhacontoncomocä, yawäne oveja edachädöcomoje töwöna." Samuel cönädöacä Isai wwä: "Adejacä ejöiye; Töwö yädödöcä wacä atajimada caato." ¹² Yaawä Isai cönanontäi cönnejoto yawä. Yaawä cönedantäi inñataje, chänuducomo inñataje mmaja. Cajichana cönädöacä: "Määdäne ñädä, anöncä Cajichanaje etäcä." ¹³ Yaawä yuichoncomo nenedöcomoje Samuel cönannäjöi, yetaijödö yää shii ewötö, yaawä töwö cönetäi Cajichanaje. Yää anoto jonnoto'jödödä Cajichana Espiritu chäjadä cönäjacä. Yääjeje Samuel cöntämä Ramanña. ¹⁴ Yaawä Cajichana espiritui Saul cönennojai. Yaawä Cajichana jonnoto odosha ansudäneije chäjäcä cönäjacä. ¹⁵ Ñanno Saul sotoi cönädöato: "Enecäma, cajichana jonnoto odosha adhansuda. ¹⁶ Ajetacaña wenenedö ñaa anontäcä, shiiwo etönei ñaa anedantäiye cajichana jonnoto odoshancomo adhansudädawä. Töwö niyecwade ashicha mädöade yaawä. ^{17 18 19} Saul cönädöacä tösotoi wäiñe: anedantätäcä dhanwa ashicha ye'cwanei döiña menetäiye. Yääje mma yaawä toni dhanwa äjömanö cöne'cujäacä cönädöacä: Tönene wa ñäädä Isai wedenñano nedö, Ashicha inñe'cwadö töwö, ashicha mmaja yadeuwödö dhanwa töwewänätoto mmaja, jäduje, tösadeda mmaja, Cajichanane chajadä yeiyajä. Inñataje mmaja töwö: quee cönädöacä. Yääje mma yaawä Saul tösotoi cönennojaicho Isai döiña, edääje dhadeddu ecammadö wetä: "Ännedö David ööwadädä ennojacä, ñäädä oveja jadäiñe nadö:" quee. ²⁰ Isai burro cönajäi yaawä, yewä cönnöi uu, vino mmaja, oveja nedöcä mmaja. Yaawä töwö cönennojai tönnedö David Saul döiña. ²¹ Yääja mma yaawä Saul döiña David cönädöi shotoije cönädöjoi yaawä. Saul yacöje cönäjacä joje, töwaichadö adäneije cönetäi. ²² Isai wadädä Saul cönanontäichea cönädöacä: Ännedö David jadä neñojode wacöje wenemane quee. ²³ Yawä wanaadi jonnoto odoshajato Saul ansudädawä, David tönannäe töweiye cönäjacä iyä jantuda, töiñe'cwa cönäjacä Saul äächadä töwädöe cönäjacä yawä.