¹ Paminawa kini, mga pari! Hatagig pagtagad, panimalay sa Israel! Paminaw, panimalay sa hari! Kay ang paghukom moabot batok kaninyong tanan. Nahimo kamong lit-ag ngadto sa Mizpa ug pukot nga gibukhad ibabaw sa Tabor. ² Ang mga rebelde nagtindog ilalum diha sa pagpamatay, apan silotan ko silang tanan. ³ Nakaila ako kang Efraim, ug ang Israel wala matago gikan kanako. Efraim, karon nahimo kang sama sa babaye nga nagbaligya ug dungog; nahugawan ang Israel. ⁴ Ang ilang mga binuhatan dili motugot kanila sa pagbalik sa Dios, tungod kay anaa kanila ang hunahuna sa pagbaligya sa dungog, ug wala sila makaila kang Yahweh. ⁵ Ang garbo sa Israel ang nagpamatuod batok kaniya; busa ang Israel ug ang Efraim mapandol sa ilang pagkasad-an; ug mapandol usab ang Juda uban kanila. ⁶ Mangadto sila uban sa panon sa ilang mga karnero ug baka aron sa pagpangita kang Yahweh, apan dili nila siya makaplagan, tungod kay gipahilayo niya ang iyang kaugalingon gikan kanila. ⁷ Wala sila nagmatinud-anon kang Yahweh, tungod kay nag-anak sila ug dili ilang mga anak. Karon ang pistas sa bag-ong bulan magatukob kanila uban ang ilang mga kaumahan. ⁸ Patingoga ang budyong sa Gibea, ug ang trumpeta sa Rama. Patingoga ang singgit sa panaggubat sa Bet Aven: 'Kami magsunod kanimo, Benjamin!' ⁹ Mahimong biniyaan ang Efraim sa adlaw sa pagbadlong. kauban sa mga tribo sa Israel akong gipahayag ang sigurado nga mahitabo. ¹⁰ Sama niadtong nagsibog sa utlanan nga bato ang mga pangulo sa Juda. Ibubo ko kanila ang akong kapungot sama sa tubig. ¹¹ Gidaug daug ang Efraim; madugmok siya sa paghukom, tungod kay miuyon siya sa paglakaw sunod sa mga diosdios. ¹² Busa mahimo akong sama sa mananap ngadto sa Efraim, ug sama sa pagkadunot ngadto sa balay sa Juda. ¹³ Sa dihang nakita sa Efraim ang iyang balatian, ug nakita sa Juda ang iyang samad, unya miadto ang Efraim sa Asiria, ug nagpadala ang Juda ug mga mensahero ngadto sa bantogang hari. Apan wala siya makahimo sa pagtambal kaninyo nga katawhan o sa pag-ayo sa inyong samad. ¹⁴ Busa mahimo akong sama sa liyon ngadto sa Efraim, ug sama sa batan-ong liyon ngadto sa balay sa Juda. Ako, bisan ako, mokuniskunis ug magpalayo; pagabitbiton ko sila, ug walay bisan kinsa nga makaluwas kanila. ¹⁵ Molakaw ako ug mobalik sa akong dapit, hangtod nga ilhon nila ang ilang pagkasad-an ug mangita sa akong panagway, hangtod nga tinud-anay nila akong pangitaon diha sa ilang kalisdanan."