¹ Paminawa ang pulong ni Yahweh, kamong katawhan sa Israel. Adunay sumbong si Yahweh batok sa mga lumulupyo sa yuta, tungod kay walay pagkamatinud-anon o pagkamatinud-anon sa kasabotan, walay kahibalo sa Dios diha sa yuta. ² Adunay pagtunglo, pagpamakak, pagpatay, pagpangawat ug pagpanapaw. Gisupak sa katawhan ang balaud sa nagkalain laing paagi, ug sunodsunod ang pagpa-agas sa dugo. ³ Busa nagbangutan ang yuta, ug nangaluya na ang mga nagpuyo niini; ang mga bangis nga mananap sa kaumahan ug ang mga langgam sa kawanangan, gipanguha bisan paman ang mga isda sa kadagatan. ⁴ Apan ayaw tugoti nga adunay mokiha; ayaw tugoti ang bisan kinsa nga mamasangil sa ubang tao. Tungod kay kamo, nga mga pari, ang akong gipasanginlan. ⁵ Mangapandol kamong mga pari panahon sa adlaw; mangapandol usab uban kaninyo ang mga propeta panahon sa kagabhion, ug pagalaglagon ko ang inyong inahan. ⁶ Mapukan ang akong katawhan tungod kay kulang sila ug kahibalo. Tungod kay kamong mga pari gisalikway ninyo ang kahibalo, isalikway ko usab kamo kanako ingon nga mga pari. Tungod kay gikalimtan ninyo ang akong balaod, bisan ug ako inyong Dios, kalimtan ko usab ang inyong mga anak. ⁷ Sa dihang nagkadaghan ang mga pari, midaghan usab ang ilang pagpakasala batok kanako. Ilang gibaylo ang ilang kadungganan sa kaulawan. ⁸ ilang gihimong pagkaon ang sala sa akong katawhan; sila hakog labaw pa sa ilang kasal-anan. ⁹ Managsama lamang ang katawhan ug ang mga pari: Silotan ko silang tanan sa ilang mga tinuohan; ug pabayron ko sila sa ilang mga binuhatan. ¹⁰ Mangaon sila apan dili kini igo; nagbuhat sila ug pagbaligya sa dungog apan dili managhan, tungod kay mihunong sila sa pagpaminaw kang Yahweh. ¹¹ Pagbaligya ug dungog, bino, ug bag-ong bino, nga maoy nagkuha sa ilang panabot. ¹² Nangutana ang akong katawhan sa ilang kahoy nga mga diosdios, ug ang ilang mga sungkod naghatag kanila ug mga pagpanagna. Ang spirito sa pagbaligya ug dungog maoy nagpahisalaag kanila, ug namuhat sila sama sa nagbaligya ug dungog imbis magmatinud-anon sila sa ilang Dios. ¹³ Nagsakripisyo sila sa ibabaw sa kabukiran ug misunog ug insenso sa kabungtoran, ilalom sa mga kahoy nga tugas, mga alamo, mga roble, tungod kay landong kini. Busa naghimo ug malaw-ay nga pagpakighilawas ang inyong mga anak nga babaye, ug nakapanapaw usab ang inyong umagad nga mga babaye. ¹⁴ Dili ko silotan ang inyong mga anak nga babaye sa dihang gipili nila ang paghimo ug malaw-ay nga pagpakighilawas, ni ang inyong umagad nga mga babaye sa dihang manapaw sila. Tungod kay gihatag usab sa mga lalaki ang ilang kaugalingon ngadto sa mga babaye nga nagbaligya ug dungog, ug nagsakripisyo sila aron makabuhat sila ug hugaw nga pakighilawas uban sa mga babaye nga magbaligya ug dungog. Busa pagalaglagon ko ang katawhan nga wala nakasabot. ¹⁵ Bisan tuod nakapanapaw kamo Israel, hinaot dili mahimong sad-an ang Juda. Ayaw pag-adto sa Gilgal, kamong katawhan; ayaw pagsaka sa Bet Aven, ug ayaw panumpa, sa pag-ingon, "Ingon nga buhi si Yahweh." ¹⁶ Tungod kay ang Israel nanagawi sa pagka gahig ulo, sama sa nating baka. Unsaon man ni Yahweh pagdala kanila ngadto sa sibsibanan sama sa mga karnero nga anaa sa lunhaw nga sagbot? ¹⁷ Si Efraim nakighiusa sa iyang kaugalingon sa mga diosdios; biyai siya nga nag-inusara. ¹⁸ Bisan tuod ug nawala na ang ilang isog nga ilimnon, nagpadayon gihapon sila ug panapaw; gihigugma pag-ayo sa iyang mga pangulo ang ilang kaulawan. ¹⁹ Ang hangin moputos kaniya diha sa iyang mga pako; ug mapaulawan sila tungod sa ilang mga halad.