¹ "Sa dihang si Israel batan-on pa gihugugma ko na siya, ug gitawag ko siya nga akong anak pagawas sa Ehipto. ² Kung sigihon sila sa pagtawag, mosamot hinuon nga magpalayo sila kanako. Naghalad sila ngadto sa mga Baal ug nagsunog ug mga insenso ngadto sa mga diosdios. ³ Bisan kon ako mao ang nagtudlo kang Efraim sa paglakaw. Ako mao ang nag-isa sa ilang mga kamot, apan wala sila nasayod nga ako ang nag-ayo kanila. ⁴ gigiyahan ko sila gamit ang pisi sa katawhan, uban ang higot sa gugma. Para nila ako sama sa usa ka nagpagaan sa yugo sa ilang apapangig , ug miyukbo ako ngadto kanila ug gipakaon sila. ⁵ Dili ba sila mobalik sa yuta sa Ehipto? Dili ba sila dumalahan sa Asiria tungod kay midumili sila sa pagbalik kanako? ⁶ Mahagbong ang espada ngadto sa ilang mga siyudad ug moguba sa mga ali sa ilang mga ganghaan; moguba kini kanila tungod sa kaugalingon nilang mga plano. ⁷ Ang akong mga katawhan desidido sa pagbiya kanako. Bisan pa ug mosangpit sila sa Labaw nga Makagagahom, walay usa nga motabang kanila. ⁸ Unsaon man nako pagbiya kanimo, Efraim? Unsaon man nako pagtugyan kanimo, Israel? Unsaon ko man paghimo kanimo nga sama kang Adma? Unsaon ko man paghimo kanimo nga sama kang Zeboim? Ang akong kasingkasing nausab sa sulod nako; ang akong kaluoy napukaw. ⁹ Dili ko ipahamtang ang hilabihan ko nga kasuko; dili ko na usab gub-on si Efraim. Tungod kay Dios ako ug dili tawo; ako mao ang Balaan taliwala kaninyo, ug dili ako moanha uban ang kapungot. ¹⁰ Sila mosunod kang Yahweh; ug mongulob siya sama sa liyon. Sa dihang mongulob siya, mangabot nga magkurog ang iyang mga anak gikan sa kasadpan. ¹¹ Moabot sila nga magkurog sama sa mga langgam sa Ehipto, sama sa salampati nga gikan sa yuta sa Asiria. Papuy-on ko sila sa ilang mga balay- mao kini ang giingon ni Yahweh. ¹² Si Efraim gilibutan uban sa mga bakak, ug ang panimalay ni Israel uban ang pagpanglimbong. Apan si Juda padayon nga nag-uban kanako, ang Dios, ug nagmatinud-anon kanako, ang Balaan."