¹ Ang Israel usa ka mahimsog nga ubas nga nagahatag sa iyang bunga. Samtang nanaghan ang iyang bunga, mas nanaghan usab ang mga halaran nga iyang natukod. Samtang nanaghan ang bunga sa iyang yuta, mas nahimong maayo ang iyang mga haligi. ² Malimbongon ang ilang kasingkasing; karon kinahanglan nga antoson nila ang ilang pagkasad-an. Bungkagon ni Yahweh ang ilang mga halaran; gub-on niya ang ilang mga haligi. ³ Tungod kay magasulti sila, "Wala kamiy hari, tungod kay wala kami nahadlok kang Yahweh, ug ang hari—unsa man ang mabuhat niya alang kanamo?" ⁴ Nagsulti sila ug haw-ang nga mga pulong ug nagabuhat ug mga kasabotan pinaagi sa bakak nga pagpakigsaad. Busa ang hustisya magaturok sama sa makahilo nga mga sagbot sa mga tudling sa kaumahan. ⁵ Ang mga lumulupyo sa Samaria mangahadlok tungod sa mga baka sa Bet Aven. Nagsubo ang mga tawo alang kanila, sama niadtong mga pari nga nagsimba sa mga diosdios nga nagmaya tungod kanila ug sa ilang kahalangdon, apan wala na sila didto. ⁶ Pagadad-on sila sa Asiria ingon nga gasa sa bantogang hari. Mapakaulawan ang Efraim, ug ikaulaw sa Israel ang ilang diosdios. ⁷ Ang hari sa Samaria pagalaglagon, sama sa tipak sa kahoy nga naglutaw sa tubig. ⁸ Ang taas nga mga dapit sa pagkadaotan pagagun-ubon. Mao kini ang sala sa Israel! Ang mga tunok ug sampinit motubo sa ilang mga halaran. Magasulti ang katawhan sa mga kabukiran, "Taboni kami!" ug sa mga kabungtoran, "Tumpagi kami!" ⁹ "Israel, nakasala kamo sukad pa sa kapanahonan sa Gibea; didto nagpabilin ka. Dili ba maapsan sa gubat ang mga anak nga lalaki sa kasaypanan didto sa Gibea? ¹⁰ Sa dihang tinguhaon ko kini, disiplinahon ko sila. Magtigom ang mga katawham batok kanila ug gapuson sila tungod sa ilang doble nga kasal-anan. ¹¹ Usa ka tinudloang nating baka ang Efraim nga mahigugmaong mogiok sa trigo, busa pagabutangan ko ug yugo ang iyang liog. Butangan ko ug yugo ang Efraim; magdaro ang Juda; pagabirahon ni Jacob ang karas sa iyang kaugalingon. ¹² Pagtanom ug pagkamatarong alang sa inyong kaugalingon, ug aniha ang bunga sa matinud-anong kasabotan. Bungkala ang inyong wala nadaro nga yuta, tungod kay mao na kini ang panahon sa pagpangita kang Yahweh, hangtod nga moabot siya ug magpaulan ug pagkamatarong diha kaninyo. ¹³ Nagdaro kamo ug pagkadaotan; nag-ani kamo ug waly hustisya. Gikaon ninyo ang bunga sa pagpanglimbong tungod kay nagsalig man kamo sa inyong mga plano ug sa inyong daghang mga sundalo. ¹⁴ Busa motugbaw ang kagubot taliwala sa inyong katawhan, ug pagalaglagon ang tanan ninyong lig-on nga mga siyudad. Mahimo kining sama sa paglaglag ni Shalman sa Bet Arbel panahon sa gubat, sa dihang gipangwataswatas ang mga inahan uban sa ilang mga anak. ¹⁵ Busa mahitabo kini kaninyo, Betel, tungod sa inyong hilabihang pagkadaotan. Sa pagka kaadlawn ang hari sa Israel pagalaglagon sa hingpit ."