Kapitulo 9

1 Ayaw paglipay, Israel, sama sa kalipay sa ubang mga tawo. Kay wala ka nagmatinud-anon, mibiya sa imong Dios. Mahigugma kang mobayad ug suhol alang sa babaye nga nagbaligya ug dungog diha sa tanang mga salog nga giukanan. 2 Apan ang giukanan ug ang pug-anan sa bino dili mupakaon kanila; pakyason sila sa bag-ong bino. 3 Dili na sila makapadayon sa pagpuyo sa yuta ni Yahweh; hinuon, mobalik si Efraim sa Ehipto, ug moabot ang adlaw nga mokaon sila ug hugaw nga pagkaon didto sa Asiria. 4 Dili na sila mobubo ug halad nga bino alang kang Yahweh, ni makapahimuot sila kaniya. Ang ilang mga sakripisyo nahisama sa pagkaon sa pagbangutan: ang tanang mokaon niini mahugaw. Tungod kay ang pagkaon alang lamang sa ilang mga kaugalingon; dili kini moabot sa balay ni Yahweh. 5 Unsa man ang inyong buhaton sa gitakda nga kapistahan, sa adlaw sa kapistahan nga alang kang Yahweh? 6 Kay, tan-awa, kung makaikyas ba sila sa kadaot, ang Ehipto maoy motigom kanila, ug ang Memfis maoy molubong kanila. Kabahin sa ilang mga bililhong mga butang nga plata- ang hait nga mga tanom maoy manag-iya niini, ug mapuno sa mga tunok ang ilang mga tolda. 7 Nagsingabot na ang mga adlaw sa pagsilot; moabot na ang mga adlaw sa paghukom. Ipahibalo sa Israel kining mga butanga. Ang propeta buang-buang, ug ang dinasig nga tawo buang, tungod sa dakong sala ug dakong kasuko. 8 Ang propeta mao ang magbalantay sa akong Dios sa Efraim. Apan ang mga lit-ag nga alang sa langgam anaa sa tanan niyang agianan, ug ang pagdumot kaniya anaa sa balay sa iyang Dios. 9 Gihugawan nila pag-ayo ang ilang mga kaugalingon sama sa mga adlaw sa Gibea. Hinumduman sa Dios ang ilang mga kalapasan, ug silotan sila tungod sa ilang mga sala. 10 Miingon si Yahweh, "Sa dihang nakaplagan ko ang Israel, sama kini sa pagpangita ug mga ubas sa kamingawan. Sama sa unang bunga sa kahoyng igera sa panahon nga tingbunga niini, nakaplagan ko ang inyong mga amahan. Apan miadto sila kang Baal Peor, ug gitugyan nila ang ilang mga kaugalingon ngadto sa makauulaw nga rebulto. Nahimo silang sama ka hugaw sa rebulto nga ilang gihigugma. 11 Alang kang Efraim, molupad ang ilang himaya sama sa langgam. Wala nay pagpanganak, walay pagmamdos, ug walay pagpanamkon. 12 Bisan pa ug magdala silag mga bata, kuhaon ko sila aron walay mahibilin kanila. Alaot sila sa dihang motalikod ako kanila! 13 Nakita ko si Efraim, sama sa Tiro, gitanom sa balilihan, apan dalhon ni Efraim ang iyang mga anak ngadto sa tawo nga mopatay kanila." 14 Ihatag kanila, Yahweh unsa man ang ihatag mo kanila? Hatagi sila ug tagoangkan nga makuhaan ug dughan nga dili mohatag ug gatas. 15 "Tungod sa ilang pagkadaotan didto sa Gilgal, didto ako nagsugod sa pagdumot kanila. Tungod sa ilang dautang binuhatan, palayason ko sila sa akong balay. Dili ko na sila higugmaon pa; masinupakon ang tanan nilang mga opisyal. 16 Nasakit si Efraim, ug nalaya ang ilang mga gamot; dili sila makabunga. Bisan pa ug aduna silay mga anak, pamatyon ko ang ilang hinigugmang mga anak sa ilang sabakan." 17 Isalikway sila sa akong Dios tungod kay wala sila mituman kaniya. Maglatagaw sila sa mga kanasoran.