¹ در اَمی زمان شماری از حاضریا از جلیلیای اندِن که با عیسی حرف شو زَت که پیلاتوس خونییاشو را با خونِ قربانیاشو در هم آمیختَه اُشکِردِه . ² عیسی در پاسُخ اُشگُت ، آیا چون اَنَه جَلیلیا اَچِنین رُزی دُچار بُسِن گمان اَکُنی از بقیه اَهالیِ جلیل گناهکارتر اَندِن ³ اَ شما اَگواِم که اِندِه نی بلکه اَگَه توبَه نِکُنی شما نیز هَمگی هلاک اَبی ⁴ آیا گمان اَکُنی اَنَه هیجدَه تَن که بُرجِ سیلوام اَ رو اَنَیا کَت و مُردِن از دیگه ساکنیای اُرشلیم خطا کارتر اَندِن ؟ ⁵ اَ شما اَگواِم که اِندِه نی بلکِه اَگَه توبَه نَکُنی شما نیز هَمگی هلاک اَبی ⁶ پس اِ مَثلی شاو { مردی درختِ انجیری در تاکستانِ خوش اُشکاشت چون شَوِس میوَی اَنَه بِچینِه چیزی اُش نی اَند ⁷ پس اَ باغبونِ خوشش گُت سه سال اِسی بَرَی چِدَی میوَی اِ درختی دا اِم اما چیزی نَواجورِم اَنَه بِبُر تا خاک را هدر نِدِه ⁸ اما در پاسخ اُشگُت سَروَرَم اُنِس یَکسال دِگَه هم بو گِردُش اَکَنِم و کود شَه دَیم ⁹ اَگَه سال بعد میوَه شاو که هیچ اَگه اُش نیو دِگَه اَنَه بِبُر } ¹⁰ در یِکی از رُزِیای شبات عیسی در کَنیسه ای تعلیم شَه دا ¹¹ در اَنکَه زَنی اَند که روحی اَنَه هیجدَه سال علیل اُش کِردِسُن پُشتش خَمیدَه بُسُن هیچ جوری اُش ناشَیس راس وَیسِه ¹² چون عیسی اَنَش بینا اُشگُت بِدا اِنکِه و اُشگُت {ای زَن از ضعفِ خوت خلاص بُدِش } ¹³ پس اَ اَنَه دَس اُشنا و اَنَه بیدِرَنگ راس وَیسا خدا را ستایش اُشکِه . ¹⁴ اما رئیسِ کَنیسَه از اِدِه که عیسی در رُزِ شبات شفا اُش دَیسُن خشمگین بُیس و اَ مَردُم اُشگُت {شش رُز بَرَی کار تواِ در اَمی رُزی بَی و شفا بِگِری نه در رُزِ شَبات } ¹⁵ خداوند در پاسخ اُشگُت ای ریاکاریا آیا هیچ یک از شما در رُزِ شَبات گاو یا الاغِ خوش از طویلَه باز ناکُن تا بَرَی آو دَدَ اَ دَر بُبُی ؟ ¹⁶ پس آیا نباید اِ زَن را که دُتِ ابراهیم اِسی و شیطان هیجدَه سال اسیرش کِردِه در رُزِ شَبات از بند رها بُکُنِم ؟ ¹⁷ چون اِدِش گُت مخالفیاش هَمَه شرمسار بُدِن اما جمعیت همگی از هَمَهی کاریای شگفت آور اَنَه شادمان بُدِن ¹⁸ اَمی موقع اُشگُت پادشاهی خدا مِثِ چِه اِسی اَنَه اَ چه تَشبیه بُکُنِم ؟ ¹⁹ مانند دانَه ی خردلی اِسی که مَردی اَنَه اَ واسی و اَ باغ خوش اَکارِه اَنَه دونهَ روئید و درختی بُیس طوری که پَرندَیای آسمو داین و اَ شاخَه یاش آشیونَه اَسازِن ²⁰ باز اُشگُت پادشاهیِ خدا اَ چه تَشبیه بُکُنِم ؟ ²¹ مِثِ خمیر مایَه ی اِسی که زَنی اُشواسِه و با سِه کیسَه ی آرد مخلوط اُشکِه تا تمامی خمیر وَر اُند ²² عیسی در راه اورشلیم اَ شهریا و روستاییا اَچو و تعلیم شَه دا ²³ در میون اِدَیا کِسی از اَنَه اُش پُرسی { سَروَرِ مَه آیا تنها تعدادِ کمی از مَردُم نجات پیدا اَکُنِن } اَ اِدَیا اُشگُت ²⁴ سخت بِکوشی تا از در تنگ داخل ببی چون اَ شما اَگواِم خیلیا تلاش اَکُنِن تا داخل بِبن اما شو ناشا ²⁵ چون صاحب خونَه بلند وابو و در اَبَنِه اَ در اَوَیسی و در اَکوبی و اَگوی سَروَرُم دَر اَ رو اَما بِگُشا اما اَنَه پاسُخ اَدِه شمایا تو ناشناسِم نافَمِم از کجا اِسی ²⁶ اَگوای اَما با تو موخَه و مونوشی و تو در کوچی یای اَما تعلیم تَدا ²⁷ اما جواب اَشنُوی شما ناشناسِم نافَمِم از کجا اِسی از مَه دور ببی ای بد کاریا ²⁸ اَمی موقَعی اَمکِه گیریخ و دَندو رو هم سائیدَه اَبو چون ابراهیم و اسحاق و یعقوب و هَمَی انبیا در پادشاهیِ خدا اَبینی اما خوت را محروم اَبینی ²⁹ مَردُم از شرق و غرب و شمال و جنوب دا اِن و اَ سَر سُفرَی پادشاهیِ خدا اَنَین ³⁰ آری اِسن آخرینی که اول اَبِن و اولینی که آخر ³¹ در اَمی موقع چند نفر از فریسیا اَ پَلو عیسی اُندِن و شو گُت اِنکِه ترک بُکُن و اَ جای دِگَه برو چون هیرودیس شَوی اُت بُکُش ³² در جواب اُشگُت {اُچی و اَ اَنَه روباه بُگوی اِرُز و صَبا دیویا اَ دَر اَکُنِم و مَردُمیا را شفا اَدَیم و در رُزِ سِوم کار خویش را اَ کمال اَرَسَنِم ³³ اما اِرُز و صبا و پَس صبا باید اَراهِ خوت ادامَه آدَیم چون ممکن نی نبی دَر از اورشلیم کُشتَه ببو ³⁴ ای اورشلیم ،ای اورشلیم ای قاتل پیامبریا و سنگسار کُنندَی رسولیای که تَ پَلو فرستادَه اَبِن چند بار مَوِس مِثِ مرغی که جوجَی یاش اَ زیر بالیای خوش جَمع اَکُن فرزندیای تو را جَمع بُکُنِم اما اُت ناووِس ³⁵ حالا خونَی شما بَرَی خوتو خراب اَ وامَنِه و اَ شما اَگواِم که دِگَه مَه اُم نابینی تا رُزی که بُگوی مبارک اِسی اَنَه که بنامِ خداوند دا