8 ¹ Шундай экан, энди Исо Масиҳда юрганларга ҳеч қандай маҳкумлик йўқдир. ² Чунки Исо Масиҳдаги ҳаёт Руҳининг қонуни мени гуноҳ ва ўлимнинг қонунидан озод қилди. ³ Зеро Қонун тана орқали ҳолсизланиб, ожиз бўлиб қолгани учун, Худо Ўз Ўғлини гуноҳли танага ўхшатиб, Уни гуноҳ учун қурбонлик сифатида юборди ва танадаги гуноҳни маҳкум қилди, ⁴ токи Қонун талаб қилган ҳақлик бизда, яъни тана изми бўйича эмас, балки Руҳ изми бўйича юраётганларда амалга ошсин. ⁵ Чунки тана изми бўйича яшовчилар танавий нарсалар ҳақида, Руҳ изми бўйича яшовчилар эса руҳий нарсалар ҳақида фикр юритадилар. ⁶ Тана изми бўйича фикр юритиш – ўлимдир, Руҳ бўйича фикр юритиш эса – ҳаёт ва тинчликдир. ⁷ Тана изми бўйича фикр юритиш Худога душманликдир, чунки Худонинг Қонунига итоат қилмайди ва итоат қила олмайди ҳам. ⁸ Шунинг учун тана изми бўйича яшовчилар Худони рози қила олмайдилар. ⁹ Агарда Худонинг Руҳи сизларнинг ичингизда яшаётган бўлса, унда сизлар тана изми остида эмас, балки Руҳ изми остидасизлар. Кимки Масиҳнинг Руҳига эга бўлмаса, у Масиҳники эмасдир. ¹⁰ Агарда Масиҳ ичингизда бўлса, аъзойи бадан гуноҳ учун ўлик, аммо руҳ ҳақлик учун ҳаётдир. ¹¹ Агарда Исони ўликлардан тирилтирган Худонинг Руҳи сизларда жо бўлса, унда Масиҳни ўликлардан Тирилтирган сизларнинг ўлимли баданларингизни сизларда жо бўлган Ўзининг Руҳи орқали ҳам тирилтиради. ¹² Шунинг учун, биродарлар, биз тана изми бўйича яшаш учун танадан қарздор эмасмиз. ¹³ Агар тана изми бўйича яшасангизлар, ўласизлар. Агарда Руҳ билан аъзойи бадан ишларини ўлдирсангизлар, яшайсизлар. ¹⁴ Чунки Худонинг Руҳи билан бошқариладиганларнинг ҳаммаси Худонинг ўғилларидир. ¹⁵ Зеро сизлар яна қўрқувга йўналтирадиган қуллик руҳини қабул қилмадингизлар, лекин ўғиллик Руҳини олдингизлар. У билан биз Худони – Абба, Ота, деб чақирамиз. ¹⁶ Ана шу Руҳнинг Ўзи бизнинг руҳимизга, биз Худонинг фарзандлари эканлигимиз ҳақида гувоҳлик бермоқда. ¹⁷ Агарда фарзандлари бўлсак, унда биз меросхўрлармиз, яъни Худонинг меросхўрларимиз ва Масиҳнинг ворисдошларимиз – фақатгина Масиҳнинг азоб-уқубатларига шерик бўлсак, шундагина У билан улуғлана оламиз. ¹⁸ Чунки ўйлайманки, ҳозирги азоблар келажакда бизга очиладиган шуҳрат билан таққосланганида, ҳеч нарсага арзимайди. ¹⁹ Мана, ижод интизорлик билан Худо ўғилларининг ваҳийсини кутмоқда, ²⁰ (зеро ижод ўз ихтиёри билан эмас, балки бўйсундирувчи томонидан беҳудаликка бўйсундирилган), ²¹ чунки ижоднинг ўзи ҳам чириш қуллигидан озод этилиш ҳамда Худонинг фарзандларининг улуғвор эркинлигига эришиш умидига эгадир. ²² Чунки биламизки, бор ижод ҳозирга қадар биргаликда инграб азоб чекмоқда, ²³ ва нафақат ижод, балки биз ўзимиз ҳам Руҳнинг бошланғичига эга бўлиб, ичимизда инграяпмиз ва ўғил қилиб олинишимизни ҳамда аъзойи баданимизнинг қайта сотиб олинишини кутяпмиз. ²⁴ Чунки биз умидда қутқарилганмиз. Кўриниб турган умид эса умид эмасдир. Агар одам кўриб турса, у нима учун умид қилар экан? ²⁵ Аммо биз кўринмайдиган нарсага умид қилсак, шунда сабр-тоқат билан кутамиз. ²⁶ Шунингдек, Руҳ ҳам заифликларимизда бизга ёрдам бермоқда, чунки биз қандай ибодат қилиш кераклигини билмаймиз, аммо Руҳнинг Ўзи ифода қилиб бўлмас оҳ-нола билан биз учун шафоат қиляпти. ²⁷ Юракларни синайдиган Худо эса Руҳнинг фикрини билади, чунки Руҳ муқаддаслар учун Худонинг иродаси бўйича шафоат қиляпти. ²⁸ Шуни биламизки, Худони севганларга, Унинг мурод-мақсади бўйича даъват қилинганларга ҳамма нарса биргаликда яхшиликка хизмат қилади. ²⁹ Чунки Худо кимларни азалдан билган бўлса, ўшаларни Ўз Ўғлининг тасвирига ўхшаш бўлишларини олдиндан тайинлади, токи У кўп биродарларининг орасида тўнғичи бўлсин. ³⁰ Шунингдек, Худо кимларни олдиндан тайинлаган бўлса, ўшаларни даъват қилди; кимларни даъват қилган бўлса, ўшаларни оқлади; кимларни оқлаган бўлса, ўшаларга шуҳрат берди. ³¹ Хўш, биз бунга нима деймиз? Агар Худо биз томонда бўлса, ким бизга қарши? ³² Худо Ўз Ўғлини аямай, лекин ҳаммамиз учун Уни фидо қилган бўлса, У билан бирга ҳамма нарсани ҳам бизга ато қилмайдими? ³³ Ким Худонинг танланганларини айблар экан? Худо уларни оқлаяпти. ³⁴ Ким маҳкум қилар экан? Масиҳ ўлган эди, аммо тирилди. У ҳам Худонинг ўнг томонида ўтирибди, У биз учун шафоат қиляпти. ³⁵ Ким бизни Масиҳнинг севгисидан ажратар экан: қайғуми ё тангликми, ё қувғинликми, ё очликми, ё яланғочликми, ё хавф-хатарми ёки қиличми? ³⁶ Ёзилганидек: “Бизни Сен учун ҳар куни ўлдирмоқдалар, сўйишга маҳкум этилган қўйлардек ҳисобламоқдалар”. ³⁷ Аммо бизни севган Раббий орқали буларнинг ҳаммасидан биз ғолибдан кўра устунроқмиз. ³⁸ Чунки мен аминманки: на ўлим, на ҳаёт, на фаришталар, на ҳокимиятлар, на кучлар, на ҳозирги, на келажакдаги нарсалар, ³⁹ на баландлик, на чуқурлик, на бошқа бирон ижод бизни Раббимиз Исо Масиҳдаги Худонинг севгисидан ажратишга қодир эмас.