12 ¹ Шундай қилиб, эй, биродарлар, Худонинг шафқати билан сизлардан ўтинаманки: Худога идрокли хизмат қилишингиз учун аъзойи баданларингизни тирик, муқаддас ва Унга маъқул бўладиган қурбонлик қилиб бағишланглар. ² Бу дунё билан тенглашманглар, балки онгингизни янгилаш орқали тубдан ўзгаринглар, токи сизлар Худонинг яхши, маъқул ва комил иродаси нима эканлигини фаҳмлаб олинглар. ³ Менга берилган иноят бўйича сизларнинг ҳар бирингизга шуни айтяпманки: ўзингиз ҳақингизда керагидан ортиқ ўйламанглар. Аммо Худо ҳар бирингизга берган имоннинг миқдорига яраша камтарлик билан ўйланглар. ⁴ Зеро биз танада кўп аъзоларга эга бўлсак ҳам, бироқ ҳамма аъзоларимизнинг вазифаси бир хил бўлмаганидай, ⁵ худди шундай, биз ҳам кўпчилик бўлиб, Масиҳда бир танамиз, лекин алоҳида-алоҳида бўлиб, бир-биримиз учун аъзодирмиз. ⁶ Бизга берилган иноят бўйича ҳар хил инъомларга эгамиз. Шунинг учун, кимда пайғамбарчилик бўлса – имоннинг миқдорига яраша бўлсин; ⁷ хизмат инъоми бўлса, хизматда бўлсин; агар муаллимлик инъоми бўлса, таълим беришда бўлсин; ⁸ ким насиҳатчи бўлса, насиҳат қилишда бўлсин; тарқатувчи бўлса, соддаликда тарқатсин; бошлиқ бўлса, ғайрат билан бошчилик қилсин; меҳршафқат кўрсатувчи бўлса, хурсандчилик билан кўрсатсин. ⁹ Севгингиз риёсиз бўлсин. Ёвузликдан жирканинглар, яхшиликка ёпишинглар. ¹⁰ Биродарсеварликда бир-бирингизга нозик ҳис-туйғуларга эга бўлинглар, ҳурмат қилишда бир-бирингиздан ўзиб кетинглар. ¹¹ Ғайратда сусайманглар, руҳингиз билан алангаланинглар, Раббийга хизмат қилинглар. ¹² Умидда хурсанд бўлинглар, қайғуда сабр-тоқатли, ибодатда доимий бўлинглар. ¹³ Муқаддасларнинг муҳтожликларида иштирок этинглар, мусофирсеварликка интилинглар. ¹⁴ Сизларни қувғин қилаётганларни дуо қилинглар – дуо қилинглар ва лаънатламанглар. ¹⁵ Қувонаётганлар билан қувонинглар ва йиғлаётганлар билан йиғланглар. ¹⁶ Ўзаро ҳамфикр бўлинглар. Онгингизда такаббур бўлманглар, лекин камтаринлар даражасига тушинглар. Ўзбилармон бўлманглар. ¹⁷ Ҳеч кимга ёмонликка ёмонлик қайтарманглар. Ҳамма одамларнинг олдида яхшилик учун жон куйдиринглар. ¹⁸ Иложингиз борича ҳамма одамлар билан тинч-тотув бўлинглар. ¹⁹ Эй, севганларим, ўзларингиз учун қасос олманглар, аммо Худонинг ғазабига ўрин беринглар. Чунки ёзилган: “Қасос Меникидир, Мен ҳақини бераман,- дейди Раббий”. ²⁰ Шунинг учун: “Агар сенинг душманинг оч бўлса, уни тўйғаз; агар у чанқаган бўлса, унга сув бер. Чунки буларни қилиб, сен унинг бошига ёнаётган чўғни йиғасан.” ²¹ Ёмонликдан енгилмагин, аммо ёмонликни яхшилик билан енггин.