11 ¹ Шундай қилиб, деяпман: Наҳотки Худо Ўз халқини рад этган бўлса? – Йўқ, асло! Чунки мен ҳам Иброҳимнинг уруғи, Беняминнинг авлодидан бўлган исроилликман. ² Худо олдиндан билган Ўз халқини рад этмаган. Наҳот сизлар Ёзув Элийаҳ пайғамбар ҳақида нима айтаётганини билмасангизлар? У Исроилга қарши Худога арз қилиб, айтмоқда: ³ “Ё, Раббий! Сенинг пайғамбарларингни ўлдиришди, Сенинг қурбонгоҳларингни вайрон қилишди. Мен бир ўзим қолдим, менинг ҳам жонимни изламоқдалар”. ⁴ Худонинг жавоби унга нима демоқда? “Баалнинг олдида тиз чўкмаган етти минг эркакни Ўзим учун асраб қўйдим”. ⁵ Худди шундай, ҳозирги вақтда ҳам иноятнинг танлови бўйича қолдиғи бордир. ⁶ Агарда бу иноят бўйича бўлса, унда ишлар бўйича эмасдир; акс ҳолда, иноят энди иноят бўлмас эди. Агар ишлар бўйича бўлса, унда бу иноят эмасдир; акс ҳолда, иш ҳам иш бўлмас эди. ⁷ Унда нима? Исроил нимани излаган бўлса, шунга эришмади. Танланганлар эса эришдилар, аммо бошқалар тошбағир бўлдилар. ⁸ Худди ёзилганидек: “Худо уларга уйқу руҳини, ҳатто ҳозирги кунгача кўрмайдиган кўзларни ва эшитмайдиган қулоқларни берди”. ⁹ Довуд ҳам демоқда: “Уларнинг дастурхони улар учун тўру пистирма, тузоқ ҳамда қасос бўлсин. ¹⁰ Уларнинг кўзлари қоронғилашиб, кўрмайдиган бўлсин, беллари абадий букилган бўлсин”. ¹¹ Шундай қилиб, деяпман: Наҳотки яҳудийлар батамом йиқилиш учун қоқинган бўлсалар? – Йўқ, асло! Аммо уларнинг рашкини қўзғатиш учун уларнинг йиқилиши орқали мажусийларга нажот келди. ¹² Агар уларнинг йиқилиши дунё учун бойлик бўлса ва уларнинг мағлуб бўлиши мажусийлар учун бойлик бўлса, унда уларнинг тўлиқлиги нақадар кўпроқдир. ¹³ Эй, мажусийлар, сизларга айтяпманки, (мен мажусийларнинг ҳаворийси бўлганим учун бу хизматимни улуғлаяпман): ¹⁴ мен ўз қондошларимнинг рашкини қўзғатиб, уларнинг айримларини қутқариб олмасмиканман?! ¹⁵ Чунки агар дунёнинг ярашиши уларнинг рад этилганлиги орқали бўлса, унда уларнинг қабул қилинишлари ўлимдан ҳаётга қайтишдан бошқа нима ҳам бўлар экан?! ¹⁶ Агар бошланғичи муқаддас бўлса, унда қолдиғи ҳам муқаддасдир. Агар илдизи муқаддас бўлса, унда шохлари ҳам муқаддасдир. ¹⁷ Агар айрим шохлари синган бўлса, аммо сен ёввойи зайтун бўла туриб, уларнинг орасига пайванд қилинган бўлсанг, зайтуннинг илдизи ва шарбатига бирлашган бўлсанг, ¹⁸ унда шохларнинг олдида мағрурланма. Агар мағрурланаётган бўлсанг, ёдингда тут, сен илдизни эмас, балки илдиз сени кўтариб турибди. ¹⁹ Шунда сен айтарсан: “Менинг пайванд бўлишим учун шохлар синиб тушган-ку”. ²⁰ Хўш, улар имонсизлиги учун синиб тушдилар, сен эса имонинг билан турибсан. Кеккайма, бироқ қўрққин. ²¹ Чунки агар Худо табиий шохларни аямаган бўлса, унда сени аярмикан? ²² Шундай қилиб, Худонинг эзгулигини ва қаттиққўллигини тушуниб олгинки: йиқилганлар учун Унинг қаттиққўллиги, сен учун эса Унинг эзгулиги бор. Фақатгина сен Худонинг эзгулигида жо бўлсанг бўлди, акс ҳолда кесиб ташланасан. ²³ Бироқ агар ўшалар ҳам имонсизликда қолмасалар, пайванд бўладилар, чунки Худо уларни яна пайванд қилишга қодирдир. ²⁴ Агар сен табиатан ёввойи зайтун дарахтидан кесиб олинган ва нотабиий равишда яхши зайтун дарахтига пайванд қилинган бўлсанг, унда бу табиий шохларнинг ўз зайтун дарахтига пайванд бўлишлари нақадар осондир! ²⁵ Эй, биродарларим, ўзларингизни ўта доно ҳисобламаслигингиз учун бу сир ҳақида билимсиз қолишингизни истамайман: мажусийларнинг тўлиқ сони кирмагунига қадар, Исроил халқининг тошбағирлиги қисман бўлди. ²⁶ Шундай қилиб, бутун Исроил нажот топади, худди ёзилганидек: “Халоскор Сиондан келади ва Ёқубдан бетавфиқликни йироқлаштиради. ²⁷ Чунки улардан гуноҳларини олиб ташлаганимда, мана шу Менинг улар билан тузган Аҳдим бўлади”. ²⁸ Хушхабарга нисбатан улар сизлар сабабли душмандирлар, Худонинг танловига нисбатан эса – оталари сабабли Худонинг севганларидир. ²⁹ Чунки Худонинг инъомлари ва даъвати қайтариб олинмасдир. ³⁰ Сизлар бир вақтлар Худога итоатсиз бўлиб, энди эса уларнинг итоатсизлиги туфайли шафқатга эга бўлдингизлар. ³¹ Худди шундай, энди улар сизларнинг шафқатга эга бўлишингиз учун итоатсиз бўлдилар, токи улар ҳам шафқатга эга бўлсинлар. ³² Чунки Худо ҳаммага шафқат қилиш учун ҳаммани итоатсизликка қамаб қўйди. ³³ О, Худонинг донолиги ва билими бойлигининг тубсизлиги! Унинг ҳукмлари шу қадар ақлга сиғмайдиган, Унинг йўллари ўлчаб бўлмайдигандир! ³⁴ Зеро ким Худованднинг ақлини билиб олган экан? Ёки ким Унинг маслаҳатчиси бўлган экан? ³⁵ Ёки ким Худога биринчи бўлиб бирон нарса берган экан, токи Худо унга қайтариб берсин? ³⁶ Чунки ҳамма нарса Ундан, У орқали ва Унгадир. Унга абадулабад шон-шуҳрат бўлсин. Омин.