6 ¹ Раббий яна Мусога сўзлаб деди: ² “Исроил ўғилларига эълон қилиб айтгин: Агар бирор эркак ёки аёл ўзини Раббийга назорийликка бағишлаш учун назорийлик ваъдасини беришга қарор қилса, ³ унда у шароб ва кучли ичимликдан ўзини тийиши керак. У шаробдан тайёрланган сиркани ҳам, ичимликдан тайёрланган сиркани ҳам ичмаслиги, узумдан тайёрланган ҳеч нарсани ичмаслиги керак; шунингдек, узумнинг ҳўл меваларини ҳам, қуритилганини ҳам емаслиги керак. ⁴ У ўз назорийлигининг барча кунларида узумдан тайёрланадиган ҳеч нарсани ― уруғидан тортиб пўстлоғигача емаслиги керак. ⁵ Унинг назорийлигининг барча кунларида устара унинг бошига тегмаслиги керак. У Раббийга ўзини назорийликка бағишлаган кунлари тугагунича, у муқаддас бўлади. У бошидаги сочларини ўстириши керак. ⁶ У ўзини Раббийга назорийликка бағишлаган барча кунларида ўлик танага яқинлашмаслиги керак. ⁷ У ўз отаси, онаси, биродари, опа-синглиси ўлганида уларга тегиб, булғанмаслиги керак, чунки Худога бағишланиш унинг бошидадир. ⁸ У ўзининг назорийлигининг барча кунларида Раббийга муқаддасдир. ⁹ Агар унинг ёнида тўсатдан бирор киши ўлиб қолса ва у ўзининг назорийлик бошини булғаб қўйса, унда у ўзининг покланиши кунида бошидаги сочини қириши керак ва еттинчи куни уни қириши керак. ¹⁰ Саккизинчи куни эса иккита мусича ёки иккита ёш кабутарни руҳонийга, Йиғин Чодирининг кириш жойига олиб келиши керак. ¹¹ Руҳоний қушлардан бирини гуноҳ учун қурбонликка, иккинчисини эса тамоман ёндириш қурбонлигига келтиради ва уни ўлик танадан булғанганлигидан поклайди ҳамда ўша куни унинг бошини муқаддаслайди. ¹² Сўнгра у Раббийга бағишлаган назорийлик кунларини янгидан бошлаши керак ва бир ёшли қўзини айб қурбонлигига келтириши керак, лекин олдинги назорийлик кунлари куйиб кетди, чунки унинг назорийлиги булғанди. ¹³ Мана бу ― назорийлик қонунидир: Унинг назорийлик кунлари тугагач, уни Йиғин Чодирининг кириш жойига олиб келиш керак. ¹⁴ У Раббий учун бир ёшли бенуқсон қўзини тамоман ёндириш қурбонлигига, битта бир ёшли бенуқсон қўзини гуноҳ учун қурбонликка ва битта бенуқсон қўйни тинчлик қурбонлигига келтиради. ¹⁵ Шунингдек, буғдой унидан тайёрланган бир сават ачитқисиз нонларни, мой қўшиб пиширилган кулчаларни ва мой суртилган ачитқисиз қотир нонларни ва уларга қўшиб нон бағишловларини ҳамда суюқлик бағишловларини олиб келиши керак. ¹⁶ Руҳоний буларни Раббийнинг олдига тақдим қилади ва унинг гуноҳ учун қурбонлигини ҳамда тамоман ёндириш қурбонлигини келтиради. ¹⁷ Шунингдек, Раббийга тинчлик қурбонлигига бир сават ачитқисиз нонлар билан қўй келтирсин. Сўнг руҳоний унинг нон бағишловлари ва суюқлик бағишловларини қурбонликка келтиради. ¹⁸ Назорий киши ўзининг назорийлик бошини Йиғин Чодирининг кириш жойи қаршисида қирсин ва ўзининг назорийлик сочини олиб, тинчлик қурбонлиги остидаги оловга қўйсин. ¹⁹ Руҳоний қўйнинг пиширилган елкасини, саватдан битта ачитқисиз кулча ва битта ачитқисиз қотир нонни олиб, назорий киши ўзининг назорийлик бошини қириб бўлганидан сўнг унинг қўлига қўяди. ²⁰ Руҳоний буларни Раббийнинг олдида силкитиб олиб келади. Бу муқаддасворлик ― силкитиб келтирилган тўш ва қурбонликка келтирилган елка билан бирга руҳонийга тегишлидир. Шундан сўнг назорий киши шароб ичиши мумкин. ²¹ Бу ― назорийликка ваъда берган киши учун назорийлик қонуни ва Раббийга назорийлиги учун қўли етганидан ташқари келтирадиган қурбонлигидир. У назорийлиги ҳақида қонунда белгиланганидан ташқари нимани ваъда берса, шуни қилиши керак”. ²² Шунда Раббий Мусога сўзлаб деди: ²³ “Аҳарўн ва унинг ўғилларига айтгин: Исроил ўғилларини дуо қилганларингизда, шундай деб айтинглар: ²⁴ Раббий сени дуо қилсин ва асрасин! ²⁵ Раббий Ўзининг ёруғ юзи билан сенга назар солсин ва сенга шафқат қилсин. ²⁶ Раббий Ўз юзини сенга ўгирсин ва сенга тинчлик берсин! ²⁷ Шу тарзда, улар Исроил ўғилларининг устига Менинг номимни чақирсинлар ва Мен уларни дуо қиламан”.