6 ¹ Эҳтиёт бўлинглар, сизларни одамлар кўриши учун хайр-эҳсонингизни уларнинг кўз ўнгида қилманглар, акс ҳолда Осмондаги Отангиздан сизларга мукофот бўлмайди. ² Шунинг учун хайр-эҳсон қилаётганингда, ўз олдингда жар солмагин. Зеро иккиюзламачилар одамлар уларни шарафлашлари учун синагогаларда ва кўчаларда шундай қиладилар. Сизларга ростини айтаманки, улар ўз мукофотларини аллақачон олмоқдалар. ³ Лекин сен хайр-эҳсон қилаётганингда, ўнг қўлинг нима қилаётганини чап қўлинг билмасин. ⁴ Шу йўсинда сенинг хайр-эҳсонинг яширин бўлади. Яширин бўлганларни кўраётган Отанг эса сени ошкор тақдирлайди. ⁵ Ибодат қилаётганингда, иккиюзламачилар каби бўлма, чунки улар одамларга кўриниш учун синагогаларда ва кўчаларнинг бурчакларида туриб, ибодат қилишни севадилар. Сизларга ростини айтаманки, улар ўз мукофотларини аллақачон олмоқдалар. ⁶ Лекин сен ибодат қилаётганингда, ўз хонангга киргин ва эшикни ёпиб, яширин бўлган Отангга ибодат қилгин. Яширин бўлганларни кўраётган Отанг эса сени ошкор тақдирлайди. ⁷ Сизлар ибодат қилаётганингизда, мажусийлар каби ортиқча гапирманглар, чунки улар: ўз сўзларимизнинг кўпчилигидан эшитиламиз, деб ўйлайдилар. ⁸ Сизлар эса уларга ўхшаманглар, чунки сизларнинг Отангиз, сизларнинг сўрашингиздан олдин, нимага муҳтожлигингизни билади. ⁹ Шунинг учун шундай ибодат қилинглар: “Бизнинг Осмондаги Отамиз, Сенинг номинг муқаддас бўлсин! ¹⁰ Сенинг Шоҳлигинг келсин! Осмонда бўлгани каби, ерда ҳам Сенинг ироданг бажо бўлсин! ¹¹ Бугун бизга кундалик нонимизни бергин. ¹² Биздан қарздор бўлганларни биз кечирганимиздек, бизнинг қарзларимизни ҳам кечиргин. ¹³ Бизни васвасага йўлиқтирмагин, аммо ёвуздан халос қилгин. Чунки Шоҳлик, куч-қудрат ва шон-шуҳрат тоабад Сеникидир. Омин! ¹⁴ Агар сизлар бошқаларнинг гуноҳларини кечирсангизлар, Осмондаги Отангиз ҳам сизларни кечиради. ¹⁵ Агар сизлар бошқаларнинг гуноҳларини кечирмасангизлар, унда сизларнинг Отангиз ҳам гуноҳларингизни кечирмайди. ¹⁶ Шунингдек, рўза тутаётганингизда, иккиюзламачилар каби қовоғингизни солманглар. Чунки улар одамларга рўза тутаётган бўлиб кўриниш учун юзларини тунд қиладилар. Сизларга ростини айтаманки, улар ўз мукофотларини аллақачон олмоқдалар. ¹⁷ Сен эса рўза тутаётганингда, бошингни мойлаб, юзингни ювгин, ¹⁸ токи сен одамларга эмас, балки яширин бўлган Отангга кўриниш учун рўза тутгин. Яширин бўлганларни кўраётган Отанг эса сени ошкор тақдирлайди. ¹⁹ Бу заминда куя ва занг еб битирадиган ҳамда ўғрилар тешиб талайдиган хазиналарни ўзларингизга тўпламанглар. ²⁰ Аммо ўзларингизга Осмонда куя ва занг еб битирмайдиган ҳамда ўғрилар тешиб таламайдиган хазиналарни тўпланглар. ²¹ Зеро сизларнинг хазинангиз қаерда бўлса, юрагингиз ҳам ўша ерда бўлади. ²² Кўз – тананинг чироғидир. Агар кўзинг тоза бўлса, бутун тананг ёруғ бўлади. ²³ Агар кўзинг ёмон бўлса, бутун тананг қоронғи бўлади. Шунинг учун сенинг ичингдаги нур қоронғи бўлса, қоронғилик нақадар буюкдир. ²⁴ Ҳеч ким икки хўжайинга хизмат қила олмайди, чунки у ё биридан нафратланиб, бошқасини севади, ёки бирига ихлос қўйиб, бошқасини менсимайди. Сизлар ҳам Худога, ҳам бойликка хизмат қила олмайсизлар. ²⁵ Шунинг учун Мен сизларга айтаман: Нима еймиз, нима ичамиз,- деб жонингиз учун хавотирланманглар. Шунингдек: Нима киямиз,- деб танангиз учун ташвишланиб юрманглар. Жон овқатдан ва тана кийимдан каттароқ эмасми? ²⁶ Самовий қушларга қаранглар: улар на экадилар, на ўрадилар, на омборларда ғамлайдилар, аммо Осмондаги Отангиз уларни боқади. Сизлар улардан нақадар афзалроқ эмасмисизлар? ²⁷ Сизлардан қайси бирингиз ташвишланиб, ўз бўйига бир чўзим қўша олади? ²⁸ Нима учун кийим ҳақида ҳам ташвишланяпсизлар? Даладаги пиёзгулларнинг ўсишига эътибор беринглар: улар на меҳнат қилади, на чарх йигиради. ²⁹ Аммо сизларга айтаманки, ҳатто подшоҳ Сулаймон ҳам ўзининг бор шуҳратида буларнинг бирортасидек кийинган эмас. ³⁰ Агар Худо бугун бор бўлиб, эртага ўчоққа ташланадиган даладаги ўтни шу қадар кийинтирса, сизларни янада кўпроқ кийинтирмайдими, эй, имони камлар! ³¹ Шундай экан, нима еймиз, нима ичамиз, нима киямиз?- деб айтманглар ва ташвишланманглар. ³² Чунки мажусийлар буларнинг ҳаммасини излайдилар, сизларнинг Осмондаги Отангиз эса буларнинг ҳаммасига муҳтож эканингизни билади. ³³ Сизлар аввало Худонинг Шоҳлиги ва унинг ҳақлигини изланглар, буларнинг ҳаммаси эса сизларга қўшиб берилади. ³⁴ Шундай қилиб, эртанги кун учун ташвишланманглар, чунки эртанги куннинг ўзи ўзи учун ташвишланади. Ҳар куннинг ўз ташвиши етарлидир.