3 ¹ Ўша кунларда Яҳё чўмдирувчи келди. У Яҳудия саҳросида воизлик қилиб: ² “Тавба қилинглар, чунки Осмон Шоҳлиги яқинлашди!”- деб хитоб қилар эди. ³ Зеро у ҳақида Йешайаҳ пайғамбар шундай деган эди: “Саҳрода фарёд қилаётганнинг овози: Раббий учун йўл тайёрланглар, Унга йўлакларни тўғри қилинглар”. ⁴ Яҳёнинг ўзи туянинг жунидан кийим кийиб, белига чарм камар таққан эди. Унинг озиғи чигиртка ва ёввойи асал эди. ⁵ Ўшанда Йерусалимда, бутун Яҳудияда ва Йордан дарёси атрофида яшовчиларнинг ҳаммаси унинг олдига чиқиб келар эди. ⁶ Улар ўз гуноҳларини эътироф этиб, Йордан дарёсида Яҳёдан сувга чўмдирилар эдилар. ⁷ Сувга чўмдирилиш учун кўплаб фарзийлару саддуқийларнинг унинг олдига келаётганини кўриб, у уларга деди: “Эй, илонлар зоти, бошингизга келадиган кулфатдан қочишни ким сизларга ўргатди? ⁸ Энди тавбага муносиб ҳосил келтиринглар. ⁹ Ичингизда: Иброҳим бизнинг отамиз,- деб айтишни ўйламанглар, чунки мен сизларга айтаман: Худо мана шу тошлардан Иброҳимга авлод тиклашга қодир. ¹⁰ Ҳозирдан дарахтларнинг илдизида болта ётибди. Яхши ҳосил бермайдиган ҳар бир дарахт кесилиб, оловга ташланади. ¹¹ Мен сизларни тавба учун сувга чўмдиряпман, лекин мендан кейин Келаётган мендан кўра қудратлидир. Мен Унинг пойафзалини кўтариб юришга ҳам арзимайман. У сизларни Муқаддас Руҳ ва оловга чўмдиради. ¹² Унинг паншахаси Унинг қўлидадир! У ўз хирмонини тозалаб, буғдойларини омборларга жамлайди, сомонларни эса сўнмайдиган ўтда ёндириб юборади”. ¹³ Ўшанда Яҳёдан сувга чўмдирилиш учун Исо Галиледан унинг олдига, Йордан дарёсига келди. ¹⁴ Лекин Яҳё Исони тўхтатиб: “Сен мени сувга чўмдиришинг керак, Сен менинг олдимга келяпсанми?”- деди. ¹⁵ Исо унга жавоб бериб деди: “Қўй энди, чунки биз бор ҳақиқатни шу йўсинда амалга оширишимиз керак”. Шунда Яҳё рози бўлди. ¹⁶ Сувга чўмдирилган Исо ўша заҳоти сувдан чиқди. Мана, Унга осмон очилди ва Яҳё Худонинг Руҳи Исонинг устига кабутардек тушиб келганини кўрди. ¹⁷ Осмондан эса: “Бу Менинг севимли Ўғлимдир. Ундан мамнунман”,- деган овоз келди.