25
1
”Шунда Осмон Шоҳлиги ўз чироқларини олиб, куёвни қаршилагани чиққан ўнта қизга ўхшаш бўлади.
2
Улардан бештаси доно, бештаси эса ақлсиз эди.
3
Ақлсизлари чироқларини олиб, ўзлари билан мой олмадилар.
4
Донолари эса ўз чироқлари билан бирга идишларда мой ҳам олдилар.
5
Куёв кечиккани сабабли ҳаммалари мудраб, ухлаб қолдилар.
6
Лекин ярим тунда: Мана, куёв келмоқда, уни қаршилагани чиқинглар,- деган баланд овоз эшитилди.
7
Шунда қизларнинг барчаси туриб, ўз чироқларини тўғриладилар.
8
Ақлсизлари эса доноларига: Бизга мойингиздан беринглар, чунки бизнинг чироқларимиз ўчмоқда,- дедилар.
9
Донолари эса жавоб бериб: Бизга ҳам, сизларга ҳам етмасдан қолмаслиги учун, яхшиси сизлар бориб, сотувчилардан сотиб олинглар,- дедилар.
10
Улар сотиб олишга кетганларида, куёв келди. Шунда тайёр бўлган қизлар у билан бирга тўйхонага кирдилар ва эшиклар ёпилди.
11
Кейин бошқа қизлар ҳам келиб: Ҳазрат! Ҳазрат! Бизга эшикни оч,- дедилар.
12
У эса уларга жавобан: Сизларга ростини айтаманки, мен сизларни билмайман,- деди.
13
Шундай қилиб, бедор бўлинглар, чунки Инсон Ўғлининг келадиган куни ва соати қачон эканлигини билмайсизлар.
14
Зеро бу худди ўзга юртга кетишидан олдин ўз қулларини чақириб, уларга ўз мол-мулкини топширган одамга ўхшайди.
15
У қулларнинг ҳар бирининг кучига яраша бирига беш, бирига икки, яна бирига бир талант бериб, шу заҳотиёқ жўнаб кетди.
16
Беш талант олган қул бориб, уларни ишга солди ва яна беш талант орттирди.
17
Худди шундай, икки талант олгани ҳам яна икки талант орттирди.
18
Бир талант олган қул эса бориб, уни ерга кўмиб қўйди. Шундай қилиб, ўз хўжайинининг кумушини яширди.
19
Анча вақт ўтгач, ўша қулларнинг хўжайини келиб, улардан ҳисобот талаб қилди.
20
Шунда беш талант олгани бошқа беш талантни олиб келиб: Хўжайин! Сен менга беш талант берган эдинг, мана, мен булардан бошқа беш талант орттирдим,- деди.
21
Хўжайини унга: Баракалла, яхши ва содиқ қул! Сен оз нарсада содиқ бўлдинг, сени кўп нарса устидан қўяман. Энди, хўжайинингнинг илтифотига киргин,- деди.
22
Шунингдек, икки талант олгани ҳам келиб: Хўжайин! Сен менга икки талант берган эдинг, мана, мен булардан бошқа икки талант орттирдим,- деди.
23
Хўжайини унга: Баракалла, яхши ва содиқ қул! Сен оз нарсада содиқ бўлдинг, сени кўп нарса устидан қўяман. Энди, хўжайинингнинг илтифотига киргин,- деди.
24
Бир талант олган қул ҳам келиб: Хўжайин, мен сени билар эдим. Сен экмаган жойдан ўриб, сочмаган жойдан йиғадиган қаттиққўл одамсан.
25
Шунинг учун мен қўрқиб, сенинг талантингни ерга яшириб қўйдим. Мана, сеники ўзингга бўлсин,- деди.
26
Унинг хўжайини эса унга жавоб бериб: Айёр ва дангаса қул!- деди,- Сен мени экмаган жойдан ўришимни ва сочмаган жойдан йиғишимни билар экансан!
27
Шунинг учун сен менинг кумушимни савдогарларга беришинг керак эди, шунда мен ўзимникини фойдаси билан олган бўлар эдим.
28
Энди ундан талантни олиб, ўн таланти борга беринглар.
29
Чунки кимда бор бўлса, унга берилади ва кўпайтирилади, кимда йўқ бўлса, ундан ҳатто бори ҳам тортиб олинади.
30
Ярамас қулни эса ташқи зулматга ташланглар, у ерда йиғи-сиғи ва тишлар ғижирлаши бўлади”.
31
”Барча муқаддас фаришталари билан Инсон Ўғли Ўз шуҳратида келганида, У Ўзининг шуҳрат тахтига ўтиради.
32
Унинг олдида ҳамма халқлар тўпланадилар. У эса чўпон қўйларни эчкилардан ажратганидек, бирини бошқасидан ажратади.
33
Шундай қилиб, У қўйларни Ўзининг ўнг томонига, эчкиларни эса чап томонига қўяди.
34
Шунда Подшоҳ Ўзининг ўнг томонидагиларга дейди: Келинглар, эй, Отамдан барака топганлар! Сизларга дунё яратилишидан тайёрлаб қўйилган Шоҳликни мерос қилиб олинглар.
35
Чунки Мен оч эдим, сизлар Менга овқат бердингизлар. Мен чанқаган эдим, сизлар Менга сув бердингизлар. Мен мусофир эдим, сизлар Мени қабул қилдингизлар.
36
Мен яланғоч эдим, сизлар Мени кийинтирдингизлар. Мен касал эдим, сизлар Мендан хабар олдингизлар. Мен қамоқхонада эдим, сизлар Менинг олдимга келдингизлар.
37
Шунда ҳақ одамлар Унга жавоб бериб: Ё, Раббий! Қачон биз Сени оч қолганингни кўриб, Сени тўйғиздик, ёки чанқаганингни кўриб, Сенга сув бердик?
38
Қачон биз Сени мусофир эканингни кўриб, Сени қабул қилдик, ёки яланғочлигингни кўриб, кийинтирдик?
39
Қачон биз Сенинг касал ёки қамоқхонада эканингни кўриб, Сенинг ёнингга келдик?- деб айтадилар.
40
Шунда Подшоҳ уларга жавоб бериб: Сизларга ростини айтаманки, Менинг шу кичик биродарларимдан бирига нимаики қилган бўлсангизлар, шуни Менга қилдингизлар,- дейди.
41
Шунда Унинг чап томонида турганларга ҳам сўзлайди: Эй, лаънатланганлар! Шайтон ва унинг фаришталарига тайёрланган абадий оловга Менинг олдимдан кетинглар.
42
Чунки Мен оч эдим, сизлар Менга ейишга бермадингизлар. Мен чанқаган эдим, сизлар Менга ичишга бермадингизлар.
43
Мен мусофир эдим, сизлар Мени қабул қилмадингизлар. Мен яланғоч эдим, сизлар Мени кийинтирмадингизлар. Мен касал ва қамоқхонада эдим, сизлар Менинг олдимга келмадингизлар.
44
Шунда улар Унга жавоб бериб: Ё, Раббий! Қачон биз Сенинг оч ёки чанқаган, мусофир ёки яланғоч, касал ёки қамоқхонада эканингни кўриб, Сенга хизмат қилмадик?- деб айтадилар.
45
У эса уларга жавобан: Сизларга ростини айтаманки, бу кичиклардан бирига нимаики қилмаган бўлсангизлар, шуни Менга қилмадингизлар,- дейди.
46
Шунда булар абадий жазога, ҳақ одамлар эса абадий ҳаётга борадилар”.