24 ¹ Исо маъбаддан чиқиб кетаётганида, Унинг шогирдлари маъбаднинг биноларини Унга кўрсатиш учун, Унинг олдига келдилар. ² Исо уларга: “Буларнинг ҳаммасини кўряпсизларми? Сизларга ростини айтаманки, бу ерда тош устида тош қолмайди, ҳаммаси вайрон бўлади”,- деди. ³ Сўнг У Зайтун тоғида бир Ўзи ўтирганида, шогирдлари Унинг олдига алоҳида келиб сўрадилар: “Бизга айт, бу ҳодисалар қачон бўлади? Сенинг келишинг ва охирги замоннинг аломати қандай бўлади?” ⁴ Исо эса уларга жавобан деди: “Эҳтиёт бўлинглар, токи ҳеч ким сизларни йўлдан оздирмасин. ⁵ Чунки кўплар Менинг номимдан келиб: Мен Масиҳман,- деб кўпларни йўлдан оздирадилар. ⁶ Шунингдек, уруш ва уруш хабарларини эшитасизлар. Қаранглар, қўрқманглар, чунки буларнинг ҳаммаси бўлиши керак, лекин бу ҳали охири эмас. ⁷ Зеро халқ халққа, шоҳлик шоҳликка қарши кўтарилади. Айрим жойларда очарчиликлар, ўлатлар ва зилзилалар бўлади. ⁸ Буларнинг ҳаммаси эса ҳали азобларнинг бошланишидир. ⁹ Шунда сизларни қийноққа топшириб ўлдирадилар. Барча халқлар Менинг номим учун сизлардан нафратланадилар. ¹⁰ Ўшанда кўплар васвасага тушадилар, бир-бирини хоинона тутиб берадилар ва бир-биридан нафратланадилар. ¹¹ Кўплаб сохта пайғамбарлар пайдо бўлиб, кўпларни йўлдан оздирадилар. ¹² Қонунбузарликнинг кўпайиши туфайли кўпларда севги совийди. ¹³ Охиригача чидаган эса нажот топади. ¹⁴ Шоҳлик Хушхабари барча халқларга гувоҳлик учун бутун ер юзида воизлик қилинади, шунда охири келади. ¹⁵ Шунда Дониэл пайғамбар орқали айтилган, муқаддас жойда турган жирканч харобаликни кўрганингизда, (ўқиётган ўзи фаҳмласин), ¹⁶ шунда Яҳудияда бўлганлар тоққа югурсинлар. ¹⁷ Ким томда бўлса, ўз уйидан бирор нарсани олиш учун тушмасин. ¹⁸ Ким далада бўлса, ўз кийимларини олиш учун ҳам ортига қайтмасин. ¹⁹ Ўша кунларда ҳомиладор ва эмизувчи аёлларнинг ҳолига вой. ²⁰ Қочишларингиз шаббат куни ёки қишда бўлмаслиги учун ибодат қилинглар. ²¹ Чунки дунё бошланишидан то бугунгача бўлмаган ва келажакда бошқа бўлмайдиган буюк қайғу бўлади. ²² Агар бу кунлар қисқартирилмаганида, унда ҳеч ким қутқарилмас эди. Лекин танланганлар учун ўша кунлар қисқартирилади. ²³ Шунда агар кимдир сизларга: Мана, Масиҳ бу ерда ёки у ерда,- деса, ишонманглар. ²⁴ Чунки сохта масиҳ ва сохта пайғамбарлар пайдо бўлиб, имкони бўлса, танланганларни ҳам йўлдан уриш учун буюк аломатлар ва мўъжизалар кўрсатадилар. ²⁵ Мана, Мен сизларга олдиндан буни айтдим. ²⁶ Шунинг учун агар сизларга: Мана, У саҳрода,- десалар, чиқманглар. Агар: Мана, У яширин хоналарда,- десалар, ишонманглар. ²⁷ Чунки чақмоқ шарқдан чиқиб ғарбгача кўринганидек, Инсон Ўғлининг келиши ҳам шундай бўлади. ²⁸ Чунки қаерда мурда бўлса, ўша ерда калхатлар тўпланади. ²⁹ Ўша кунлардаги қайғудан сўнг бирданига қуёш хиралашади ва ой ўз нурини бермайди, юлдузлар осмондан тўкилади ва само кучлари ларзага келади. ³⁰ Шунда Инсон Ўғлининг аломати осмонда зоҳир бўлади. Барча қабилалар эса йиғлаб, Инсон Ўғлининг буюк шуҳрат ва куч билан самовий булутларда келаётганини кўрадилар. ³¹ У карнайнинг баланд овози билан Ўз фаришталарини жўнатади. Улар эса дунёнинг тўрт шамолидан, осмоннинг бир четидан бошқа четигача Унинг танланганларини йиғадилар. ³² Анжир дарахтидан ибрат олинглар: унинг шохлари юмшоқ бўлиб, барг чиқараётганида, ёзнинг яқин эканлигини биласизлар. ³³ Шунинг учун буларнинг ҳаммасини кўрганингизда, билингларки, У яқин, эшик олдида турибди. ³⁴ Сизларга ростини айтаманки, бу авлод ўтмасдан, буларнинг ҳаммаси содир бўлади. ³⁵ Осмон ва ер ўтиб кетади, аммо Менинг сўзларим ўтиб кетмайди. ³⁶ Ўша кун ва соат ҳақида бирон одам ҳам, Осмондаги фаришталар ҳам билмайдилар, фақат ёлғиз Менинг Отам билади. ³⁷ Лекин Нуҳ кунларида қандай бўлган бўлса, Инсон Ўғлининг келишида ҳам шундай бўлади. ³⁸ Зеро худди тўфон кунларидан олдин, Нуҳ кемага киргунига қадар, одамлар еб-ичдилар, уйландилар, эрга тегдилар, ³⁹ бироқ тўфон келиб, ҳаммани қирғин қилмагунча, улар англамаганларидай, Инсон Ўғлининг келишида ҳам худди шундай бўлади. ⁴⁰ Шунда икки киши далада бўлади, бири олинади, бошқаси қолдирилади. ⁴¹ Икки киши тегирмонда ишлаётган бўлади, бири олинади, бошқаси қолдирилади. ⁴² Шунинг учун бедор бўлинглар, чунки Раббингиз қайси соатда келишини билмайсизлар. ⁴³ Лекин сизлар буни биласизларки, агар уй эгаси ўғрининг қайси вақтда келишини билганида, у бедор туриб, ўз уйини ковлашга йўл қўймас эди. ⁴⁴ Шунинг учун сизлар ҳам тайёр бўлиб туринглар, чунки Инсон Ўғли сизлар ўйламаган вақт-соатда келади. ⁴⁵ Хўжайин хонадонига ўз вақтида ризқини бериш учун бошлиқ қилиб қўйган содиқ ва ақлли қул ким? ⁴⁶ Хўжайини келиб, ўз қулини шундай иш тутаётганини топса, ўша қул нақадар бахтлидир. ⁴⁷ Сизларга ростини айтаманки, уни ўзининг бутун мол-мулки устидан қўяди. ⁴⁸ Агарда ўша қул ёвуз бўлиб, ўз юрагида: Хўжайиним яқин орада келмайди,- деб айтиб, ⁴⁹ ўз ўртоқларини уриб, ичкиликбозлар билан ичса, ⁵⁰ унда хўжайин қули кутмаган бир кунда, ўйламаган бир соатда келиб, ⁵¹ уни тилка-пора қилади ва унга иккиюзламачилар билан бир қисматни беради. У ерда йиғи-сиғи ва тишлар ғижирлаши бўлади”.