19 ¹ Исо бу сўзларни айтиб бўлганидан сўнг, Галиледан чиқиб, Йорданнинг нариги томонидаги Яҳудия ҳудудига келди. ² Унинг ортидан кўплаб одамлар эргашдилар ва У уларни ўша ерда шифолади. ³ Фарзийлар ҳам Унга келиб, Уни васвасага солиб: “Ҳар қандай сабабга кўра эркак ўз хотинидан ажралиши мумкинми?”- дедилар. ⁴ У уларга жавобан деди: “Яратувчи азалдан уларни эркак ва аёл қилиб яратганини ўқимагансизларми? ⁵ Шунинг учун инсон ота-онасини қолдириб, ўз хотинига ёпишиб қолади ва иккиласи бир тана бўлади. ⁶ Шунинг учун улар энди иккита эмас, балки бир танадир. Шундай қилиб, Худо қўшганини инсон ажратмасин”. ⁷ Улар эса Исога: “Нимага унда Мусо ажралиш хати беришга ва у билан ажралишга амр берган?”- дедилар. ⁸ У уларга: “Мусо сизларнинг тошюрак эканлигингиз учун сизларга хотинларингиз билан ажралишга рухсат берган,- деди,- Лекин азалдан бундай эмас эди. ⁹ Мен эса сизларга айтаман: Кимки зинодан бошқа сабаб туфайли ўз хотинидан ажралиб, бошқасига уйланса, зино қилган бўлади. Шунингдек, ажралганга уйланган ҳам зино қилган бўлади”. ¹⁰ Унинг шогирдлари Унга: “Агарда эркакнинг хотинига нисбатан мажбурияти шундай бўлса, уйланмаслик яхшироқдир”,- дедилар. ¹¹ Лекин Исо уларга деди: “Бу сўзни ҳамма ҳам сиғдира олмайди, аммо кимга берилган бўлса, ўша сиғдира олади. ¹² Зеро онасининг қорнидан шундайлигича туғилган бичилганлар бор, одамлар томонидан бичилганлар бор, Осмон Шоҳлиги учун ўзларини бичганлар ҳам бор. Кимки буни сиғдира олса, сиғдирсин”. ¹³ Шу орада Исонинг олдига болаларни олиб келдилар, токи У уларга қўлларини қўйиб, ибодат қилсин. Шогирдлари эса уларга тақиқладилар. ¹⁴ Лекин Исо: “Болаларни қўйинглар ва Менинг олдимга келишларига тўсқинлик қилманглар, чунки Осмон Шоҳлиги шундайларникидир”,- деди. ¹⁵ У қўлини уларга қўйди, сўнг ўша ерни тарк этди. ¹⁶ Мана, бир киши Исога яқинлашиб: “Эзгу Устоз, абадий ҳаётга эга бўлишим учун қандай эзгуликлар қилмоғим керак?”- деди. ¹⁷ У эса унга: “Нима учун сен Мени эзгу, деб атаяпсан? Биргина Худодан бошқа ҳеч ким эзгу эмас. Агарда сен абадий ҳаётга киришни истасанг, амрларга риоя қил”,- деди. ¹⁸ У киши Исога: “Қайсиларига?”- деди. Исо жавобан: “Қотиллик қилма,- деди,- зино қилма, ўғирлик қилма, сохта гувоҳлик берма, ¹⁹ ота-онангни ҳурмат қил ва ўз яқинингни ўзинг каби севгин”. ²⁰ Йигит эса Исога: “Буларнинг ҳаммасига мен ёшлигимдан риоя қилдим, менга яна нима етишмайди?”- деди. ²¹ Исо унга: “Агар мукаммал бўлишни истасанг, бориб, бор нарсангни сотиб, қашшоқларга тарқатгин ва Осмонда бойликка эга бўласан. Шунда келиб, Менинг ортимдан эргаш”,- деди. ²² Лекин йигит бу сўзни эшитганида, қайғу билан узоқлашди, чунки у катта бойликка эга эди. ²³ Шунда Исо ўз шогирдларига деди: “Сизларга ростини айтаманки, бой одамнинг Осмон Шоҳлигига кириши қийиндир. ²⁴ Сизларга яна айтаманки, бой одамнинг Худо Шоҳлигига киришидан кўра, туянинг игна тешигидан ўтиши осонроқдир”. ²⁵ Унинг шогирдлари буни эшитганларида, жуда ҳайрон қолиб: “Ундай бўлса, ким нажот топа олар экан?”- дедилар. ²⁶ Исо уларга қараб: “Одамлар учун бу имконсиз, аммо Худо учун ҳамма нарсанинг имкони бор”,- деди. ²⁷ Шунда Петъёр Унга жавобан: “Мана, биз ҳамма нарсани қолдириб, Сенинг ортингдан эргашдик. Биз энди нимага эга бўламиз?”- деди. ²⁸ Исо эса уларга деди: “Сизларга ростини айтаманки, сизлар – Менинг ортимдан эргашганлар – янги оламда Инсон Ўғли Ўз шуҳратининг тахтда ўтирганида, сизлар ҳам ўн икки тахтга ўтириб, Исроилнинг ўн икки қабиласини ҳукм қиласизлар. ²⁹ Менинг номим ҳақи уй-жой, ака-ука, опа-сингил, ота-она, хотин-бола ёки ер-мулкини ташлаб кетган ҳар бир одам булардан юз марта кўпроғини олади ва абадий ҳаётни мерос қилиб олади. ³⁰ Зотан кўплаб биринчи бўлганлар охирги, охиргилар эса биринчи бўладилар”.