11 ¹ Исо Ўзининг ўн икки шогирдига йўл-йўриқ кўрсатишни тугатганидан сўнг, у ердан уларнинг шаҳарларига ўқитиш ва воизлик қилиш учун кетди. ² Яҳё эса зиндонда ётиб, Масиҳнинг қилаётган ишларини эшитгач, ўзининг шогирдларидан иккитасини юбориб: ³ ”Ўша келадиган Сенмисан, ёки биз бошқасини кутайликми?”- деб Ундан сўраттирди. ⁴ Исо уларга жавоб бериб деди: “Боринглар, кўраётган ва эшитаётган нарсаларингизни Яҳёга айтиб беринглар: ⁵ Кўрлар кўряпти ва чўлоқлар юряпти, моховлар тозаланяпти ва карлар эшитяпти, ўликлар тириляпти ва қашшоқларга Хушхабар воизлик қилиняпти. ⁶ Мен ҳақимда васвасага тушмаган бахтлидир”. ⁷ Улар кетганларидан кейин, Исо халойиққа Яҳё ҳақида гапира бошлади: “Сизлар чўлга нимани кўриш учун бордингизлар? Шамолда ҳилпираб турган қамишними? ⁸ Ахир, нимани кўриш учун бордингизлар? Майин кийим кийган одамними? Майин кийим кийганлар подшоҳлар саройларида бўлади! ⁹ Ахир, нимани кўриш учун бордингизлар? Пайғамбарними? Ҳа, сизларга айтаманки, пайғамбардан ҳам улуғроқ бўлган одамни. ¹⁰ Чунки у ҳақида шундай ёзилган: Мана, Мен Сендан олдин Ўз элчимни юборяпман, У Сенинг олдингда йўл тайёрлайди. ¹¹ Сизларга ростини айтаманки, аёлдан туғилганлар орасида Яҳё Чўмдирувчидан буюкроғи кўтарилган эмас, лекин Осмон Шоҳлигида энг кичик бўлгани ҳам ундан буюкроқдир. ¹² Яҳё Чўмдирувчининг кунларидан то ҳозиргача Осмон Шоҳлиги куч билан олинади, куч ишлатувчилар эса уни қўлга киритадилар. ¹³ Зеро барча пайғамбарлар ва Қонун Яҳёнинг келишидан олдин башорат қилинган. ¹⁴ Агар қабул қилишни истасангизлар, у – келиши керак бўлган Элийаҳ пайғамбардир. ¹⁵ Кимнинг эшитишга қулоғи бўлса, эшитсин! ¹⁶ Энди бу наслни кимга ўхшатай? – У кўчада ўтирган болаларга ўхшайди. Улар ўз ўртоқларини чақириб: ¹⁷ Биз сизларга най чалдик, сизлар эса ўйнамадингизлар, сизларни йиғлашга ундадик, сизлар эса йиғламадингизлар,- дейдилар. ¹⁸ Чунки Яҳё келиб, емади ва ичмади, улар эса: Унда жин бор,- дейишмоқда. ¹⁹ Инсон Ўғли келиб, еб-ичмоқда, улар эса: Мана, очкўз ва шаробхўр, солиқчилару гуноҳкорларнинг дўсти бўлган одам,- дейишмоқда. Бироқ донолик ўз фарзандлари томонидан оқланади”. ²⁰ Кейин Исо Ўзининг буюк ишларини кўпроқ намоён қилган шаҳарларга уларнинг тавба қилмаганлари учун таъна қила бошлади: ²¹ ”Сенинг ҳолингга вой, эй, Ҳоразин! Сенинг ҳолингга вой, эй, Бейт-Сайда! Чунки агар сизларда содир бўлган мўъжизалар Тир билан Сидўн шаҳарларида қилинганида эди, улар аллақачон қанор кийимида кул сочиб, тавба қилган бўлар эдилар. ²² Лекин сизларга айтаманки, ҳукм кунида сизлардан кўра Тир ва Сидўн шаҳарларига осонроқ бўлади. ²³ Эй, осмонгача кўтарилган Кафарнаҳум, сен дўзахгача тушиб кетасан, чунки агар сенда бўлган мўъжизалар Садўм шаҳрида қилинганида эди, у шу кунгача турган бўлар эди. ²⁴ Лекин сизларга айтаманки, ҳукм кунида сендан кўра Садўм ерига осонроқ бўлади”. ²⁵ Ўша пайтда Исо сўзини давом эттириб, деди: “Эй, Отам, еру осмон Эгаси, Сени улуғлайман! Чунки Сен буни доною ақллилардан яшириб, гўдакларга очиб бердинг. ²⁶ Ҳа, Ота! Зеро Сенинг эзгу ироданг шундайдир. ²⁷ Отамдан Менга ҳамма нарса топширилган. Ўғилни Отадан бошқа ҳеч ким билмайди. Отани ҳам Ўғилдан ва Ўғил очиб беришни истаган кишилардан бошқа ҳеч ким билмайди. ²⁸ Эй, ҳолдан тойган ва оғир юк остида қийналганларнинг барчаси, Менинг олдимга келинглар! Мен сизларга ором бераман. ²⁹ Менинг бўйинтуруғимни ўз устингизга олинглар, Мендан ўрганинглар, чунки Мен камтарин ҳамда итоаткор юракка эгаман. Шунда ўз жонингизга таскин топасизлар. ³⁰ Чунки Менинг бўйинтуруғим эзгулик ва Менинг юким енгилдир”.