9 ¹ Саккизинчи куни Мусо Аҳарўн билан унинг ўғилларини ва Исроил оқсоқолларини чақириб, ² Аҳарўнга шундай деди: “Гуноҳ қурбонлиги сифатида ёш буқачани ва тамоман ёндириш қурбонлиги сифатида бенуқсон қўйни олиб, уларни Раббийнинг юзи қаршисида келтиргин. ³ Исроил ўғилларига эса: "Гуноҳ қурбонлиги сифатида такани, тамоман ёндириш қурбонлиги сифатида бенуқсон бир ёшар буқача ва қўзини, ⁴ тинчлик қурбонлиги сифатида эса ҳўкиз ва қўйни қурбонлик қилиш учун Раббийнинг қаршисига олиб келинглар, шунингдек, мой аралаштирилган нон бағишловини олиб келинглар, чунки бугун Раббий сизларга намоён бўлади",- дегин”. ⁵ Мусо буюрганларнинг барчасини Йиғин Чодири олдига олиб келдилар ва бутун жамоа келиб, Раббийнинг юзи қаршисида турди. ⁶ Шунда Мусо: “Раббий буларни бажаришимизни буюрди ва Раббийнинг шуҳрати сизларга намоён бўлади”,- деди. ⁷ Сўнг Мусо Аҳарўнга: “Қурбонгоҳ ёнига келиб, ўзинг учун гуноҳ қурбонлиги ва тамоман ёндириш қурбонлигини келтириб, ўзингни ҳамда халқни покла. Кейин халқ учун қурбонликни келтириб, Раббий буюрганидек, уларни покла”,- деди. ⁸ Аҳарўн қурбонгоҳ ёнига келиб, ўзи учун буқачани гуноҳ қурбонлигига сўйди. ⁹ Аҳарўннинг ўғиллари унга қонни олиб келишди ва у бармоғини қонга ботириб, қурбонгоҳнинг шохларига қўйди, қолган қонни эса қурбонгоҳнинг тагига тўкди. ¹⁰ Ёғи, буйраклари ва жигари устидаги ёғни эса, Раббий Мусога буюрганидек, қурбонгоҳда ёндириб юборди, ¹¹ гўшти билан терисини эса қароргоҳдан ташқарида оловда ёндириб юборди. ¹² Сўнг Аҳарўн тамоман ёндириш қурбонлигини сўйди. Аҳарўннинг ўғиллари унга қонни олиб келишди ва у қонни қурбонгоҳнинг ҳар томонига пуркади. ¹³ Сўнг унга тамоман ёндириш қурбонлигининг бўлаклари ва бошини олиб келишди. У буни қурбонгоҳда ёндириб юборди, ¹⁴ ички аъзолари ва оёқларини эса ювиб, тамоман ёндириш қурбонлиги билан бирга қурбонгоҳда ёндириб юборди. ¹⁵ Кейин халқ учун қурбонликни келтирди. У халқнинг гуноҳи учун такани олиб, уни сўйди ва аввалгиси каби уни гуноҳ қурбонлигига келтирди. ¹⁶ Шу тариқа тамоман ёндириш қурбонлигини келтириб, уни низом бўйича бажарди. ¹⁷ Сўнг нон бағишловини олиб келиб, шулар билан ҳовучини тўлдирди ва тонгги тамоман ёндириш қурбонлигига қўшиб, буни қурбонгоҳда ёндириб юборди. ¹⁸ Шунингдек, халқ учун тинчлик қурбонлигига ҳўкиз ва қўйни сўйди. Аҳарўннинг ўғиллари унга қонни олиб келишди ва у қонни қурбонгоҳнинг ҳар томонига пуркади. ¹⁹ Ҳўкизнинг ёғини, қўйнинг қуйруғини, ички аъзоларини қоплаб турган ёғни, буйракларни ва жигари устидаги ёғни ҳам олиб келишди. ²⁰ У ёғни қурбонликнинг кўкраги устига қўйиб, ёғни қурбонгоҳда ёндириб юборди. ²¹ Кўкрак ва ўнг сонни эса, Мусо буюрганидек, Аҳарўн Раббийнинг юзи қаршисида силкитиб, Унга тақдим этди. ²² Сўнг Аҳарўн халқ томонга қаратиб қўлларини кўтариб, уларни дуо қилди ва гуноҳ қурбонлиги, тамоман ёндириш ҳамда тинчлик қурбонликларини амалга оширгач, тушиб келди. ²³ Сўнг Мусо Аҳарўн билан бирга Йиғин Чодири ичига киришди ва чиқиб, халқни дуо қилишди. Шунда Раббийнинг шуҳрати бутун халққа намоён бўлди. ²⁴ Раббийдан эса олов чиқиб, қурбонгоҳдаги тамоман ёндириш қурбонлиги ва ёғни ютиб юборди. Буни кўрган бутун халқ қувонганидан ҳайқириб юборди ва юз тубан йиқилди.