7 ¹ Мана бу – айбдорлик қурбонлиги қонуни, бу – буюк муқаддасворликдир: ² Айбдорлик қурбонлигини тамоман ёндириш қурбонлиги сўйиладиган жойда сўйиш керак, унинг қонини эса қурбонгоҳнинг ҳар томонига пуркаш керак. ³ Руҳоний унинг ҳамма ёғини, қуйруғини, ички аъзоларини қоплаб турган ёғни, ⁴ шунингдек, иккала буйрагини, уларнинг устидаги ҳамда биқинидаги ёғ ва жигари устидаги ёғни келтирсин. Уни буйраклари билан ажратиб олсин. ⁵ Руҳоний буларни Раббийга олов қурбонлиги сифатида ёндириб юборсин. Бу – айбдорлик қурбонлигидир. ⁶ Руҳоний авлодининг ҳамма эркаклари буни ейиши мумкин. Муқаддас жойда буни ейиш керак. Бу – буюк муқаддасворликдир. ⁷ Гуноҳ қурбонлиги ҳақидаги каби, айбдорлик қурбонлиги ҳақида ҳам қонун бир: у руҳонийга тегишлидир, ва шу орқали руҳоний одамни поклайди. ⁸ Руҳоний эса бирор кишининг тамоман ёндириш қурбонлигини келтирганида, келтирган қурбонлигининг териси руҳонийга тегишлидир. ⁹ Шунингдек, ўчоқда пиширилган ва хумда ёки товада пиширилган ҳар қандай нон бағишлови ҳам буларни келтираётган руҳонийга тегишлидир. ¹⁰ Ҳар қандай нон бағишлови: мой билан аралаштирилгани ҳам, қуруғи ҳам Аҳарўн ўғилларининг ҳар бирига тегишлидир. ¹¹ Мана бу ― Раббийга келтириладиган тинчлик қурбонлиги ҳақидаги қонун: ¹² Кимки миннатдорчиликда уни келтирса, унда у миннатдорлик қурбонлиги билан бирга мой аралаштирилган ачитқисиз нонларни, мой суртилган ачитқисиз кулчаларни, мой шимдирилган ун ва мойда пиширилган қотир нонни келтирсин. ¹³ Боз устига, тинч миннатдорчилик қурбонлиги билан у бағишлов сифатида кулчадан ташқари ачитқили нон ҳам келтириши керак. ¹⁴ Ушбу ҳамма бағишловлардан бирортасини у ҳадя сифатида Раббийга тақдим қилсин. Бу ― тинчлик қурбонлигининг қонини пуркаётган руҳонийга тегишлидир. ¹⁵ Тинч миннатдорчилик қурбонлигининг гўшти эса келтирилган куни ейилиши керак, ундан тонггача қолдирмаслик шарт. ¹⁶ Агарда кимдир атаган назри бўйича ёки ихтиёрий равишда қурбонлик келтирса, унда қурбонлигини келтирилган куни уни ейиш керак, ундан қолганини эртаси куни ҳам еса бўлади. ¹⁷ Аммо қурбонлик гўштидан учинчи кунга қолганини оловда ёндириб юбориш керак. ¹⁸ Агарда тинчлик қурбонлигининг гўштини учинчи куни ейишса, унда қурбон қабул бўлмайди, уни келтирган кишининг фойдасига ҳисобланмайди, чунки бу булғанишдир. Ким уни еса, гуноҳини ўзида кўтариб юради. ¹⁹ Агарда тинчлик қурбонлигининг гўшти бирор нопок нарсага тегиб кетса, унда уни ейиш мумкин эмас, уни оловда ёндириб юбориш керак. Тоза гўштни эса ҳар бир пок одам ейиши мумкин. ²⁰ Кимки ўзи нопок бўлиб, Раббийнинг тинчлик қурбонлигининг гўштини еса, унда ўша одам ўз халқининг орасидан қириб ташланади. ²¹ Агар кимдир бирор нопок нарсага: одамнинг нопоклигига ёки нопок ҳайвонга, ёки бирор нопок жирканч нарсага тегиниб, сўнг Раббийнинг тинчлик қурбонлигининг гўштини еса, унда ўша одам ўз халқининг орасидан қириб ташланади”. ²² Раббий яна Мусога сўзлаб деди: ²³ “Исроил ўғилларига айтгин: На молнинг, на қўйнинг, на таканинг ёғини еманглар. ²⁴ Ўлган жониворнинг ёки ҳайвон тилка-пора қилган жониворнинг ёғини ҳар қандай ишда қўллаш мумкин, аммо уни асло еманглар. ²⁵ Кимки Раббийга қурбонликка келтирилаётган молнинг ёғини еса, ўша одам ўз халқининг орасидан қириб ташланади. ²⁶ Шунингдек, хонадонингиздаги ҳеч ким на қушнинг, на жониворнинг қонини еманглар. ²⁷ Кимки қандайдир қонни ейдиган бўлса, ўша одам ўз халқининг орасидан қириб ташланади”. ²⁸ Раббий яна Мусога сўзлаб деди: ²⁹ “Исроил ўғилларига айтгин: Ким Раббийга тинчлик қурбонлигини тақдим қилса, у тинчлик қурбонлигидан бир қисмини Раббийга олиб келиши керак. ³⁰ У қурбонликни ўз қўллари билан Раббийга олиб келиши керак: Раббийнинг юзи қаршисида қурбонликнинг кўкрагини силкитиб, ёғи билан кўкрагини олиб келиши керак. ³¹ Руҳоний ёғни қурбонгоҳда ёқиб юбориши керак, кўкрак эса Аҳарўн ва унинг ўғилларига тегишлидир. ³² Тинчлик қурбонликларингизнинг ўнг елкасини ҳадя сифатида руҳонийга беринглар. ³³ Аҳарўн ўғилларидан қайси бири тинчлик қурбонлигининг қони ва ёғини қурбонликка келтирса, ўнг елка ўшанинг улушидир. ³⁴ Зеро Исроил ўғилларининг тинчлик қурбонликларидан Мен силкитиб келтирилган кўкракни ва ҳадя қилинган елкани олиб, уларни руҳоний Аҳарўн ва унинг ўғилларига Исроил ўғилларидан абадий улуш қилиб бердим”. ³⁵ Бу – Раббийнинг қаршисида руҳонийлик хизматини бошлаган кунларидан бошлаб, Раббийнинг қурбонликларидан Аҳарўннинг улуши ва унинг ўғилларининг улушларидир. ³⁶ Раббий Исроил ўғилларига амр этдики, руҳонийлар мойланган кундан бошлаб, бу улушлар уларга берилсин. Бу – уларнинг авлодлари оша абадий низомдир. ³⁷ Мана, бу – тамоман ёндириш қурбонлиги, нон бағишлови, гуноҳ қурбонлиги, айбдорлик қурбонлиги, аташ қурбонлиги ва тинчлик қурбонлиги ҳақидаги қонундир. ³⁸ Синай чўлида Исроил ўғилларига ўз қурбонликларини келтиришларини амр этган кунда Раббий Синай тоғида бу қонунни Мусога берди.