6 ¹ Раббий яна Мусога сўзлаб деди: ² “Агар кимдир гуноҳ қилиб, Раббийнинг қаршисида қонунбузарлик қилса ва унга топширилган ёки унга қарзга берилган ёки ўғирланган нарсада у яқинига ёлғон гапирса, ёки яқинини шунчаки алдаса, ³ ёки йўқолган буюмни топиб олиб, бу ҳақида ёлғон гапирса, ёки одамлар одатан қиладиган нарса ҳақида ёлғон қасам ичса ва шу орқали гуноҳ қилса, ⁴ унда гуноҳ қилгани ва айбдор бўлгани учун, у ўғирланган нарсани, тортиб олган нарсани, унга ишониб топширилган нарсани ва топилган нарсани қайтариб бериши керак. ⁵ Агар бирор нарсада ёлғон қасам ичган бўлса, унда уни тўлиқ қайтариши ва бешдан бир қисмини қўшиб, айбдорлик қурбонлигини келтириш кунида унинг эгасига бериши керак. ⁶ Айби учун эса у Раббийга айбдорлик қурбонлигига, сенинг баҳолашингга кўра, подадан бенуқсон қўчқорни руҳонийга келтирсин. ⁷ Шунда руҳоний уни Раббийнинг қаршисида поклайди ва унинг қилган ҳар қандай айби кечирилади”. ⁸ Раббий яна Мусога сўзлаб деди: ⁹ “Аҳарўн ва унинг ўғилларига амр қилиб айтгин: Мана, бу тамоман ёндириш қурбонлиги ҳақида қонундир – тамоман ёндириш қурбонлиги қурбонгоҳдаги оловда туни бўйи эрталабгача қолдирилсин ва қурбонгоҳнинг олови унда ёниб турсин. ¹⁰ Руҳоний ўз зиғир кийимини кийиб, танасига ўз зиғир иштонини кийсин ва қурбонгоҳ устида оловда ёндирган тамоман ёндириш қурбонлигининг кулини олиб, уни қурбонгоҳнинг ёнига қўйсин. ¹¹ Сўнг кийимларини ечиб, бошқа кийимларни кийсин ва кулни қароргоҳдан ташқарига, тоза жойга олиб чиқсин. ¹² Қурбонгоҳ устидаги олов эса ёниб тураверсин, у ўчмасин. Руҳоний ҳар тонг унинг устида ўтин ёқиб, унинг устига тамоман ёндириш қурбонлигини қўйсин ва унинг устида тинчлик қурбонлигининг ёғини ёндирсин. ¹³ Қурбонгоҳ устидаги олов эса доимо ёниб турсин ва ўчмасин. ¹⁴ Мана бу― нон бағишлови ҳақидаги қонун: Аҳарўннинг ўғиллари уни Раббийнинг қаршисига қурбонгоҳнинг олдига олиб келишлари керак. ¹⁵ Руҳоний нон бағишловидан ҳовучини тўлдириб, буғдой уни, мой ва қурбонликдаги ладаннинг ҳаммасини олсин ва қурбонгоҳда ёқиб юборсин. Бу ― хотира учун Раббийнинг қаршисида ёқимли бўлган хушбўй ҳиддир. ¹⁶ Унинг қолганини эса Аҳарўн ва унинг ўғиллари есинлар. Уни ачитқисиз, муқаддас жойда ейишлари керак. Уни Йиғин Чодирининг ҳовлисида есинлар. ¹⁷ У ачитқи билан пиширилиши мумкин эмас. Мен буни уларга оловда куйдириладиган қурбонликларимдан улуш қилиб бердим. Бу – гуноҳ қурбонлиги ва айбдорлик қурбонлиги каби буюк муқаддасворликдир. ¹⁸ Аҳарўн авлодининг барча эркак зоти уни ейишлари мумкин. Бу – авлодларингиз оша Раббийнинг оловда куйириладиган қурбонликларидан абадий улушдир. Унга тегинган ҳар ким муқаддасланади”. ¹⁹ Раббий яна Мусога сўзлаб деди: ²⁰ “Мана, Аҳарўн ва ўғилларининг мойланиши кунида улардан Раббийга келтириладиган бағишлов шудир: доимий бағишлови сифатида бўлган буғдой унидан эфанинг ўндан бир қисми. Унинг ярмини эрталаб, ярмини кечқурун келиришсин. ²¹ У товада мой билан пиширилиши керак. У яхши бўкканида, уни келтир. Нон бағишловининг пишган бурдаларини Раббийга ёқимли бўлган хушбўй тутатқи сифатида келтир. ²² Аҳарўннинг ўрнига унинг ўғилларидан мойланган руҳоний буни амалга ошириши керак. Бу – Раббийнинг абадий низомидир. Унинг ҳаммаси ёндирилиши керак. ²³ Руҳоний келтирадиган барча нон бағишловининг ҳаммаси ёндирилиши керак, у ейилиши мумкин эмас”. ²⁴ Раббий яна Мусога сўзлаб деди: ²⁵ “Аҳарўн ва унинг ўғилларига айтгин: Мана бу ― гуноҳ қурбонлиги қонунидир: гуноҳ қурбонлиги Раббийнинг қаршисида, тамоман ёндириш қурбонлиги сўйиладиган жойда сўйилиши керак. Бу – буюк муқаддасворликдир. ²⁶ Гуноҳ қурбонлигини келтираётган руҳоний уни ейиши керак. У муқаддас жойда, Йиғин Чодири ҳовлисида ейилиши керак. ²⁷ Унинг гўштига тегинган ҳар кимса муқаддасланади. Агарда унинг қони кийимга сачраб кетса, у сачраган кийимни муқаддас жойда ювгин. ²⁸ Бу гўшт қайнатилган сопол идиш эса синдирилсин, агар мис идишда қайнатилган бўлса, унда идишни тозалаб, сув билан ювиш керак. ²⁹ Руҳоний авлодининг ҳамма эркаклари бу гўштни ейиши мумкин. Бу – буюк муқаддасворликдир. ³⁰ Аммо қони Йиғин Чодирининг ичига, покланиш учун Муқаддасгоҳга киритиладиган гуноҳ қурбонлигини ейиши мумкин эмас, уни оловда ёндириш керак.