4 ¹ Раббий яна Мусога сўзлаб деди: ² “Исроил ўғилларига эълон қил: Кимки хатоликда Раббийнинг бирор амрига қарши гуноҳ қилса ва қилиш мумкин бўлмаган ишни қилиб қўйса, ³ агар мойланган руҳоний гуноҳ қилиб, бутун халқни айбдор қилиб қўйса, унда қилган гуноҳи учун Раббийга катта қорамолдан гуноҳ қурбонлигига бенуқсон ҳўкизни келтирсин. ⁴ У ҳўкизни Йиғин Чодирининг кириш жойига, Раббийнинг олдига олиб келсин ва қўлини ҳўкизнинг бошига қўйиб, ҳўкизни Раббийнинг қаршисида сўйсин. ⁵ Мойланган руҳоний ҳўкизнинг қонини олиб, уни Йиғин Чодирига киритсин. ⁶ Руҳоний бармоғини қонга ботириб, Раббийнинг қаршисида, Муқаддасгоҳнинг пардаси олдида етти марта қонни пуркасин. ⁷ Сўнг руҳоний Йиғин Чодири ичида, Раббийнинг қаршисида турган хушбўй тутатқилар қурбонгоҳининг шохига қонни қўйсин, ҳўкизнинг қолган қонини эса Йиғин Чодирига кираверишда турган тамоман ёндириш қурбонгоҳининг тагига тўксин. ⁸ Сўнг гуноҳ учун келтирилган ҳўкиздан унинг бор ёғини, ички аъзоларини қоплаб турган ёғни, барча ички аъзоларидаги ёғни, ⁹ иккала буйраги ва унинг устидаги ҳамда биқинидаги ёғни, жигари устидаги ёғни чиқариб олсин. У буларни буйраклари билан бирга ажратиб олсин, ¹⁰ (худди тинчлик қурбонлиги ҳўкизидан ажратиб олингани каби ажратсин), ва руҳоний буларни тамоман ёндириш қурбонгоҳида ёқиб юборсин. ¹¹ Ҳўкизнинг терисини, бошини, бутун танаси ва оёқларини, ички аъзолари ва ахлатини, ¹² бутун ҳўкизни қароргоҳдан ташқарига, кул тўкиладиган тоза жойга чиқарсин ва уни ўтин устида оловда ёқиб юборсин. У кул тўкиладиган жойда ёқиб юборилсин. ¹³ Агар бутун Исроил жамоаси хатоликда гуноҳ қилиб қўйиб, жамоа кўзидан бу яширин қолса ва қилиши мумкин бўлмаган ишни қилиб, Раббийнинг амрларига қарши бирор нима қилса ва айбдор бўлса, ¹⁴ унда қилган гуноҳ аён бўлгач, бутун жамоадан гуноҳ учун қурбонликка катта қорамолдан ҳўкизни тақдим қилишсин ва уни Йиғин Чодирига олиб келишсин. ¹⁵ Жамоанинг оқсоқоллари Раббийнинг қаршисида қўлларини ҳўкизнинг бошига қўйиб, уни Раббийнинг қаршисида сўйсинлар. ¹⁶ Мойланган руҳоний эса ҳўкизнинг қонини Йиғин Чодирига киритсин. ¹⁷ Руҳоний бармоғини қонга ботириб, Раббийнинг қаршисида Муқаддасгоҳнинг пардаси олдида етти марта қонни пуркасин. ¹⁸ Сўнг руҳоний Йиғин Чодири ичида, Раббийнинг қаршисида турган қурбонгоҳ шохига қонни қўйсин, қолган қонни эса Йиғин Чодирига кираверишда турган тамоман ёндириш қурбонгоҳининг тагига тўксин. ¹⁹ Унинг бор ёғини эса чиқариб олиб, қурбонгоҳда ёқиб юборсин. ²⁰ У гуноҳ учун келтирилган ҳўкизни нима қилишса, бу ҳўкизни ҳам шундай қилсин. Уни шундай қилиш керак ва шу тарзда, руҳоний жамоани поклайди ва улар кечирилади. ²¹ Ҳўкизни эса қароргоҳдан ташқарига чиқариб, аввалги ҳўкизни ёндиргани каби, уни ҳам ёқиб юборсин. Бу – жамоа гуноҳи учун қурбонликдир. ²² Агар ҳоким гуноҳ қилса ва ўз Раббий Худосининг амрларига қарши бирор нарсани хатоликда қилиб, қилиши мумкин бўлмаган ишни қилса ва айбдор бўлса, ²³ унда қилган гуноҳи унга аён бўлгач, қурбонлик сифатида бенуқсон такани олиб келсин. ²⁴ Сўнг таканинг бошига қўлини қўйиб, Раббийнинг қаршисида тамоман ёндириш қурбонликлари сўйиладиган жойда уни сўйсин. Бу – гуноҳ учун қурбонликдир. ²⁵ Руҳоний эса бармоғи билан гуноҳ учун қурбонликнинг қонини олиб, тамоман ёндириш қурбонгоҳининг шохига қўйсин, қолган қонни эса тамоман ёндириш қурбонгоҳининг тагига тўксин. ²⁶ Унинг ҳамма ёғини тинчлик қурбонлиги ёғи каби қурбонгоҳда ёқиб юборсин. Шу тарзда, руҳоний ҳокимни гуноҳидан поклайди ва у кечирилади. ²⁷ Агар оддий халқдан бирор киши хатоликда гуноҳ қилиб, Раббийнинг амрларига қарши бирор нарсани қилса ва қилиши мумкин бўлмаган ишни қилиб қўйса ва айбдор бўлса, ²⁸ шунда қилган гуноҳини у англагач, ўз гуноҳи учун қурбонлик сифатида бенуқсон эчкини олиб келсин. ²⁹ Сўнг гуноҳ учун қурбонликнинг бошига қўлини қўйиб, тамоман ёндириш қурбонлиги сўйиладиган жойида эчкини гуноҳ учун қурбонликка сўйсин. ³⁰ Руҳоний эса бармоғи билан унинг қонини олиб, тамоман ёндириш қурбонгоҳининг шохига қўйсин, қолган қонни эса тамоман ёндириш қурбонгоҳининг тагига тўксин. ³¹ Унинг ҳамма ёғини тинчлик қурбонлигининг ёғини ажратгани каби ажратиб олсин ва руҳоний буни Раббийга ёқимли бўлган хушбўй тутатқи сифатида қурбонгоҳда ёқиб юборсин. Шу тарзда, руҳоний уни поклайди ва у кечирилади. ³² Агар у гуноҳ учун қурбонликка қўй келтирмоқчи бўлса, унда бенуқсон урғочисини олиб келсин. ³³ Сўнг гуноҳ учун қурбонликнинг бошига қўлини қўйиб, уни тамоман ёндириш қурбонлиги сўйиладиган жойда гуноҳ учун қурбонликка сўйсин. ³⁴ Руҳоний эса бармоғи билан гуноҳ учун қурбонликнинг қонини олиб, тамоман ёндириш қурбонгоҳининг шохига қўйсин, қолган қонни эса тамоман ёндириш қурбонгоҳининг тагига тўксин. ³⁵ Унинг ҳамма ёғини тинчлик қурбонлиги қўйининг ёғини ажратгани каби ажратиб олсин ва руҳоний буни қурбонгоҳда Раббийга қурбонликка ёқиб юборсин. Шу тарзда, руҳоний уни қилган гуноҳидан поклайди ва у кечирилади.