2 ¹ Агар кимдир Раббийга нон бағишлови қурбонлигини келтирмоқчи бўлса, унда буғдой унини олиб келсин ва унга мой қуйиб, устига ладан қўйсин. ² Сўнгра уни Аҳарўннинг ўғиллари руҳонийларга олиб келсин. Руҳоний қўлини тўлдириб, мой қўшилган унни ладаннинг ҳаммаси билан бирга олсин ва буларни хотира учун қурбонгоҳда ёқиб юборсин. Бу ― Раббийга ёқимли бўлган хушбўй тутатқи сифатида қурбонликдир. ³ Нон бағишловидан ортгани эса Аҳарўн ва унинг ўғилларига қолсин. Бу ― Раббийнинг қурбонликларидан бўлган буюк муқаддасворликдир. ⁴ Агар ўчоқда пиширилган нондан бағишлов қурбонлигини келтирмоқчи бўлсанг, унда мой билан аралаштирилган буғдой унидан қилинган ачитқисиз нон ёки мой суртилган ачитқисиз кулчани келтиргин. ⁵ Агарда қурбонлигинг товада пиширилган нон бағишлови бўлса, унда у ачитқисиз, мой билан аралашган буғдой унидан бўлсин. ⁶ Уни бўлакларга бўлиб, устига мой қуйгин. Бу ― нон бағишловидир. ⁷ Агарда қурбонлигинг хумчада пиширилган нон бағишлови бўлса, унда уни мой билан буғдой унидан қилиш керак. ⁸ Шулардан таркиб топган бағишловни Раббийга келтириб, уни руҳонийга тақдим этгин, у эса бағишловни қурбонгоҳга олиб келади. ⁹ Руҳоний хотира учун бу бағишловнинг бир қисмини олиб, қурбонгоҳда ёқиб юборсин. Бу ― Раббийга ёқимли бўлган хушбўй тутатқи сифатида қурбонликдир. ¹⁰ Бағишлов нонидан ортгани эса Аҳарўн ва унинг ўғилларига қолсин. Бу ― Раббийнинг қурбонликларидан бўлган буюк муқаддасворликдир. ¹¹ Раббийга келтираётган нон бағишловидан ҳеч бирини ачитқили қилманглар, зеро Раббийга қурбонлик сифатида ачитқини ҳам, асални ҳам оловда ёндиришингиз мумкин эмас. ¹² Уларни бошланғич бағишлови сифатида Раббийга келтиринглар, аммо ёқимли хушбўй ҳид сифатида қурбонгоҳда ёндиришингиз мумкин эмас. ¹³ Ҳар қандай нон бағишловингни туз билан тузла ва қурбонликларингни Худойингнинг аҳдининг тузисиз қолдирма. Ҳар қандай бағишловинг билан тузни олиб кел. ¹⁴ Агар Раббийга биринчи ҳосиллардан нон бағишловини келтирмоқчи бўлсанг, унда биринчи ҳосиллардан бўлган бошоқлардан янчилган ва оловда қуритилган донни бағишловга келтир. ¹⁵ Унга мой қуйиб, устига ладан қўй. Бу ― нон бағишловидир. ¹⁶ Сўнг руҳоний доннинг бир қисмини, мой ва ладаннинг ҳаммасини хотира учун ёқиб юборсин. Бу ― Раббийга қурбонликдир.