17 ¹ Раббий яна Мусога сўзлаб деди: ² “Аҳарўн билан унинг ўғилларига ҳамда Исроилнинг барча ўғилларига эълон қилиб айтгин: Раббий қуйидагиларни айтишни буюрди: ³ Агар Исроил хонадонидан бирор киши буқани, қўй ёки эчкини қароргоҳда ёки қароргоҳдан ташқарида сўйса, ⁴ ва Раббийга қурбонлик сифатида тақдим қилиш учун уни Йиғин Чодирининг кириш жойига, Раббийнинг истиқомат жойига олиб келмаса, унда ўша одам қон тўккан ҳисобланади. У қон тўкди, шунинг учун, бундай одам ўз халқи орасидан қириб ташланади. ⁵ Бу – Исроил ўғиллари далада сўяётган қурбонликларини Раббий қаршисидаги Йиғин Чодирининг кириш жойига, руҳонийга олиб келиб, уларни Раббийга тинчлик қурбонлигига сўйишлари учундир, ⁶ токи руҳоний қонни Йиғин Чодирига кираверишда турган Раббийнинг қурбонгоҳига пуркаб, ёғини Раббийга хушбўй ҳид сифатида ёндириб юборсин ⁷ ва халқ олдиндаги жинлар билан зино қилаётиб, энди эса қурбонликларини жинларга келтиришмасин. Бу – улар учун уларнинг авлодлари оша абадий низом бўлсин. ⁸ Уларга яна айтгин: Агар Исроил хонадонидан ёки ораларингизда яшайдиган мусофирлардан бирор киши тамоман ёндириш қурбонлиги ёки гуноҳ қурбонлиги келтирса, ⁹ ва уни Раббийга тақдим қилиш учун Йиғин Чодирининг кириш жойига олиб келмаса, унда ўша одам ўз халқининг орасидан қириб ташланади. ¹⁰ Агар Исроил хонадонидан ёки ораларингизда яшайдиган мусофирлардан бирор киши қандайдир қон еса, унда Мен юзимни қон ейдиган одамга қарши қилиб, уни ўз халқининг орасидан қириб ташлайман, ¹¹ зеро тананинг жони унинг қонидадир. Жонларингизни поклаш учун Мен уни қурбонгоҳга тайинладим, чунки бу қон жонни поклайди. ¹² Шунинг учун ҳам Мен Исроил ўғилларига дедим: "Ораларингиздан ҳеч ким қон ейиши мумкин эмас ва ораларингизда яшайдиган мусофир ҳам қон емаслиги керак". ¹³ Агар Исроил ўғилларидан ёки ораларингизда яшайдиган мусофирлардан бирор киши ов қилиб, ейиш мумкин бўлган ҳайвон ёки қушни тутиб олса, унда у ҳайвоннинг қонини оқизиб, уни ер билан ёпиши керак. ¹⁴ Чунки ҳар қандай тананинг жони унинг қонидир, қони – унинг жонидир. Шунинг учун Мен Исроил ўғилларига дедим: "Ҳеч қандай тананинг қонини еманглар, чунки ҳар қандай тананинг жони – унинг қонидир. Уни ейдиган ҳар қандай одам қириб ташланади". ¹⁵ Ўлимтик ёки йиртқич ёриб кетган ҳайвонни ейдиган ҳар ким (маҳаллий одамми ёки мусофирми) кийимларини ювиб, сув билан ювиниши керак ва у кечгача нопок бўлади, кейин эса пок бўлади. ¹⁶ Агарда у кийимларини ювмаса ва танасини ювмаса, унда қонунбузарлигини ўзида кўтариб юради”.