17 ¹ Сўнгра қуръа Манашеҳ қабиласига тушди, чунки у Юсуфнинг тўнғичи эди. Жангда жасур бўлган Манашеҳнинг тўнғичи бўлмиш Гилъаднинг отаси Махирга Гилъад ва Башан тегди. ² Манашеҳнинг бошқа ўғилларининг авлодларига кўра: Абиэзернинг ўғилларига, Ҳелекнинг ўғилларига, Асриэлнинг ўғилларига, Шехемнинг ўғилларига, Ҳефернинг ўғилларига, Шемиданинг ўғилларига улушлар тегди. Булар ― Юсуф ўғли Манашеҳнинг авлодларига кўра эркак жинсидаги болаларидир. ³ Бироқ Манашеҳ ўғли, Махир ўғли, Гилъад ўғли, Ҳефер ўғли Зелофеҳаднинг ўғиллари бўлмасдан, фақат қизлари бор эди. Унинг қизларининг исмлари мана булардир: Махлаҳ, Ноаҳ, Хоглаҳ, Милкаҳ ва Тирзаҳ. ⁴ Улар руҳоний Элеазарнинг, Нўн ўғли Йешуа ва ҳокимларнинг олдига келиб: “Бизга биродарларимизнинг орасидан улуш беришни Раббий Мусога буюрган эди,”- дедилар. Шунинг учун Раббийнинг амрига кўра оталарининг биродарлари орасида уларга улуш берилди. ⁵ Манашеҳга Йорданнинг нариги томонидаги Гилъад ва Башан еридан ташқари ўнта қисм тушди. ⁶ Чунки Манашеҳнинг қизлари унинг ўғиллари орасида улуш олдилар. Гилъад ери эса Манашеҳнинг бошқа ўғилларига тегди. ⁷ Манашеҳнинг чегараси Ашердан Шеқем қаршисидаги Миқметаҳга кетади. Бу ердан чегара ўнгга Эн-Таппуаҳ аҳолисининг олдига боради. ⁸ Таппуаҳ ери Манашеҳга тегди. Манашеҳ чегарасидаги Таппуаҳ шаҳри эса Эфрайим ўғилларига тегди. ⁹ Чегара бу ердан Канаҳ дарёсига, дарёнинг жанубий томонидан тушади. Бу шаҳарлар Манашеҳ шаҳарларининг орасида жойлашган бўлса ҳам, Эфрайимга тегишлидир. Манашеҳнинг чегараси дарёнинг шимолий томонида бўлиб, денгиз билан тугайди. ¹⁰ Жанубдагилар Эфрайимники, шимолдагилар эса Манашеҳникидир. Денгиз уларнинг чегараси эди. Уларнинг чегаралари шимол томондан Ашер ва шарқ томондан Иссохор билан туташар эди. ¹¹ Иссохор ҳамда Ашер ерида Бейт-Шеан ва унинг шаҳарлари, Иблеам ва унинг шаҳарлари, Дор аҳолиси ва унинг шаҳарлари, Эн-дор аҳолиси ва унинг шаҳарлари, Таанаҳ аҳолиси ва унинг шаҳарлари, Мегиддон аҳолиси ва унинг шаҳарлари, ҳамда Неффанинг учдан бир қисми Манашеҳга тегишлидир. ¹² Манашеҳ ўғиллари ушбу шаҳарларнинг аҳолисини қувиб юбора олмадилар ва канъанликлар ушбу ерда яшаб қолдилар. ¹³ Исроил ўғиллари кучга тўлганларида, улар канъанликларни товон тўлайдиган қилдилар, бироқ уларни бутунлай қувиб юбормадилар. ¹⁴ Юсуфнинг ўғиллари Йешуага сўзлаб дедилар: “Нима учун сен бизга улушга битта қуръа ва битта қисм бердинг? Ахир биз кўп сонлимиз, зеро Раббий бизни шундай дуо қилган”. ¹⁵ Йешуа уларга: “Агар сизлар кўп сонли бўлсангизлар ва Эфрайим тоғи сизлар учун торлик қилаётган бўлса, унда ўрмонга боринглар. Ўша ерда перизликлар ҳамда рафаликлар ерини ўзларингизга тозалаб олинглар,”- деди. ¹⁶ Юсуфнинг ўғиллари дедилар: “Биз учун тоғ етарли эмас, бироқ Бейт-Шеан ва унинг шаҳарларида яшайдиганларникидек ҳамда Йезреэл водийсида яшайдиганларникидек, водийда яшайдиган барча канъанликларнинг темир жанговар аравалари бор”. ¹⁷ Аммо Йешуа Юсуф хонадони Эфрайим ва Манашеҳга деди: “Сизлар кўп сонлисизлар ва сизларнинг кучингиз кўп. Сизларнинг қуръангиз биттагина бўлмайди. ¹⁸ Тоғ ҳам, ушбу ўрмон ҳам сизларники бўлади. Сизлар уни тозалайсизлар ва у энг охиригача сизларники бўлади, чунки канъанликларнинг темир жанговар аравалари бўлса ҳам ва улар кучли бўлсалар ҳам, сизлар уларни қувиб юборасизлар”.