14 ¹ Мана шулар – Канъан ерида Исроил ўғиллари улушга олган, руҳоний Элеазар, Нўн ўғли Йешуа ва Исроил ўғиллари авлодларининг қабилабошилари Исроил ўғилларига улуш қилиб бўлиб берган ерлардир. ² Раббий Мусога буюрганидек, улар тўққизта қабилага ҳамда Манашеҳ ярим қабиласига қуръага кўра тақсимлаб бердилар. ³ Чунки Мусо иккита қабилага ҳамда Манашеҳ қабиласининг ярмига Йорданнинг нариги томонида улуш берди, бироқ у левитларга уларнинг орасида улуш бермади. ⁴ Зеро Юсуф ўғилларидан иккита қабила – Манашеҳ ва Эфрайим қабилалари келиб чиқди. Шунинг учун улар левитларга ердан қисм бермадилар, фақат яшаш учун уларнинг чорвалари ва бошқа эҳтиёжлари учун шаҳарларни ҳамда уларнинг атрофидаги жойларни бердилар. ⁵ Раббий Мусога қандай буюрган бўлса, Исроил ўғиллари шундай қилдилар ва ерни улушларга тақсимлаб бердилар. ⁶ Шунда Яҳудонинг ўғиллари Гилгалга, Йешуанинг олдига келдилар. Қенизлик Йефуннеҳнинг ўғли Калеб унга деди: “Худонинг одами Мусога Раббий Қадеш-Барнеаҳда мен ва сен ҳақингда нима деганини сен биласан. ⁷ Раббийнинг қули Мусо мени Қадеш-Барнеаҳдан ерни кўздан кечириб келиш учун юборганида, мен қирқ ёшда эдим ва мен унга юрагимда бўлган сўзни келтирдим. ⁸ Мен билан бирга борган биродарларим эса, халқнинг юрагига журъатсизлик солдилар, аммо мен ўз Раббий Худойимга тўлиқ эргашдим. ⁹ Ўша куни Мусо қасам ичиб: Сенинг оёғинг юрган ер сенинг ва болаларингнинг абадий улуши бўлади, чунки сен менинг Раббий Худойимга тўлиқ эргашдинг,- деган эди. ¹⁰ Шундай қилиб, мана, Раббий айтганидек, У мени тирик қолдирди. Раббий Мусога ушбу сўзни айтган ва Исроил саҳрода дарбадар бўлиб юрган ўша пайтдан буён қирқ беш йил ўтди. Энди мана, мен саксон беш ёшдаман. ¹¹ Бироқ Мусо мени юборган ўша пайтда қандай бўлган бўлсам, ҳозир ҳам худди шундай тетикман. Ўшанда менинг кучим қанча бўлган бўлса, ҳозир ҳам жанг қилиш, чиқишу кириш учун ўшанча кучим бор. ¹² Шундай қилиб, Раббий менга ўша куни айтган ушбу тоғни бер. Чунки сен ўша куни у ерда Анак ўғиллари яшашини, уларнинг шаҳарлари катта ва мустаҳкам эканлигини эшитган эдинг. Агар Раббий мен билан бирга бўлса, Раббий айтганидек, мен уларни қувиб юбора оламан”. ¹³ Йешуа уни дуо қилди ва Йефуннеҳнинг ўғли Калебга Хебронни улуш қилиб берди. ¹⁴ Шу тарзда, Йефуннеҳнинг ўғли Калеб Исроилнинг Раббий Худосининг амрига тўлиқ эргашгани учун Хеброн ҳозирги кунгача унинг улуши бўлиб қолди. ¹⁵ Хеброннинг аввалги номи Қиръат-Арба бўлиб, Анак ўғилларининг орасида бир буюк одам шундай аталган эди. Сўнг ер урушдан тинчиди.