5 ¹ Ўша куни Дебораҳ ва Абиноам ўғли Барак қуйидаги сўзлар билан куйлашди: ² “Исроилнинг йўлбошчилари йўл бошладилар, халқ эса ғайрат кўрсатди. Раббийни шарафланглар! ³ Эй, подшоҳлар, қулоқ солинглар! Эй, ҳокимлар, диққат қилинглар! Мен Раббийга куйламоқдаман, Исроилнинг Раббий Худосига куйламоқдаман. ⁴ Раббий, Сен Сеирдан чиқаётганингда, Эдўм даласидан келаётганингда, ер титрар, самодан ёмғир томчирар, булутлар эса сув ёғдирар эди. ⁵ Раббийнинг юзидан тоғлар эрир, Исроилнинг Раббий Худосининг юзидан ҳатто мана шу Синай эрир эди. ⁶ Анат ўғли Шамгарнинг кунларида, Йаэлнинг кунларида йўллар бўш эди. Илгари тўғри йўлдан юрганлар эса энди айланма йўллардан юрар эдилар. ⁷ Исроилнинг қишлоқларида аҳоли қолмади. Мен, Дебораҳ, кўтарилмагунимча, мен, Исроилдаги она, кўтарилмагунимча аҳоли қолмади. ⁸ Халқ янги худоларни танлади, шунинг учун дарвозада уруш бўлди. Исроилнинг қирқ мингида қалқон ва найза кўринар эдими? ⁹ Менинг юрагим сизларга ёйилган, эй Исроилнинг бошлиқлари, эй, халқнинг орасида ғайратли бўлганлар! Раббийни шарафланглар! ¹⁰ Эй, оқ эшакларда юрувчилар, гиламларда ўтирувчилар ва йўлда кетаётганлар, қўшиқ куйланглар! ¹¹ Мана, қудуқ атрофида подаларни йиғаётганларнинг овозлари! Улар Раббийнинг ҳақлиги учун мадҳлар айтар, Исроилдаги Унинг ҳақлиги учун сардорларни шарафлар эдилар! Ўшанда Раббийнинг халқи дарвозага чиқди. ¹² Уйғон, уйғон, эй, Дебораҳ! Уйғон, уйғон! Қўшиқ куйла! Тур, Барак! Ўз асирларингни бошқаргин, эй, Абиноам ўғли! ¹³ Ўшанда кучлиларнинг камига У халқни бўйсундирди. Раббий менга жасурларни бўйсундирди. ¹⁴ Амолеқнинг ерида ўрнашган одамлар Эфрайимдан келдилар. Эй, Бенямин, сенинг ортингдан, сенинг халқинг орасида Махирдан ҳокимлар ҳам, Зебулундан котибнинг қаламига эга бўлганлар ҳам келдилар. ¹⁵ Дебораҳ билан Иссохорнинг ҳокимлари ва Барак билан Иссохорнинг ўзи водийга пиёда тушди. Рубен авлодларининг юрагида эса катта тебраниш бор. ¹⁶ Нима учун подаларнинг маърашини тинглаб, қўраларнинг орасида ўтирибсан? Рубен авлодларининг юрагида катта тебраниш бор. ¹⁷ Гилъад Йорданнинг нариги томонида тинч яшамоқда, Дан кемалар билан нимадан қўрқади? Ашер дарёнинг қирғоғида ўтирибди ва ўзининг бандаргоҳларида тинч яшамоқда. ¹⁸ Забулун – ўз жонини ўлимга маҳкум қилган халқ! Нафтали ҳам даланинг тепаликларидадир! ¹⁹ Подшоҳлар келиб, жанг қилдилар. Ўшанда Канъан подшоҳлари ҳам Мегиддонинг сувлари ёнидаги Таанаҳда жанг қилдилар, аммо ҳеч қанча кумушни ўлжа қилиб олмадилар. ²⁰ Юлдузлар самодан, ўз йўлларида Сисаро билан курашдилар. ²¹ Кишон оқими уларни оқириб кетди! Эй, кўҳна оқим, Кишон оқими! Эй, менинг жоним, кучни топтагин! ²² Ўшанда отларнинг туёғи қочишдан синдилар, унинг кучлиларининг қочишидан синдилар. ²³ Мерозни лаънатланглар,- дейди Раббийнинг фариштаси,- лаънатланглар! Раббийнинг ёрдамига келмаганлари, жасурлар билан Раббийнинг ёрдамига келмаганлари учун унинг аҳолисини лаънатланглар. ²⁴ Қайнлик Хебернинг хотини Йаэл аёллар орасида баракатли бўлсин, чодирларда аёллар орасида баракатли бўлсин! ²⁵ У сув сўради, Йаэл сут берди, амалдорларнинг косасида энг яхши сутни келтирди. ²⁶ Чап қўлини қозиққа, ўнг қўлини эса ишчиларнинг болғасига чўзди. Сисарони урди, унинг бошини шикастлади, уни ёрди ва чаккасини тешди. ²⁷ Унинг оёқларига эгилди, қулаб тушиб ётди. Унинг оёқларига эгилди ва қулади. Қаерда эгилган бўлса, ўша ерда ўлик қулади. ²⁸ Сисаронинг онаси панжара ортидан ойнага қараб, фарёд қилмоқда. Нима учун унинг араваси шунча узоқ вақтдан буён қайтмаяпти, нима учун унинг араваларининг ғилдираклари бунча имиллаяпти? ²⁹ Уларнинг аёлларидан донолари унга жавоб бермоқдалар, унинг ўзи ҳам ўзининг сўзларига жавоб бермоқда: ³⁰ "Аниқ, улар топганлар, ўлжани тақсимлаяптилар, ҳар бир жангчига битта ёки иккитадан қиз бўлди. Ўлжа олинган ранг-баранг кўйлак, асирнинг елкасидан ечиб олинган, иккала томонига нақш урилган, ўлжа олинган ранг-баранг кўйлак Сисарога бўлди". ³¹ Худди шундай, ё, Раббий, Сенинг барча душманларинг ҳалок бўлсин! Раббийни севадиганлар эса бор кучида кўтариладиган қуёш каби бўлсинлар”. Бу воқеадан сўнг ер қирқ йил ором олди.