3 ¹ Мана, канъанликларнинг ҳамма урушларини билмаган Исроилнинг бутун халқини синаш учун Раббий қолдирган халқлар – қуйидагилар: ² (яъни урушни билмаган исроилликларнинг кейинги авлодлари урушни билишлари ва ўрганишлари учун қолдирилган халқлар): ³ Пелиштликларнинг бешта ҳокими, барча канъанликлар, сидўнликлар, Баал-Ҳермон тоғидан Ҳаматга кириш жойигача бўлган Лебанон тоғида яшайдиган ҳивликлардир. ⁴ Раббийнинг оталарига Мусо орқали берган амрларига исроилликлар бўйсунадиларми, деб билиб олиш учун бу халқлар синашга қолдирилган эдилар. ⁵ Шундай қилиб, Исроил ўғиллари канъанликлар, хетликлар, амўрликлар, перизликлар, ҳивликлар ва ябусликлар орасида яшар эдилар. ⁶ Уларнинг қизларини ўзларига хотинликка олар эдилар, ўз қизларини эса уларнинг ўғилларига берар эдилар. Уларнинг худоларига ҳам хизмат қилар эдилар. ⁷ Исроилнинг ўғиллари Раббий нигоҳида ёвуз нарсаларни қилдилар, ўз Раббий Худосини унутиб, Баал ва Аштаротга хизмат қилдилар. ⁸ Шунда Раббийнинг ғазаби Исроилга қарши алангаланди ва У уларни Орам-Наҳарайимнинг подшоҳи Қушонриштамнинг қўлига топширди. Исроил ўғиллари Қушонриштамга саккиз йил хизмат қилдилар. ⁹ Сўнг Исроил ўғиллари Раббийга фарёд қилдилар. Раббий эса Исроил ўғилларига қутқарувчини, Калебнинг кичик укаси Кеназнинг ўғли Отниэлни кўтарди ва у уларни қутқарди. ¹⁰ Раббийнинг Руҳи унинг устида эди. У Исроилда ҳакам эди. У урушга чиқди ва Раббий Орам-Наҳарайимнинг подшоҳи Қушонриштамни унинг қўлига топширди. Шундай қилиб, Отниэлнинг қўли Қушонриштамни енгди. ¹¹ Шунда ер қирқ йил ором олди. Сўнг Кеназнинг ўғли Отниэл оламдан ўтди. ¹² Исроил ўғиллари яна Раббий нигоҳида ёвуз нарсаларни қила бошладилар. Улар Раббий нигоҳида ёвуз нарсаларни қилганлари учун Раббий Мўаб подшоҳи Эглонни Исроилга қарши кучлантирди. ¹³ У ўзига аммўнликлару амолеқликларни йиғди ва бориб, Исроилни қириб ташлади. Улар Палмалар шаҳрини ҳам қўлга киритдилар. ¹⁴ Исроил ўғиллари Мўаб подшоҳи Эглонга ўн саккиз йил хизмат қилдилар. ¹⁵ Шунда Исроил ўғиллари Раббийга фарёд қилдилар ва Раббий уларга қутқарувчини – Бенямин ўғли Геранинг ўғли Эҳудни кўтарди. У чапақай эди. Исроил ўғиллари у орқали Мўаб подшоҳи Эглонга инъомлар юбордилар. ¹⁶ Аммо Эҳуд ўзига иккала томони ўткир бўлган, узунлиги бир тирсак бўлган қилич ясади ва уни ридоси остига ўзининг ўнг сонига боғлаб қўйди. ¹⁷ У Мўаб подшоҳи Эглонга инъомларни олиб келди, Эглон эса жуда семиз одам эди. ¹⁸ Эҳуд инъомларни келтириб бергач ва инъомларни кўтариб келган одамларни кузатиб қўйгач, ¹⁹ ўзи эса Гилгалда бўлган бутларнинг олдидан қайтиб келди ва деди: “Подшоҳ, менинг сенга айтадиган сир бўлган гапим бор”. У: “Жим”,- деди. Унинг олдида турганларнинг барчаси унинг олдидан чиқиб кетдилар. ²⁰ Эҳуд унинг олдига кирди. У алоҳида салқин болохонада ўтирар эди. Эҳуд: “Менда сен учун Худодан сўз бор”,- деди. Эглон курсидан турди. ²¹ Эҳуд ўзининг чап қўлини чўзиб, ўнг сонидан қилични олди ва унинг қорнига уни шундай санчдики, ²² тиғи билан бирга дастаси ҳам кириб кетди ва ёғ тиғни ёпиб қолди, чунки Эҳуд қилични унинг қорнидан чиқармаган эди ва ундан чиқинди чиқиб кетди. ²³ Эҳуд даҳлизга чиқди ва ортидан болохонанинг эшикларини ёпиб, қулфлаб қўйди. ²⁴ У чиққанида, Эглоннинг қуллари келиб, қарадилар-да, мана, болохонанинг эшиклари қулф эди. Улар: “У салқин хонада эҳтиёжини чиқармоқда”,- дедилар. ²⁵ Уни жуда узоқ кутдилар. Аммо ҳеч ким болохона эшикларини очмаётганини кўрганларида, калитни олиб, очдилар ва, мана, подшоҳ ерда ўлиб ётар эди. ²⁶ Улар талмовсираб турганларида, Эҳуд кетиб қолди ва бутларнинг орасидан ўтиб, Сеираҳга қочиб қутулди. ²⁷ У келиб, Эфрайим тоғида карнай чалди ва у билан бирга Исроилнинг ўғиллари тоғдан тушдилар, у улардан олдинда борар эди. ²⁸ У: “Менинг ортимдан юринглар, чунки Раббий сизларнинг душманларингиз мўабликларни қўлларингизга топширди”,- деди уларга. Унинг ортидан бордилар ва Йордандан Мўабга бориладиган кечувни қўлга олиб, ҳеч кимни ўтгани қўймадилар. ²⁹ Улар ўша вақтда мўабликлардан барчаси соғлом ва кучли бўлган ўн мингга яқин кишини қириб ташладилар, ҳеч ким қочиб кета олмади. ³⁰ Шу тарзда, шу куни мўабликлар Исроилнинг қаршисида бўйсундилар ва ер саксон йил ором олди. ³¹ Ундан сўнг Анат ўғли Шамгар келди, у ҳўкизнинг қозиғи билан олти юзта пелиштликни ўлдирди. У ҳам Исроилни қутқарди.